Марий йӱла: Руководитель «Центра марийской вышивки» Ираида Степанова: 2024 год - год мужского марийского костюма.

Марий йылмым да сылнымутым йӧратыше-влак шинчымашыштым тергеныт. Йошкар-Олаште марий йылме, литератур да Марий Элысе калык-влакын историйышт да тӱвырашт предметла дене республик кӱкшытан олимпиаде эртен. Тушко муниципальный тапырыште ойыртемалтше ӱдыр ден рвезе-влак ушненыт.

Республикыштына 22 гыч 26 январь марте «Студенческий десант» Россий кӱкшытан акций эртен. Тудо студент кечылан пӧлеклалтын. МВД-ын пашаеҥже да общественный советын еҥже-влак тунемше да студент-влаклан кумда мероприятийым эртареныт. Кумданрак – материалыште.

Шке пӧртым чоҥаш окса полыш. Йошкар-Оласе мэрийыште самырык еш-влаклан социал выплатылан сертификатым кучыктеныт. Илымвер программе дене сертификатым кум еш налын.

Талешке-влакым шарнен. Оршанке районысо Марково тӱҥ школышто специальный сарзе операцийын участникше, изирак сержант Владимир Винокуровлан мемориал оҥам почыныт. Ты кундемынак шочшыжо подполковник Олег Сморкаловын аважлан «Патырлык орденын» удостоверенийжым кучыктеныт. Мероприятий сарзе-патриот тылзе кышкарыште лийын. Марково школышко мемнан съемочный группынат миен.

25 январь – Студент-влакын але православий почеш – шнуй великомученица Татьянан кечыже. Тиде кечын студент да Татьяна лӱман чыла ӱдыр ден ӱдырамаш-влакым саламлат. Мемнан съемочный группына ты лӱмым нумалше ӱдыр-влак дене вашлийын. Тендан денат нуным палдарена.

«Чытен. Кредалын. Сеҥен!» Чавайн лӱмеш калыкле книгагудышто Лениградым блокаде гыч утарымылан 80 ий темме лӱмеш ончер почылтын. Выставкыште блокадный олаште илыш, сарзе операцийын схемыже, тушто лийше еҥ-влакын шарнымашышт ончыкталтын.

Российысе студент отряд-влакын чолга еҥышт телымсе целина гыч пӧртылыныт. Ӱдыр-рвезе-влак кок арня наре проводникын сомылжым шуктеныт. У ий каныш кечылаште калыклан корнышто йӧнан лийже манын – кӱлынак тыршеныт. Мурманск, Новороссийск, Кисловодск – тӱрлӧ олаште лийын шуктеныт.

Марий калыкын йӱлаж дене палдарат. Амалкалче, туризм да марий тӱвыра дене специалист Наталья Шабалина «Йӱла» лӱман проект дене пашам тӱҥалын. Проект Росмолодежьын грантшым сеҥен. Тудын кышкарыште республикысе школлаште тунемше йоча да студент-влак шке илыме верысе тӱвыра дене утларак палыме лийыт.

Социал учреждений-влакын автопаркыштым пойдареныт. Кодшо ийын республикысе бюджет гыч тидлан 50 миллион теҥге ойыралтын. Тиде окса дене 25 единице техникым налыныт. Ты радамыште социал полыш рӱдер-влаклан 17 автомашина, калыклан социал полышым пуышо комплексный рӱдерлан 2 транспорт. Транспортым Люльпан йоча пӧртлан, Октябрьский да «Журавушка» рӱдарлан, Волжск оласе, Морко социал реабилитаций рӱдер-влаклан пуэныт.