Йӧнан да сай лиеш. «Лӱдыкшыдымӧ сай качестван корно» нацпроект почеш республикыште корным тöрлымö паша умбакыже шуйна. Тений ял шотан илемлашке наҥгайыше 4 корно ужашым ачалат. Чылаже 170 километрым шотыш кондышаш улыт. Тышечын 13-шо - У Торъял-Масканур корно. Паша сентябрь марте мучашлалтшаш. Подрядчик-влак тошто асфальтым кораҥденыт, 2 пачаш асфальт ден бетон шартышым пыштеныт. Тыгак вӱд пучым олмыктеныт. Эше 5 автобус остановкым вераҥдышаш улыт.

Марий Эл Республик вуйлатыше Юрий Зайцевын темлымашыж дене эртаралтше «Таза республике» проект умбакыже шуйна. Тиде гана акций «Тазалык кече. Йоча-влак» лӱм дене У Торъял поселкышто эртен. Изи пациент-шамычым республикысе йоча клинический больнице гыч аҥысыр специализациян врач-влак онченыт. Кумданрак Эльвира Петрован материалыштыже.

«Еш – илыш памаш». Тыгай девиз дене тений финн-угор лагерь эрташ тӱҥалеш. Финн-угор калык-влак гыч лекше йоча да самырык-влакым тений 28-ше смене чумыра. Тушко Российын тӱрлӧ регионлаж гыч 12 гыч 18 ияш марте ӱдыр-рвезе-влак чумыргат. Лагерьын участникше-влакым Куяр поселкысо «Авангард» сарзе-патриот рÿдер вашлиеш. Тенийсе программе мо дене ойыртемалташ тӱҥалеш? Вашмут – сюжетыште.

Культурологий доктор Галина Шкалина марий-влакын кеҥеж пагытысе пайремышт нерген.

Семык - тоштыеҥым уштымо пайрем. Тудо Кугече деч шым арня вара толеш. Тений 20 июньлан логалын. Йӱла радамым ожно кажне айдеме, еш, тукым шуктышаш улмаш. Марий йӱла почеш мончаш пуреныт, пайрем кочкышым ямдылен, тоштыеҥым ӱжыныт да молат. Таче пайрем йӱла-влакым эше сцене гоч ончыктат. Морко районысо Изи Кушна ялыште регион кокласе «Семык» пайрем эртен. 

Чолга самырык марий ӱдыр-рвезе-влак 16-шо гана пырля чумыргат. Курыкмарий район Микрӓк села Россий кӱкшытан марий самырык тукым слётым вашлияш ямдылалтеш. Тений слёт Еш идалык кышкарыште эртаралтеш. Садлан ты вашлиймашыш самырык еш-влакымат ушнаш ӱжыт. Йодмашым 1 июль марте вучат. Тиде мероприятийын кÿлешлыкше да тенийсе слётын ойыртемже нерген Вера Горохован сюжетыштыже.

РЕПОРТАЖ: Кугу Отечественный сар тÿналме кечым шарнен.

Директор, туныктышо да чолга ончылъеҥым шарнен, Звенигово районысо Какшамарийыште Федор Осиповлан увер стендым почыныт. Тудо Слободской олаште шочын. Озаҥысе гимназийым, вара университетым йошкар диплом дене тунем пытарен. 1922-1937 ийлаште Какшамарий школын директоржо лийын. Вуйлатыме жапыштыже у школым чоҥеныт, а кызыт тудын олмышто стендым почыныт. Тыгак школышто тунам агропедтехникум почылтын. Арам огыл тудым марий Макаренко маныныт.

Марий писатель ушемлан тений 90 ий. Тиде пагытыште ушем тÿрлö семын вашталт шоген, но тÿҥ пашаже - писатель-влак дене кылым кучаш. Поснак самырык автор-влакым куштымаште писатель ушемын надырже кугу. Тачысе кечын ушемыште 70 утла еҥ шотлалтеш. Пытартыш 14 ий Марий Элысе Писатель ушемым Светлана Архипова вуйлата. Кызыт ушемын лÿмгечыжлан пöлеклалтше литератур конкурс эрта. Кумылан-влак тушко ушнен кертыт.