Марий Элысе медиа-влак кугу мероприятийлан ямдылалтыт. 17 да 18 апрельыште Москошто ВДНХ-ште медиакече лиеш. МЭТР телеканалын коллективше, районласе газетын тӱҥ редакторышт, «Марий Эл» увер агенстве да «Марий книга издательстве» савыктыш пӧрт уна-влаклан поян программым ямдылат. Таче ме «Марий Эл» газетын тӱҥ редакторжо Светлана Пехметова дене мутланена.

Ялозанлык науко кандидат Любовь Кудряшова вондерым кеҥежлан ямдылыме нерген.

25 гыч 29 март йотке «Авангард» рӱдерыште Марий Элысе сарзе патриот ушем-влакын слётышт эрта. Тудын тӱҥ шонымашыже - самырык-влакым патриот шӱлышлан кумылаҥдаш, сарзе службылан ямдылаш, спортын военно-прикладной виктышыж дене палдараш, таза илыш кучышым шукташ. Слёт кумшо ий тунемше-влакым чумыра.

Самырык педагог-влак артист рольышто. Театрын тӱнямбал кечыжым туныктышо-влак «Играем классику» лӱман кугу республикысе фестиваль дене палемденыт.

Кугу реконструкций мучашлалтеш. Пӱнчер отышто верланыше шоҥгыеҥ да инвалид-влаклан интернат пӧрт тӱрыс вашталтын. Тыште пӧлем, коридор, холл, кочмывер, медицине блок – чылажамат уэмденыт. Социал тӧнежыште илалаше-влакын илыме условийышт палынак саемын.

Шагал ма, шуко – 40 ий. Станислав Элембаевын лӱмжым нумалше «Марий кундем» калык семӱзгар кугыжаныш оркестр тений шке лӱмгечыжым палемда. Тиде жапыште оркестр тӱжем дене концертым эртарен. Коллективын участникше-влак шукертак йӧратыме артистыш савырненыт. «Марий кундем» калык семӱзгар оркестрын лӱмгечыжлан пӧлеклалтше пайрем концерт филармонийын сценыштыже 29 мартыште лиеш. Кугыжаныш оркестр нерген кумданрак сюжетыштына палдарена.

«Профессионалы» Российысе чемпионатын регионысо этапше умбакыже кая. Профессионал мастарлык конкурсыш 385 самырык еҥ ушнен. Таҥасымаш кундемнан 14 кыдалаш туныктымо тӧнежыште эрта. Чемпионатышке ик эн йодмашан да кӱлешан 53 специальностьым луктыныт. Нунын коклаште «Ялозанлык техникын эксплуатацийже».

Марий Эл Российын тӱрлӧ кундемлаж гыч марий ончылъеҥ-влакым вашлияш ямдылалтеш. Марий мер каҥаш Президиумын шошо сессийже лишемеш. Икымше тыгай погынымаш рӱдолаште 2021 ий апрельыште лийын. Тудо «Еш, йылме да туныктымаш» теме дене эртен. Тыгак Марий Форум Марий Юмыйӱла, Самырык тукым да тӱвыра теме-влаклан пӧлеклалтын ыле. Тиде гана Марий Форум 12-шо марий погынлан ямдылалтмылан пӧлеклалтеш. Тиде кечынак Мер Каҥашын Пленумжо эртаралтеш. Тушко Марий-влакын тӱшкан илыме регионлаж гыч мер пашаеҥ-влак ушнат.

Воспитатель ден туныктышо-влак профессионал мастарлыкым шуарыше конкурслан ямдылалтыт. Лишыл жапыште нуно «Идалыкын туныктышыжо», «Идалыкын воспитательже» да «Марий йылмым эн сай туныктышо» лӱм верч таҥасаш тӱҥалыт. Конкурс апрельыште лиеш да икмыняр этап дене эрта. Тушко районышто сеҥыше-влак ушнат. Морко районын чапшым 2 туныктышо да 1 воспитатель арала. Кызыт ме «Идалыкын туныктышыжо» конкурсын районысо этапыште ойыртемалтше Надежда Степанова дене мутланена. Тудо Морко 2-шо номеран школышто математикым туныкта.

Марий кундемын лӱмлӧ еҥже-влак посна савыктышыште. Марий Элысе тӱвыран сулло пашаеҥже, Александр Суриков лӱмеш Марий Эл Республикысе Кугыжаныш премийын лауреатше Мария Матукован «Кундемнан шӧтньӧ поянлыкше» книгаже лектын. Автор ты книгаш Марий кундемым чапландарыше еҥ-влакын илышышт да усталык корнышт нерген очерк-влакым чумырен. Сылнымут классик Сергей Чавайнын, икымше марий режиссёр Алексей Маюк-Егоровын, театр артист-влак Георгий Пушкинын, Нина Конакован, Анастасия Страусован, сӱретче Иван Ямбердовын да ятыр моло уста айдемын илышыж нерген увер пурталтын.