Марий Элыш чоҥымаш да ЖКХ министр Ирек Файзуллин толын каен. Кугарнян Федерал ведомствын вуйлатышыжым аэрпортышто Александр Евстифеев вашлийын. Ик эн ончыч чоҥымаш министр Келшымаш пӧрт чоҥымым аклен. Федерал бюджет гыч тений тиде пашалан 680 миллион теҥге палемдалтын. Объектым 2023 ий марте ыштен шуктышаш улыт, кызыт подрядчик 3-шо пачашым нӧлта, монолитный колонно-влакым ыштеныт. Ирек Файзуллин подрядный организацийын вуйлатышыже дене мутланен, чоҥымаш материалым жапыштыже кондымым йодын. Келшымаш пӧртыштӧ вестибюль, гардерод, администраций да моло пӧлем-влак лийыт. План дене тушто концерт программым эртараш залым ыштышаш улыт.
Тидын дене пырля министрым рӱдӧ олаште Ширяйково микрорайонышто чоҥалтше пӧрт-влак дене палдареныт. Кызыт тушто аварийныйлан шотлалтше пӧрт-влак улыт, ончыкыжым нуным пужат, а олмыштышт шуко пачеран пӧрт-влакым нӧлтат, тиде микрорайонышто инфраструктуро вияҥеш.
Совещанийыште чоҥымаш министр регион вуйлатыше дене социал-экономике вияҥмаш дене индивидуальный программым шуктымо шотышто йодыш-влакым каҥашеныт.
Комментариев: 0