35 ий тӱрлӧ тӱс дене волгалтыт. Оршанке районысо Кугунур кыдалаш школ пеленсе «Шонанпыл» йоча образцовый ансамбльлан 35 ий. Ты амал дене тунемше-влак кугу пайрем концертым ямдылат.

Марий паркыште тыйын лӱмет. Йошкар-Олаште тыгай лӱман акций увертаралтын. «Шындер шырчык» клуб тунемше-влакым шырчык омартам шке кид дене ышташ ӱжеш. Ончыкыжым нуным Марий паркыш вераҥдат.

Шошо - кече еда вийым налеш. Каныш кечылаште да вес арнян икымше пелыштыже кечывалым южын кокла температурыжо 7 градус наре леве лийшаш. Лум утларак шула. Марий-влак шошын могай вий дене эртымыжым калык палым ончен, шекланеныт. 14 мартыште - Одоким кече.

Йӱдым юалге, кечывалым леве. Эҥер ден ерыште ий шулаш тӱҥалын. Марий Элысе МЧС-ыште изи куатан пуш-влак шотышто кугыжаныш инспекцийын пашаеҥышт ий кӱжгытым тергат. Тыгак колызо-влаклан лаштыкым пуэдат. Йошкар-Олаште, мутлан, ик эн лӱдышкӧ вер - Ширяйково микрорайонышто рӱдӧ каныме пляж кумдык. Тыгак специалист-влак шошым чӱчыкыдын Вознесенский черке шеҥгелне улшо кумдыкым тергат. Тыгай мероприятийым нуно кажне ийын икмыняр гана шуктат.

Кечывал деч ончыч - туныктымо тӧнеж, кечывал деч вара – сайлыме участке. Российыште ик эн тӱҥ сайлымашым эртараш школ-влакат полшат. Тидлан южо школлаште актовый але спортзалым лӱмын келыштареныт. Республикысе туныктымо тӧнежлаште 15, 16 да 17 мартыште сайлымаш комиссий пашам ышта. Тиде жаплан урок-влак ешартыш шинчымашым пуышо тӧнежыш куснен але уремыште эртаралтын кертыт. Икманаш, школлаште туныктымо пашаш вашталтыш пурталтеш.

Физрук ончычсо лийын ок керт. Российын сулло туныктышыжо Евгений Марков тидым шке примерже ден пеҥгыдемда. Шке 70 ийыштыже спортсмен чолга да таза илыш кучыш дене ила: зарядкым ышта, куржталеш, ече дене коштеш. Сулен налме канышыш лекмек, спортын кӱлешлыкшым поснак чот шижын. Уло илышыжым спорт дене кылдыше айдеме нерген мемнан сюжетна.

Таза илыш-кучыш верч. Тыгай шонымаш дене Марий Элысе «Сокыр-влак спорт федераций» черетан проект дене пашам тӱҥалеш. «Навстречу к здоровью» лӱман проект идалык тӱҥалтыште грантым сеҥен. Тудын кышкарыште участник-влакым кумда программе вуча. Мутым умбакыже Эльвира Петрова шуя.

Ӱярня йӱла дене палдареныт. «ЭтноПоколение» усталык лабораторийыште еш унагудо эртен. Погынымаш идалыкын ик эн тамле арняжлан – ӱярнялан пӧлеклалтын. «Еш дене пырля» проектын участникше-влак ты пайрем дене кылдылтше йӱла, илыш-кучыш, модмаш да мелна рецепт дене палдареныт. Рыбаковмыт еш, мутлан, кече гай йыргешке тамле сийым коҥгаште кӱэштыт. Адакшым пайремым уло еш дене пырля вашлияш тыршат да кажне ийын ӱярня лӱмеш курык гыч мунчалташ лектыт.

Калык ончыко лектын, чын кутырынет да аудиторийын тӱткышыжым налнет? Тугеже курсышко возалт. Лишыл жапыште «Калык ончылно чын кутыраш тунемына» курсын кокымшо тургымжо тӱҥалеш. Тудым ӱмашсе семынак В. Васильев лӱмеш марий шанче-шымлыше институтын пашаеҥже, филологий науко доктор, профессор Любовь Абукаева вӱда. Икымше тургым сай лектышым ончыктен, сандене курсын кокымшо тургымжым эртараш палемденыт.

Мыскара фестиваль уэш эн чолга-влакым вуча. «Кугарня» газет редакций «Воштылаш, товатат, сулык огыл!» йӱлаш пурышо мыскара фестиваль-конкурсым тений 29 гана эртара. Тудо 31-ше мартыште М. Шкетан лӱмеш кугыжаныш драме театрыште лиеш. Тиддеч ончыч Марий тӱвыра рӱдер да газет редакций районлаште ойырымо этапым эртарат: 22-шо мартыште Советский тӱвыра полатыште, 24-ше мартыште Волжский районысо Приволжский посёлкышто.