Лишыл жапыште республикыште илыше-влак сайлымаш участкыште веле огыл, тыгак дистанционно йӱклен кертыт. Икмыняр регионышто удаленно йӱклымӧ шотышто тестирований тӱҥалын. Нунын радамыште Марий Эл. Мемнан республикыште тестированийышке 18 тӱжем наре еҥ ушна. Россий кӱкшытан тестирований жапыште йӱклымашын чыла этапшым эртарат: участник-влакын регистраций гыч тӱҥалын, йӱкым шотлымо марте. 

Советский районысо Кельмаксола ялыште илыше-влак «Сад памяти» тӱнямбал акцийыш ушнен, пӱнчӧ ден куэ-влакым шынденыт. Акцийыш ялыште илыше кузе кугыен, тыгак йоча-влак кумылын ушненыт. 

Йоча-влакын кеҥеж канышыштлан ямдылалтыт. Тений Марий Элыште кеҥеж каныш жапыште  йоча-влакым 184 организацийыште вашлийыт, тушто 16 тӱжем утла икшыве тазалыкшым пенгыдемдышаш. Ончычсо семынак профильный лагерь-влак пашам ышташ тӱҥалыт. 

Марий Элыште 50 тӱжем наре еҥ коронавирус дечын прививкым шынден. 12 майлан 49 тӱжемат 629 еҥ КОВИД дечын вакцинацийым эртен, 37 тӱжем утла еҥ препаратын кок компонентшымат шынден. Регионышко чылаже 62 тӱжем дозо вакциным конденыт. Тачысе кечын республикысе 19 медицин оргнизацийлаште прививкым шындаш 110 пункт уло, тыгак организацийлаште мобильный пункт-влак пашам ыштат. 

Йошкар-Олаште Озаҥ оласе школышто лӱйкалымаш дечын вара йот элласе самырык еҥ-влак дене профилактике шотан мутланымашым эртареныт. МВД-н миграций пӧлкан специалистше-влак экстремизм да терроризмлан мо шотлалтеш, да тидлан могай муткучыш лиеш, умылтареныт. Тидын дене пырля террористический да экстремистский, тыгак йÿла-влак кокласе ужмышудымаш койышым ылыжтымылан уголовный ответственность нерген ушештареныт. 

«Талешке корно» декаде  8 мероприятийым ушен. Марий тӱвыра рӱдер талешке кече да сеҥымаш кече лӱмеш икмыняр вашлиямаш, концерт, акцийым эртарен. 9 майыште Чарла Кремльыште «Тау тыланет, салтак» патриот акций лийын. Тушко Я.Эшпай лӱмеш марий филармоний, М.Шкетан лӱмеш марий театрын актержо-влак , тыгак «Падраш» йоча фольклор коллектив ушненыт. «Талешке корно» декаде жапыште «Ший талешке» конференций, Талешке сорта акций, тыгак «Марий патыр» конкурс, «Сеҥымашлан мурпӧлек» онлайн-концерт, «Мый марла ойлем» акций лийыныт. 

Республикысе тӱвыра, печать да калык-влакын пашашт шотышто министерстве у зданийышке куснен. Ведомство Йошкар-Олаште Вознесенский урем, 51 адрес дене верлана. Регионысо тӱвыра министерствын  у оралтышке куснымо йодыш шукертак лийын, Кремлевский уремысе зданийым 1970 ийыште Марфильмфонд зданийлан пристрой шотеш чоҥымо улмаш. У оралтыште 2 тӱжем утла квадарт метр, сотрудник-влакын кабинетышт, тыгак каҥашымашым, конференцийым, выставкым   эртараш келыштарыме зал. 

Республикысе эмлымверлашке пудий пижме шотышто 70 утла еҥ полышым йодын толын. Шымлыме чыла пудий гыч пелыже бореллиоз черан лийыныт. Май кыдал гыч июнь тӱҥалтыш марте нунын эн чот талешныме жапышт.

Козьмодемьянскыште школ-интернатын зданийжым тӧрлат. Кеҥеж мучаш марте тазалык дене эмганен вияҥше йоча-влаклан тӧнежым шотышко кондат. Пашам эртараш аукционым «Кугыжаныш закупко» сайтыште вераҥденыт. Документаций дене келшышын, пашалан 14 миллион теҥге ойыралтеш. Тиде окса дене подрядчик школ корпуслаште леведышым вашталта, фасадым уэмда, тыгак спортзалын пырдыжшым шокшемда, окна да кӱварым шотышко конда. Контракт дене пашам 18 август марте мучашлышаш улыт. Ушештарена, кодшо ийын школ интернатлан «Образований» нацпроектын «Современная школа» проект дене келшышын оборудованийым налыныт. Учрежденийыште ургымо, столяр, йолчиемым ачалыше мастерскойым уэмденыт. 

Республикыште кодшо ийын 190 ешыште визымше але кудымшо йоча шочын. Маристат тыгай данный дене палдара. 2020 ийыште марий кундемыште 6642 йоча шочын, ӱдыр да эрге йоча-влак иктӧр лийыныт. 2442 ешыште кокымшо йочам ыштеныт, 1443 еш кумшым.