Марий Турек районысо Косолапово школым «Современная школа» федерал проект дене келшышын оборудований дене пойдарат. Тений материально-технический базым уэмден. «Технологий» предмет дене шинчымашым келгемдаш ялозанлык, йолчиемым ачалаш туныктымо пашалан кабинет-влак, тыгак кидпаша да куэ кумыж гыч тӱрлӧ арверым ышташ, ургызо да столяр пашалан туныктышо мастерской-влакым ыштеныт. Тидын дене пырля психолого-педагогический полыш кабинет-влакымат пойдарат. План дене биологий, географий, руш йылме да математике дене кабинетлашке туныктымо пособийым, спорт заллан у оборудований да инвентарьым налыт. 

Сквер на улице Йывана Кырли преобразуется благодаря проекту «Формирование комфортной городской среды».

Марий Турек поселкышто «Оласе йӧнан средам ыштымаш» проект дене келшышын, кудывече, тӱшка вер, тыгак корно-влакым шотышко кондат. Тыге, мутлан, Красноармейский уремыште ты марте корно начар лийын, йӱр дечын вара вӱд погынен, кастене пычкемыш лийын. Чыла тидым шотышко налын, 27 номеран пӧртыштӧ илыше-влак кундемым тӱзаташ йодмаш дене лектыныт. Тушто пӧрт деке пурымо корным ыштеныт, теҥгыл-влакым, урным келыштареныт.

Йошкар-Олаште йочасад-влак воктене асфальтым вашталтат. Тиде «Калинка», «Колосок», «Солнышко», «Кече» йочасад-влак кумдыкышто. Подрядчикым ойырымо шотышто аукцион тӱҥалмым «Кугыжаныш закупко» сайтыште вераҥдыме. Пашалан 3 миллион утларак теҥгем ойырат. Кеҥеж жапыште у асфальтым шарен шуктышаш улыт. 

Республикын рӱдӧ олаштыже сентябрь марте видоеэскерымаш системе дене 100 утла камерым вераҥдат. Тидын нерген мэрийыште вандализм да кундемым тӱзатыме шотышто правилым пудыртымылан пӧлеклалтше йыргешке ӱстел йыр мутланымаште каҥашеныт. Заседанийышке мэр Евгений Маслов ушнен. Палемденыт, Йошкар-Олаште тений оласе погым 15 гана локтылымаш лийын. Тидын годым 900 тӱжем теҥгелан эҥгек ышталтын.

Российыште йочам шкет ончышо да ончыкылык ава-влакалан пособийым тӱлаш тӱҥалаш чылаже 46 миллиард теҥге ойыралтын. Ушештарена, 1 июль гыч Российыште кажне тылзын тӱлымӧ кок у пособий палемдалтеш, тиде 7 гыч 17 ияш марте йочам шкетын ончышо ача але авалан, тыгак изи срокышто учетышко шогалше мӱшкыран ӱдырамаш-влаклан. Марий Элыште тиде выплате-влакын кугытышт 5 тӱжем теҥге утларак. Йодмашым «Кугыжаныш услуго» порталыште, тыгак илымвер пелен пенсий фондын клиентский службыштыжо 1 июль гыч пуаш лиеш. 

Здравоохраненийын первичный звенон модернизацийжылан республикыште 2 миллиард наре теҥгем ойырат. Тиде окса дене поликлинике-влакым тӧрлат да чоҥат, у оборудованийым налыт, медицин организаций-влакын автопаркыштым уэмдат. 

Коронавирус дечын прививкым Йошкар-Олаште эше ик мобильный пунктышто шындаш лиеш. Ленин лӱмеш тӱвыра полатыште мобильный пункт паша кечылаште 9 гыч 15 шагат марте пашам ышта. Вакцинацийышке толшо-влакын пеленышт паспорт, полис да СНИЛС лийшаш. Прививкым шындыме дечын ончыч пациент анкетым воза, тудым врач онча. Ушештарена, рӱдӧ олаште мобильный пункт Главпочтамтыште Советский урем 140 адрес дене паша кечылаште 10.00 гыч 17.00 шагат марте пашам ышта. Республикыште кум тӱрлӧ вакцине дене прививкым шындат:   «Гам-КОВИД-Вак» але -«Спутник V»,  «ЭпиВакКорона»,  «КовиВак».

Чот шокшо игече республикыште икмыняр арня шуйна. Тиде чыла службо-влакым утларак тӱткын пашам ышташ тарата. Республикыште 5 июль марте пожар лийын кертыме   лӱдыкшым шижтарыме режим шуйна, республике виктер игечым ончен, тудым шуйымо нерген, палемда. 

Перекрытия связаны с долгожданным ремонтом моста по улице Водопроводной, сообщают в городской мэрии.