Тазалыкым шуарат да илыш дене тӧр ошкылыт. Мутем шинча пӱсылык шотышто эмганен вияҥше-влак нерген. Таче начарын ужшо еҥ-шамчылан Российысе сокыр-влак ушемын Марий Элысе пӧлкаже ятыр проектым темла. Нуно регион кӱкштыштат, тыгак Российыштат тӱрлӧ грантым сеҥат. Шукерте огыл черетан проект дене ойыртемалтыныт. Кумданрак Эльвира Петрова сюжетыштыже.  

Ийготыш шудымо, подросток-влак нерген спектакль. Марий самырык театр лач тыгай ийготан-влаклан постановкым ямдылен. Подросток-влак могайрак улыт? Нуным мо тургажландара? Чоныштышт мо ышталтеш? Тиде да моло йодыш-влаклан вашмутым «Серафима» спектакльыште пален налаш лиеш. 

МЭТР телеканаллан – 7 ий. 2017 ий 12 сентябрьыште мемнан тӱшка увер йӧн, СМИ, регистраций нерген свидетельствым налын. МедиаХилс компанийын данныйже почеш, таче МЭТР телеканал элыштына 21-ше кнопко-влак коклаште 5 эн сай радамыш пура. Суткаште 14 увер выпуск лектеш. Интервью, тематике да развлекательный программе, тыгак эр ток-шоу уло. Марий йылме дене лекше увер блок, мутлан, пытартыш ийлаште 6 пачаш, 20 гыч 120 минут марте кушкын. Тӱжем дене еҥ материалнан геройжо лийын. Ялозанлык, туныктыш, социал илыш, тазалыкаралтыш – чыла темымат авалтена. Мемнан передачына-влак регионысо, Российысе да моло конкурслаште ойыртемалтыт. 

Шӱдырымӧ кечылан пӧлеклалтеш. Тений икымше гана Марий Эл тӱнямбалсе шӱдырымӧ кечыш ушна. Тудым кидмастар Евгения Кошкина эртараш пижын. Шкешотан акций 21 сентябрьыште, шуматкечын, Волжский районысо Приволжский поселкышто тӱвыра пӧрт ончылно лиеш. Тушко шӱдырен, пидын але урген моштышо кажне кумыланым вучат.    

11 сентябрьыште Российыште айык, орвуян улмо кече – рушлаже «День трезвости» палемдалтеш. Тудым 1913 ий гыч эртарат. Рӱдолаштына кажне ийын тиде кечын специалист-влак тӱрлӧ акцийым темлат. 

Оршанкысе шуко профилян колледжыште Айти кубым почыныт. Ынде туште йочасадыш коштшо, школышто тунемше да студент-влак ешартыш шинчымашым налын кертыт. Шинчымашым 6 виктыш дене пуат. Йоча-влак шкеныштым робототехнике, системный администрирований, мобильный приложений да виртуальный реальностьым чоҥымаш, программирований дене терген кертыт.

Марий куштымашым йӧратыше-влаклан конкурс. 8 гыч 15 сентябрь марте Марий Элыште «Марий куштымашын арняже» акций эрта. Условий почеш ик еҥ але коллектив марий сем почеш куштымашым шынден, видеош сниматлышаш. Тушко кажне кумылан еҥ ушнен кертеш.  Видеом вконтакте социал кылыш #Неделя марийского танца, #Тывырдык, #Воштончыш хэштег дене вераҥдыман. 

«Наҥгае мыйым, корно». Тыге маналтеш самырык возышо, Виктория Матвееван, у книгаже. Тудым «Светлана» сылнымут фондын полышыж дене савыктыме. Кумданрак Кристина Быкован сюжетыштыже. 

Шыже толмо дене республикын районлаштыже шыже кумалтыш-влак тӱҥалыт. Шушаш рушарнян Йошкар-оласе «Марий кумалтыш» общине рӱдола воктенысе Тумер отышто Мер кумалтышым эртара. Тушто пурлык дене кумалаш тӱҥалыт. 

«Салтак-влаклан полшаш». Тыгай шонымаш тӱжем дене калыкым иктыш уша. Сандене специальный сарзе операцийыште улшо рвезе-влаклан кажныже кертмыж семын полша. Нунын коклаште «Саскавий» марий ӱдырамаш мер ушем. Кызыт ме мутнам ушемын вуйлатышыже Людмила Кошкина дене вашталтена.