Почтышто пашам ыштыше-влакым саламленыт. Июль тылзын кокымшо рушарнянже ты аланыште тыршыше-влак профессионал пайремыштым палемдат. Марий Эл Республикын вуйлатышыже, Юрий Зайцев почтышто пашам ыштыше-влакым саламлен, шуко ий кыртмен пашам ыштыше-влаклан таумутым кучыктен.
Патриарший площадьыш гармонь сем почеш кушталташ ӱжыт. «Марий кенеж» фестиваль кышкарыште Йошкар-Олаште кажне каныш кечын ятыр мероприятий эрта. Тиде шуматкечын да рушарнян рӱдоласе площадьыште «Марий мланде» фольклор ансамбль выступатлаш тӱҥалеш.
Профессионал-влаклан – ешартыш шийвундо. Марий Элын вуйлатышыже Юрий Зайцев «Профессионалы» чемпионатын регионысо этапыштыже сеҥыше да нунын наставникыштлан грантым кучыктен. Тиде 43 студент, школышто тунемше-влак да нунын педагогышт. «Профессионалы» чемпионат республикыште тений кокымшо гана эртен.
Морко район Унчышто Сӱрем кумалтыш лиеш. Тудым йӱлаш пурымо семын 12 июльышто села воктене отышто эртарат. Тушко Марий Эл, тыгак Урал кундем, Татарстан кундем гыч онаеҥ-влак чумыргат. Марий калыкын тӱҥ онаеҥже Александр Иванович Таныгин пелешташ тӱҥалеш. Отышто вич тулолмо лиеш: Ош Кугу Юмылан, Шочынавалан, Тӱнямбал Серлагышлан, Кӱдырчӧ Юмылан да Кугарня Юмылан. Унчо кундемыште Сӱрем кумалтышым кажне ийын эртарат. Тений эн кугу пӧлек – оргамак лиеш.
Марий делегаций - Башкортостан республикыште. Мишкан селаште эртыше «Мотивы финно-угрии» финн-угор калыкын музык усталыкшылан пӧлеклаште регион-влак кокласе 2-шо фестивальыш Марий тÿвыра рÿдер ушнен. Кумданрак Кристина Быкован сюжетыштыже.
Сымыктыш школыш тунемше-влакым вучат. У Торъял район Токтарсола школышто Эрик Сапаев лÿмеш йоча сымыктыш школын пöлкаже пашам ышта. Усталык шÿлышан йоча-влакым тушко 2002 ий гыч погаш тÿҥалыныт. Тиде жапыште ятыр ÿдыр-рвезе шке усталык корныжым умбакыже шуен.
Школышто верланыше тоштер йоча-влакым шуараш, шке кундемышт, ондаксе илыш нерген кумданрак пален налаш полша. Морко район Шордӱр школ пелен тоштер пашам ышта. Тудо Кушна кундемын историйже, марий калыкын чиемже, арверже, ӱзгарже, тусо лӱмлӧ еҥже нерген каласкала. Кумданрак Лира Матвееван материалыштыже.
Тӱвыра аланлан полыш. Марий Элыште клубым, книгагудым да моло социал тӧнеж-влакым олмыкташ да тӱзаташ, семӱзгар да тӱрлӧ оборудованийым налаш «Тӱвыра» нацпроект полша. Тудо 2019 ий гыч илышыш шыҥдаралтеш. 5 ий жапыште Марий Элыште нацпроект полшымо дене ятыр паша ышталтын. Проектын пашажым Мер политик рӱдерыште йыргешке ӱстелыште иктешленыт.
«Марий калыкын легендыже» конкурс пу гыч пӱчкедыше мастар еҥ-влакым Йошкар-Олаште чумыра. Спидкарвингист-влак, тыге маныт, пу гыч пÿчкедышым, Российын тӱрлӧ олаж гыч толыт. Конкурс Марий парк кумдыкышто 4 кече эрташ тӱналеш.
Морко посёлкышто Районысо ача-ава-влак ушемын погынымашышт эртен. Тушто ешын ончыклыкшо, тазалыкше, икте-весе кокласе кыл да тулеч моло йодышымат лончыленыт. Кугыжаныш Погынын депутатше-влак ешлан пӧлеклалтше, тудын вияҥмыж дене кылдалтше меропритийым районлаште эртарыме нерген Республикын вуйлатышыж деке йодмаш дене лектыныт. Тудо тиде темлымашым сайлаш шотлен. Кеҥеж мучко сессий-влак районлаште эртат.
