Тиде ийын Курыкмарий да Куженер районлаште эксплуатацийыш чылаже 3 газпучым пурташ палемдыме. Марий Элым вуйлатыше Александр Евстифеев кундемын газификацийже шотышто погынымашым эртарен. Республикын йӧнозанлык, экономикым вияҥдымаш да сатулымаш шотышто министр Станислав Крылов «2019-2023 ийлаште марий элыште газификаций да газ пучым пуртымаш» программын пашаже нерген каласкален.
28 июль эрлан 19 еҥын коронавирус пеҥгыдемдалтын. Суткаште республикысе стационарла гыч 85 пациентым луктыныт. Тачысе кечылан Йошкар-Оласе эмлымверыште 151 пациент пневмоний деч эмлалтеш. Коронавирус инфекций дене – 114 еҥ кия.
2019 ийыште эртарыме йӱклымаш деч вара, Йошкар-Олаште илыше-влакын темлымышт почеш общественный кумдыкым тӱзатыме паша умбакыже шуйна. «Жилье и городская среда» национал проектыш пурышо «Формирование комфортной городской среды» лӱман федерал проект почеш республикын рӱдолаштыже Ю.М.Свирин лӱмеш скверым да йолешке-влаклан 10 вончыкым олмыкташ палемдыме. Рӱдолан МЭРИжын палдарымыж почеш, кызытсе жаплан ямдылалтме паша кая.
28 июль – гепатит вашатареш кучедалме тӱнямбал кече. 2020 ийын икымше пелыштыже Марий Элыште 12 еҥын гепатит вирус пеҥгыдемдалтын. Нунын кокла гыч 10 – А гепатит да 2 – С. Кодшо ий дене таҥастарымаште, тиде 9 утла процентлан шукырак, а пытартыш икмыняр ийым пырля ончалаш гын, 20%лан шагалрак.
Марий Элыште санитар авиаций йӱдшо-кечыже пашам ышташ тӱналеш. Тений, 1 декабрь марте, Марий Элын рӱдолаштыже «Первичный медико-санитар полышым вияҥдымаш» проект почеш вертолет шичме площадкым ышташ палемдыме. Тидлан Йошкар-Оласе эмлымвер деч тораштак огыл кумдыкым ойырымо.
Тачысе кечылан пудий пижме дене республик мучко эмлымверыш чылажге 838 еҥ миен. Тиде, ӱмашсе дене таҥастарымаште, 25 утла процентлан шагалрак. Нунын коклаште 14 ияш деч изирак ийготан йоча-влакат улыт. 20 гыч 26 июль марте 17 еҥ деке пуди пурен.
Марий Элыште тӱнямбал шахматын кечыжлан пӧлеклалтше онлайн формат дене турнир эртен. Мероприятийыште Российын тӱрлӧ верлаж гыч да тыгак йот эл гыч чылаже 59 еҥ ушнен. Марий Элысе спорт мастерын кандидатше Максим Волков икымше тат гычак шкем чолган ончыктен.
Кодшо кечылаште Мари-Турек районысо Сенде ялыште у мемориалым почыныт. Тудым шочмо верын Кугу Ачамланде сарын салтакше-влак, тылыште тыршыше, тыгак Афганистаныште да Йӱдвел Кавказыште кучедалше-влак лӱмеш шындыме. Пайремлын почмо жапыште Сенде ялыште илыше-влак шке геройыштым шарналтеныт, мемориал деке пеледышым пыштеныт. Мемориалым чоҥышо-влак кокла гыч эн талыжым палемденыт, да, мутат уке, кумылан-влакым салтак пучымыш дене сийленыт.
«Малые лестницы Козьмодемьянска» проект пашам кеҥеж мучаш марте мучашлышаш улыт. Ушештарена, тушто Марий Элысе муниципал образований кумдыкым шуарыме программым илышыш шыҥдарыме шотышто, 5 вере пу гыч тошкалтышым ыштат.
Марий Элыште илыше самырык-влак «Волга-IT20» лӱман цифр олимпиадыште шкенжым терген кертыт. 13 сентябрь марте онлайн йӧн дене тудын ойырымо этапше эрташ тӱҥалеш. Ты мероприятийыш Российын тӱрлӧ верлаж гыч школышто тунемше да студент-влак ушнен кертыт.
