5 ий ончыч декабрьыште республикыштына шочмо йылмым туныктышо-влакын ассоциацийышт шочын. Тушто шочмо йылме семын тӱрлӧ предметым туныктышо педагог-влак улыт. Ушемым Елизавета Игнатьева вуйлатен, а ассоциацийын черетан погынымаштыже тиде сомылым Надежда Гусевалан ӱшаненыт.
Марий кундемын историйже, тӱрлӧ ушем да лӱмлӧ еҥ-влаклан пӧлеклалтше статья-влак ик сборникыште. Тыглай огыл, а архив документ дене пеҥгыдемдалтше статья. Нуным иктыш Марий архив ежегодник чумырен. Эртыше кечылаште тудын 2023 ийыште лекше номерже дене палдареныт.
Туныктымо амал дене эше 27 ий ончыч тӱҥалме йӱла умбакыже шуйна. Республикысе Марий тӱвыра рӱдер тунеммаште да тӱрлӧ конкурслаште ойыртемалтше йоча-влаклан «У ий йомак» пайремым пӧлеклен. Тений тудо пытартыш ийласе семынак Республикысе Курчак театрыште эртаралтын. Йоча-влак тӱрлӧ йомакысе герой дене пырля кож йыр пӧрдын, Йӱштӧ Кугыза деч шере пӧлекым налыныт, «Аленький цветочек» спектакльым онченыт.
Туныктышо-влак ешым чапландареныт. Педагог да наставник идалык мучаште Йошкар-Олаште туныктышо-влак ешын икымше фестивальышт эртен. Республик кӱкшытан вашлиймаш район да олала гыч 170 наре ешым иквереш чумырен. Нуно чыланат школлаште пашам ыштат. Кумданрак материалыште.
Уста композиторым шарнен. И.Палантай лӱмеш тӱвыра да сымыктыш колледжын кугу концерт залыштыже Россий сымыктышын сулло деятельже Валерий Кульшетовым шарныме лӱмеш кугу концерт эртен. Ты кечын лӱмлӧ композиторын произведенийже-влакым йоҥгалтареныт. Классике музыкылан поян программе толшо-влакын чоныштым тарватен.
Марий йӱла гоч салтак-влаклан аралтыш. Республикысе Марий Юмыйӱла ушем, марий онаеҥ-влак СВО-што улшо рвезе-влак верч кумалын, марий йӱла радам дене аралтышым йодыт. Ты паша Марий Элыште гына огыл, Пошкырт кундемыштат шукталтеш.
Теле толмеке еҥ-влак тӱрлӧ чер дене черланат. Тиде грипп, ОРВИ, ОРЗ. Ты амал денак южо школлаште йоча-влак вучыдымын каникулыш каят. Амалже – карантин. Теве, мутлан, Волжск туныктыш пӧлкан уверже почеш Юлсер кундемыште 5 школ карантиныште. Кузе шкем чер деч аралаш? Тудын деч могай лӱдыкшым вучаш? Вашмутым Кристина Быкова кычалын.
Морко район Изи Кушна ялын эргыже, тале ечызе, специальный сарзе операцийыште вуйжым пыштыше Михаил Михайловым шарныме лӱмеш Морко район Шордӱр тӱҥ школышто ече дене таҥасымаш эртен. Район кӱкшытан таҥасымашке Морко районын 10 школжо гыч участник-влак ушненыт. Чылаже 110 ечызе ечыгорныш шогалын. Эн ончыч стартыш Михайловмыт еш лектын. Нуно 1 километр кужытым куржыныт.
Марий йылмым электрон учебник почеш тунемаш да шочмо йылмым туныктышо-влакын мастарлыкшым вияҥдаш посна кластер. Тидын нерген туныктышо-влакын семинарыштышт ойленыт. Тиде туныктышо да педагогын идалыкше кышкарыште илышыш пурталтше эше ик вашталтыш. Кумданрак сюжетыште.
Салтак-влаклан полыш. Калык прикладной сымыктыш тоштер-пӧрт пелен чумыргышо «Тепло женской души» кидпашазе –влакын клубышт, С.Г. Чавайн лӱмеш книгагудысо «55+» проектын участникше-влак специальный сарзе операцийыште улшо мемнан салтакна-влаклан пижым пидыт. Ыштыме паша-влакым январьыште колташ палемденыт.
