Республикыштына шошо агалан ямдылалтыт. Параньга районысо «Победа» тÿшка озанлыкын машинавечыштыже тÿн технике ямде. Игече шотлан толмым вучен шуктымеке, озанлык шке пашажым тÿҥалеш веле.

Морко рÿдö книгагудышто сылнымут вашлиймаш эртен. Поэзийым да прозым йöратыше-влаклан иквереш чумыргаш амалжат лийын. Черетан вашлиймашке марий серызе-влак Игорь Попов, Татьяна Соловьева да Эрик Петров миеныт.

Йошкар-Олаште йӱдвел коштмаш тоштер почылтын. Тудо Марий Элыште веле огыл, Российыште икымше улеш. Тушко йӱдвел коштмаш дене кылдалтше чыла инветарьым чумыреныт. Тоштерым почмаште мыйын коллегем-влак Эльвира Петрова ден Владимир Бирюков лийыныт.

Ончыкылык профессийым ойыраш полшат. Ялозанлыкыште самырык специалист-влакын чӱдылыкыштым шижын, Вечын селасе аграрно-строительный техникум школышто тунемше ӱдыр-рвезе-влакым тачысе жаплан келшыше ялозанлык технике ден палдара.

Икымше роль, икымше образ. 2024 ий гыч Российын школлаштыже театр студий-влак пашам ышташ тÿҥалыныт. Тидыже сымыктыш да туныктыш аланыште эше ик пеҥгыде ошкыл. Школ театр-влакын паша кышкарыштышт тунемше-шамыч школ пелен веле огыл, тыгак республик кÿкшытыштö эртаралтше конкурслаште шуаралтыт. Шернур районын театр студийже-влак дене мемнан корреспондентна Дмитрий Веденькин палдара.

Тӱткыш - марий талешке-влаклан. Республикысе марий тӱвыра рӱдер ынде 11-ше гана «Ший талешке» краеведений шымлымаш конференцийым эртара. Тений тудо 24 апрельыште Калык тӱвыра пӧртыштӧ лиеш. Конференцийын тӱҥ шонымашыже: мемнан коклаште улшо талешке-влак дене палдараш. Конкурслан ямдылыме материалым марий йылме дене возыман (здесь выдать плашку) да 18 апрель марте Марий тÿвыра рÿдерын электрон почтышкыжо колтыман. Конференцийыш шкет але тӱшка паша дене ушнаш лиеш.

Шинчымашлан пайдале вашлиймаш. Апрель тӱҥалтыште Козьмодемьянск олаште «Игнатьев лудмаш» шанче-практик конференций лийын. Икымше гана тудым 2001 ийыште эртареныт. Негызым профессор Лидия Васикова пыштен. Тений конференций «Кызытсе илымаште курыкмарий-влакын историй да тӱвыра поянлыкышт» темылан пӧлеклалтын. 5 секцийыште 60 наре паша йоҥген. Тыгак вашлиймаште икмыняр книга презентаций эртен. Иктыже - «Курыкмарий сӱан». Курыкмарий, руш да англичан йылмыла дене савыкталтше книга-альбом «Российысе калык-влакын сӱанышт» серий кышкарыште лектын.

1 апрель гыч икымше классыш тунемаш налме нерген йодмашым пуымо кампаний тӱҥалын. Рӱдолаште гына тений 4 тӱжем утла йоча парт коклашке шинчеш. Тунемше-влакым у, 32-шо номеран школат, вашлиеш. Тушто кызыт отделочный паша кая. Школ август марте ямде лийшаш.

Тошто купеч олаште – марий шӱлыш. Виче кундем – Российыште марий-влакын тӱшкан илыме ик эн кугу регионжо. Таче тушто 18 тÿжемат 600 марий ила. Нуно Марий Эл дене чак кылым кучен, шке йӱла ден тӱвыраштым аралат. Тидлан Пижан районышто Марий тӱвыра рӱдер пашам ышта. Киров ола гыч Вера Горохован сюжетшым ончаш темлена.

Марий Элысе медиа-влак кугу мероприятийлан ямдылалтыт. 17 да 18 апрельыште Москошто ВДНХ-ште медиакече лиеш. МЭТР телеканалын коллективше, районласе газетын тӱҥ редакторышт, «Марий Эл» увер агенстве да «Марий книга издательстве» савыктыш пӧрт уна-влаклан поян программым ямдылат. Таче ме «Марий Эл» газетын тӱҥ редакторжо Светлана Пехметова дене мутланена.