«Режиссёрын пьесым ойырымо годым, произведений тудын чонжым тарватышыш, тунам гына спектакльллан ойырен налаш лиеш»,- палемда уста, лӱмло режиссёр Василий Пектеев. 23 январьыште тудлан 70 ий темын. М.Шкетан лумеш Марий Кугыжаныш драме театрыште тудын лӱмгечыжлан пӧлеклалтше фестиваль тӱналтышым налеш. Марий Эл искусствын сулло деятельже дене мемнан съемочный группына вашлийын.
Ончерым мультимедийный гид полшымо дене ончаш лиеш. Т. Евсеев лӱмеш калыкле тоштер «Тот самый музей» экспозицийлан мультимедий приложенийым ыштен. Марий кундемыште илыше янлыкын 36 экспозицийже нерген кӱлеш уверым «Артефакт» платформышто пален налаш лиеш. Кузе ты ончер пашам ышта, тоштерын пашаеҥышт каласкалат.
«Правда хорошо, а счастье лучше». Тыге маналтеш А. Островскийын пьесыже да Марий самырык театрын премьерыже. Сюжет линий йӧратымаш йыр пордеш. Амос Панфиловичын суртыштыжо тудо верым муэш мо? Вашмут сюжетыште.
Туныктыш аланыште тыршыше специалист-влакым саламленыт. Воспитатель, туныктышо, тренер, ешартыш шинчымашым пуышо педагог-влак Сеҥымашын 30-шо идалыкше лӱмеш тӱвыра полатыште чумыргеныт. Туныктышо да наставникын идалыкшым иктешленыт. Туныктымо аланыште кугу кӱкшытыш шушо специалист-влакым саламленыт. Пайрем мероприятийыште республик вуйлатыше Юрий Зайцев лийын. Сулло лӱм, виктерын чапкагазше, таумут дене 21 еҥым палемденыт.
У идалыкым у шонымаш да у сеҥымаш дене. 2023 ий мучаште тӱвыра инициативе шотышто президент фонд 2024 ийлан икымше конкурсым иктешлен. Российын 85 регионжо гыч 883 проект сеҥышыш лектын. Нунын кокла гыч 2-шо - Марий Эл гыч. Тӱвыра поянлыкым аралыше регионысо мер ушем «Народы России – единством сильны!» проект дене сеҥен. Проект Запорожский областьыште илыше-влакым марий кундемын историйже, илыш-йӱлаже дене палдараш виктаралтын. Вес проект - Республикысе калык усталык рӱдер пеленсе «Марий Элысе усталык пашаеҥ-влакын ушемышт».
Юл кундем федерал округысо регион-влакын эн сай постановкыжым ойырат. Эртыше идалык мучаште «Театральное Приволжье» фестивальын регионысо тапыржым иктешлен, кызыт жюри округысо этапыш лекше паша-влакым онча, 14 регион гыч 28 спектакльым аклат. Фестивальым мартыште иктешлат да тунамак сеҥыше спектакль дене палдарат. Округысо этапыш Марий Эл гыч могай коллектив лектын? Нуно могай постановкым луктыныт? Вашмут сюжетыште.
Поро шонымаш да полшаш ямде улмо кумыл нуным иктыш ушен. Медведево районысо Руш Кукмарий ялыште илыше-влак сарзе операцийыште улшо салтак-шамычлан шокшо вургемым ямдылат. Носким да пижым пидыт, ӱштым ыштат. Тиде пашашке чумыр ял дене ушненыт. Кажныже вий да йӧн лийме семын полша.
Шке моштымашым тунемше-влаклан ончыкташ. Шукерте огыл Россий Федерацийын сулло сӱретчыже Сергей Алдушкин шке усталыкше дене палдарыше мастарлык классым эртарен. Вашлиймаш Калыкле сымыктыш гимназийыште да Республикысе сӱретсымыктыш тоштерыште эртен.
Шабдаровмыт еш – «На все руки мастер» да «Семейное шоу талантов» конкурсын сеҥышыже. Москошто эртыше «Родные -Любимые» форумышто Марий Элын чапшым Шернур район гыч Шабдаровмыт еш арален. Марий еш тыгак «Знатоки Родины» конкурсышто ончышын симпатий призшым сулен. Марий тывырдык жюрин кумылжым савырен.
Сарзе патриот тылзым почмо кечын, 23 январьыште ДОСАФЫМ ыштыме кече. 2024 ийыште Марий кундемыште ДОСААФ-лан 97 ий. Тачысе кечын тиде ушем патриот шижмашым вияҥдаш ятыр мероприятийым да пашам шукта, самырык-влакым уша. Таче ме ДОСААФ-н Марий кундемысе отделенийжын вуйлатышыже Вячеслав Тихонов дене мутланена.
