Российыште саркуралым 21 ийым темымеке веле налаш лиеш. Тидын шотышто законышко кидпалыжым Элнан президентше Владимир Путин пыштен. Тыгодым сарзе службым эртыше але кугыжаныш военизированный организацийыште служитлыше-влаклан, тидын дене пырля шагал чотан калыкын еҥышт, тыгак профессионал сонарзе-влакат оружийлан лицензийым тиде ийгот дечын ончычрак налын кертыт.

Рӱдӧ олашке пурымаште «Кинде-шинчал» скульптур композицийым тӧрлат. Корным тӧрлымӧ паша кундемыштына лум шулен пытымеке вийым налын. Тений Водопроводный уремыште Шернур тракт марте корным ик эн ончыч ыштеныт, лишыл пагытыште Вараксин кÿварым тӧрлаш тӱҥалыт. 

Йошкар-Оласе Советский уремыште корным чоҥымо паша мучашлалтеш. Тыгодым ик пӧрт тураште подрядчик тротуарыште асфальтым уэш шарен. Тидын нерген Йошкар-Олан мэрже Евгений Маслов инспекций дене тиде верыште лиймыж годым палемден.

Регионысо ава капиталым тений 5 тылзе жапыште 92 еш налын. Регионысо бюджет гыч тидлан 5 миллион утларак теҥге ойыралтын. Регионысо ава капитал – тиде «Демографий» национальный проектын ик виктышыже, тудым нылымше але утларак икшывым ыштыше еш-влак налын кертыт. 1 февраль гыч тудын кугытшо 63 тӱжемат 78 теҥге. Ава капиталым шагал парышан еш-влаклан пуат, кӧн кажне еҥлан шотлымаште парышыже регионышто илен лекташ ситыше кугыт: 10 тӱжем теҥге дечын шагалрак. Регионысо ава капиталым ик гана налаш лиеш.

Республикыште коронавирус дечын вакцинацийым шукемдат. 28 июньысо данный дене келшышын, Марий Элышке 88 тӱжем комплект вакцине толын. Икымше компонент дене прививкым 74 тӱжем утла еҥ ыштен, кокымшо дене – 58 тӱжем наре. Тидын нерген регион вуйлатыше Александр Евстифеев Россий Правительстве Председательын алмаштышыже Татьяна Голикован эртарыме совещанийыштыже палемден.

Республикын икмыняр районыштыжо вӱдлан икмыняр скважиным пролат. Кеҥеж жапыште еҥ-влак пакчашке вӱдым шават, тидыже южо районлаште нелылыкым луктеш. Республикын правительствыже яндар вӱдым ситарыме, вуд пуч-влакым ыштымылан эреак кугу тӱткышым ойыра. Регион вуйлатышын кӱштымашыже дене, районлаште вӱдлан ешартыш скважиным пролат. Тидлан пӧлеклалтше совещаний республике правительстве пӧртыштӧ эртен. 

«Москваште илыше-марий-влак калыкле-тӱвыра автономий» мер ушемым ыштеныт. Эртыше кечылаште учредительный конференций лийын. Прдседательлан Владимир Иванович Актанаевым ойыреныт. Тидын дене пырля Москваште илыше чолга марий-влак йыргешке ӱстел йыр мутланеныт, тыгак Россий калык-влакын пӧртыштыжӧ марий кабинетым почыныт. Тудым калык-влакын пашашт шотышто федерал агенствын полшымыжо дене ышташ йӧн лийын. Ончыкыжым Москваште илыше марий-влак тыште вашлиймашым да тӱрлӧ мероприятийым эртараш тӱҥалыт. 

Республикысе курчак театр шке черетан 79 тургымжым премьере дене мучашлен, вес ийын театрлан 80 ий. Артист-влак «Где обедал воробей?» у спектакльым ончыктеныт. Жонглер, оҥай персонаж, да тӱҥ герой-чолга да лӱддымӧ пӧрткайык. Спектальым Самуил Маршакын почеламутла негызеш ыштеныт. Постановко йоча-влакым шке шонымашым мучаш марте, южгунам мыскарым кучылтын шукташ туныкта. 

Школлаште экзамен-влак мучашлалтыныт, йоча-влакын кеҥеж канышышт тӱҥалын. Тыгодым тунемме вер-влакым сентябрь тылзылан ямдылат. Шернур районысо 1-ше номеран школым тений капитально олмыктат. Школын оралтыжым чоҥымылан тений 45 ий, ача-ава да тунемше-влак шукертак тиде вашталтышым вученыт. «Кугыжаныш да муниципал оргнизаций-влакын оралтышым тӱзатымаш» программе дене келшышын, тунемме верыште окна-влакым вашталтыт, леведышым уэмдат, тыгак шокшым да вӱдым пуышо системым шотышко кондат. Пашам «Марспецмонтаж» акционер ушем ышта. 

На сегодняшний день завершена работа по проектированию и финансированию объектов. Вопрос обеспечения населения водоснабжением и водоотведением обсудили сегодня на заседании в Доме правительства.