Тӱҥжӧ - рӱдоласе прописке да марий койыш. Йошкар-Олаште илыше марий-влак 12-шо Марий калык погыныш делегат-влакым сайленыт. Делегацийыште 60 еҥ лиеш. Тиде Башкортостан республик деч вара эн кугу тӱшка. Рӱдоласе делегатым сайлымаш нерген мемнан сюжет.   

Ечызе-влак таҥасымаш сезонлан кеҥеж мучко ямдылалтыт, тÿрлö соревнованийыш ушнат. Тиде амал денак 15 августышто «Корта» тунемме-тренировочный базыште ече спорт дене кенежымсе йоча фестиваль эртен. Тушко Кристина Быкова миен. 

«Посадить дерево» спектакльым Шереметев замкыште модыт. Шкетан лӱмеш марий кугыжаныш драме театр тиде постановкым кава йымалне ончыкта. Спектакль ача да эрге кокласе вашкыл нерген. Кугурак тукымын икшыве деч кум йодмашыже уло. Пӧръеҥ шке курымыштыжо пӧртым чоҥышаш, эргым ончен куштышаш да пушенгым шындышаш. Но самырык тукымын шинчаончалтышыже йӧршеш весе. Кава йымалне ончыктымо спектакль ончышо-влак деке лишкырак лияш йӧным ышта. Палемдыман, тиде спектакльым «Летние вечера в усадьбе Шереметевых» фестивальын программе кышкарыштыже ончыктат. 

Объективыште - янлык ден кайык-влак. «Кугу Какшан» заповедникын инспекторжо-влак чӱчкыдын оҥай видео дене пайлалтыт. Фотоловушкыш тӱрлӧ ир янлык-влак логалыт. Шордо, луй, енотовидный пий, но утларакше маска-влак койыт.  

Поҥго лектыш куандара. Кодшо ий дене таҥастарымаште тений тудо сайрак шочын, палемдат понгызо-влак. Нуно ик-кок шагатыште икмыняр ведрам погат. Шкалан ситышым ямдылен, утыжым ужалаш луктыт. Йошкар-Оласе пазарлаште калык коклаште эн йодмашан шопкевапка, ошпоҥго, кашкавоҥго, курезе  улыт. 

Марий Элыште 17 август гыч кеҥежымсе-шыжымсе сонарлыме тургым тӱҥалеш.  1 август гыч Марий Эл Республикысе янлыкым аралыме шотышто департамент сонарзе-влаклан чоҥештылше, ийын коштшо кайыкым кучаш разрешенийым пуэдаш тӱҥалын. Тыге, 17 август гыч 22 ноябрь марте вӱдыштӧ ийын коштшо, пасу, куп да олыкышто илыше кайыквусым, а 22 декабрь марте кӱдыр, музо да курмызакым лӱяш лиеш. 

Таза капыште – таза чон. Курымла дене илыше калыкмут таче у шӱлышым налеш. Йоча-шамычым изи ийгот гычак спортлан шӱмаҥдат, илалше-влакланат шкем тергаш чыла йӧн уло. Арам огыл календарьыштат спортым йӧратыше-влакын посна кечышт уло. Тений тыгай пайрем 85-ше гана эртен. «Дружба» стадион тӱрлӧ ийготан еҥым мастарлык-класс да шкешотан фестивальышке ушен. 

Тиде сурт озаватын пакча-саска лектышыжым нимогай игече локтыл огеш керт. Тудын кидше дене кеч-могай пеледыш тӱзлана, киярымат ик ийыште кум гана шынден шукта. Советский район Кöрдемтÿр ялыште илыше Маргарита Орехован сад-пакчашкыже ончалына. 

Ялозанлык виктыш дене шинчымашым школышто налаш лиеш. Тений у тунемме ийыште районысо школлаште агрокласс-влак почылтыт. Тиде ялозанлык специалист-влакым школ парт кокла гычак кушташлан Республикысе туныктыш министерствын кӱштыкшӧ почеш ышталтеш.   

Йомак да йоча тӱняш пӧртылтышӧ ончер. Т. Евсеев лӱмеш калыкле тоштерыште Майя Филиппован фотосӱретше-влакым чумырышо выставке пашам ышта. Фотограф кушеч усталык шӱлышым налеш да паша-влакым шочыкташ мо кумылаҥда? Тиде да моло йодышым Лира Матвеева рашемден.