Игече тений шке вашталтышыжым пуртен гынат, мланде пашаеҥ-влак тидлан кӱлынак ямдылалтыныт:  пырчым , техникым жапыштыже ямдыленыт. Республикысе чыла гаяк озанлык сай нӧшмым мландышке ӱда. Машина-трактор парк 144 единице у техникылан пойдаралтын, тидлан 366 миллион теҥге ойыралтын, тыгак тений озанлыклашке пырчым погышо 5 у комбайным налыныт. Пашаеҥ-влак 5 тӱжем утла гектар мландым икияшлан ямдыленыт. Кызыт  озанлык-влак шудо пасулам тырмалат, да икияшым ӱдат. 

Параньга районышто тӱвыра пашаеҥ-влаклан шуко функциян куснылшо рӱдер полшаш тӱҥалеш. «Автоклубым» «Культура» нацпроект дене келшышын «Культурная среда» регионысо проект почеш налыныт. Транспорт средство куштылгын концерт площадкышке савырна, тушто тул, йӱк да видеооборудований уло. Тиде культур рӱдер тора яллаште тӱвыра мерориятий-влакым эртараш  тӱҥалеш. Тыгак тудым ял пайрем, кугыжаныш пайрем, ярминга годым кучылташ шонат. Идалык мучаш марте тыгай автоклубым эше куд районлан налыт. Тӱрлӧ бюджетла гыч 33 миллион теҥге ойыралтеш. 

«Марий памаш» калык лӱман фольклор этнографий ансамбль любительский коллектив-влакын российысе фестиваль-конкурсышто лауреат лийын. Тудо «Культура» национальный проект дене келшышын эртаралтеш. Конкурсын ойырымо этапше дечын вара жюри 20 лауреатым ойырен, нунылан шке усталык пашаштым вияҥдаш 2 миллион тенге грантым пуат. Фестивальышке йодмашым 84 регион гыч 200 утла коллектив пуэн. Лауреат-влак декабрь тылзыште Москваште лийшаш гала-концертыште усталыкштым ончыкташаш улыт. Ушештарена, «Марий Памаш» ансамбльым Марий Эл тӱвыран сулло пашаеҥже Мария Соловьева вуйлата.

Республикыште илыше-влак икте весыштлан Сеҥымаш кечылан онлайн-открыткым колтен кертыт. Тыгай йӧным Москвасе Сеҥымаш Тоштер темла. Тоштерын сайтыштыже открытке-влакын виртуальный выставкыже уло. Тушко «Открытка Победы» конкурсын участникше-влакын пашаштым ужаш лиеш.  Марий Эл гычат сӱретче-влак тиде пашашке ушненыт. 9 май марте интернет дене пайдаланыше-влак келшыше открытка -влак верч йӱклен кертыт. Конкурсым 12 майыште иктешлат, ойыртемалтше сӱрет-влакым кагаз открыткышке вераҥдат.

Марий Элыште лишыл кум ийыште очистной сооруженийын кандаш объектшым чоҥат але тӧрлат. «Экологий» национальный проект дене келшышын, тидлан 2 миллиард тенге палемдалтеш.

Кодшо ийын республикыште 4 объектым чоҥен шуктеныт: Марий Турек, Оршанка район да Козьмодемьянскыште. Кызыт рӱдӧ олаште очистной сооружений-влакым уэмдат. Республикыште улшо кугу предприятий-Марбумкомбинат очисной сооруженийым вияҥдаш шке оксажым пышта, предприятий у технологий дене келшышын биологический сооруженийым ышта.   

Туныктыш да шанче министерстве 2021 ийлан планым ыштен да ведомствын 2020 ийысе пашажым иктешлен. Кодшо ийын ныл йодчасадым чоҥеныт, тений эше нылытым сдатлышаш улыт. У школ-влак Йошкар-Ола да Волжскышто почылтыныт,  Медведево район Киров уремыште школым негызлыме. Тений Марий Турек районысо Сардаялыште тунемме верым чоҥен шуктат, республикыште «Точка роста» лӱман 21 рӱдерым почшаш улыт, Бауман лицей пелен «Кварториум» йоча технопаркым ышташ палемдат. 57 школ да 5 техникумлан у компьютер оборудованийым налыт, школ-влакын материально технический базыштым пойдарыме да у автобусым налме паша шуйна. 

Волжский, Медведево, Морко, Шернур районлаште пашам тӱҥалыныт, республикыште 971 гектарыште куралын тырмаленыт, а 526 гектарыште пырчым ӱденыт. Тений икяшым кундемыште 152 тӱжем гектар кумдыкышто ӱдышаш улыт, кодшо ий дене таҥастарымаште 50 тӱжем гектарлан шукырак, пакчасаскам 3 тӱжем гектарыште, пареҥгым 12 тӱжем гектарыште шындаш палемдат. Кызыт кокияшым ӱяҥдат, шудым тырмалат  да нӧшмым ямдылат. Йӱран да йӱалге игече озанлык пашаеҥ-влаклан чаракым ышта. 

Регионышто чоҥымаш отрасль ончылно улшо задаче-влак нерген правительстве коллегийын заседанийыштыже ойленыт. Тудым Александр Евстифеев эртарен. Регион вуйлатыше   Президентын Федеральный Собранийлан ойлымо посланийже дене тезис-влакым ушештарен, нунын радамыште  чоҥымаш отрасльын вияҥмашыже.  Кундемыште отрасльын реформированийже кая: капитально чоҥымаш шотышто виктем ышталтын. Владимир Путин Российыште 1300 чоҥымо школ нерген ойлен, тиде радамыште Йошкар-Ола, Козьмодемьянск олаласе да Медведево поселкысо школ-влак. План дене тыгак яллаште тӱвыра пӧрт да тоштер-влакым тӧрлаш. Республике виктер вуйлатышын икымше алмаштышыже Александр Сальников ешарен: Россий Правительстве регион-влаклан кугыжаныш парымым петыраш окса полышым ойыра. Республикын кугыжаныш парымже 11 миллиард теҥге, тиде Юл кундемысе федерал округышто эн изи парым. 

Волжск олаште онкологий полышым пуышо амбулаторный рӱдер почылтын. «Здравоохранений» национальный проект дене келшышын, 2021 ий марте Марий Элыште тыгайже кумыт лийшаш: кеҥежым Козьмодемьянскыште, а шыжым Шернурышто рӱдер-влакым почшаш улыт. Нуно онкологий черым тӱҥалтыш стадийыште палаш полшаш тӱҥалыт. Пытартыш жапыште республикыште онкологий чер шукемеш, чыла пуалмаш гыч 18% – коваште рак, 8% – шӧр ту рак, пӧръеҥ-влакын эн шуко шодо рак вашлиялтеш. 

Латикымше классым пытарыше-влак иктешлыше кугыжаныш экзаменлан ямдылатыт. Тений тудо 31 майыште тӱҥалеш да 2 июль марте шуйна. Республикыште ЕГЭ-м 2800 наре ӱдыр-рвезе возышаш. Тений икымше гана информатике дене экзамен компьютерный форматыште эрта. Тидын вашеш чыла пунктлаште тиде экзаменын апробацийже лийын. Информатике дене экзаменым 13 пунктышто возаш тӱҥалыт. Ӱдыр ден рвезе-влак технике дене пашам кузе ышташ, организатор-влак у йӧнлан ямде улмым пален налмым тергеныт.  Ий гыч ийышке информатике дене ЕГЭ-м ойырышо-влак шукемыт, кодшо ийын 180 еҥ экзаменым возен гын, тений 320 еҥ регистрацийым эртен. Инфоматике дене экзамен 24, 25 июньышто эртышаш.