Йошкар-Олаште пляж-влакым тений 1 июнь гыч почыт. Тидын вашеш йӱштылаш келыштарыме вер-влакым ямдылат. Оласе администраций палдара: тений «Южный» пляж, вантовый кӱвар тураште Изи Какшан серыште, тыгак Нолька воктене канаш вер лийыт. Пляж тургымым почмо вашеш тушто инфраструктурым саемдат, тыгак аварийно-утарыше службо да водолаз-влак эҥерым тергат.
29 майыште рӱдӧ олашке "Самара-Йошкар-Ола" маршрут дене поезд турист-влакым конда, тиде гана составышке Пенза гыч вагон-влакым келыштарат. Тидын нерген россий кӱртньыгорнышто палдарат. Пенза вокзал гыч турист-влак 28 майыште тарванат да Йошкар-Олашке вес кечын эрдене толын шуыт. Ик кечыште нуно рӱдӧ ола дене палыме лийыт, Шкетан лÿмеш театр, тӱссымыктыш галерей, марий семӱзгар-влакын ойыртемыштым мастарлык классыште пален налыт, марий кочкышым тамлат. Ушештарена, шошым Самара ола гыч 700 утла турист Йошкар-Ола дене палыме лийын.
Вич тӱжем наре участник кокла гыч сеҥышыш лектыныт. Республикысе калыкле сымыктыш гимназийыште тунемше изи сӱретче-влакын пашашт йомак книгашке пурталтыныт. Икшыве-влак беларус калык йомаклан иллюстрацийым ыштеныт. Йомак книгаш чылаже 50 паша пурталтын.
Пудий энцефалитын профилактикыже нерген телефон дене умылтарат. 29 май марте Роспотребнадзорын виктемже «шокшо линийым» эртара. Тушко йыҥгыртыше-влаклан пудийын пижмыже, аралалтме, тыгак кушто пудийым тергаш лиеш, энцефалит пале могай, профилакический аралалтмаш-вакцинаций нерген умылтарат. Районлаште илыше-влак верысе пӧлкалашке йынгыртен кертыт. Роспотребнадзор виктемын шокшо линийже : 8 (8362) 68-19-44, 68-19-57
Пӱртӱс ресурс министерствын данныйже дене апрель –май тылзылаште республикыште шордо дене кылдалтше 3 корно туткар лийын. Тиде жапыште икияш шордо презе-влак авашт дечын ойырлат, тыгак чодыралаште шыҥа да вӱр йӱшӧ копшаеҥге-влак шукемыт. Тидлан кӧра, шордо-влак корнышкат лектын кертыт, поснак пычкемыш жапыште. Тидым шотышко налын, пӱртӱс ресурс министерстве автомашинам виктарыше-влаклан тӱткырак лияш темла, тыгак янлык-влак лектын кертыме верыште «шекланыза, ир янлык-влак» корно пале-влакым вераҥдаш тӱҥалыт.
Чодыра пожарым йӧрташ у технике полша. «Экологий» национальный проектын «Чодырам аралымаш» регионысо проектше дене келшышын, 2021 ийыште федерал бюджет гыч 34 миллион теҥге ойыралтын. Тиде шийвундо дене 9 единице техникым, 36 единице оборудованийым налыт. Кодшо кечылаште тракторный 3 полуприцеп-цистерным, а тылеч ончыч, вӱдлан 10 резервуарым конденыт.
Регионысо чемпионатыште сеҥыше да нунын наставникыштлан республике правительтсвын грантшым пуат. Саламлыме пайрем мероприятий Йошкар-Оласе строительный техникумышто эртен. Правительствын постановленийже дене келшышын, республикысе чемпионатыште сеҥыше-влаклан 5000 теҥге дене пуат. Тений тиде 42 самырык профессионал да 38 наставник. Ушештарена, «Самырык профессионал-влакын» индешымше гана эртаралтше чемпионатше 1 мартыште тӱҥалын, тудлан Рӱдӧ оласе, тыгак Волжск, Козьмодемьянск олала, Красный яр села да Оршанка поселкышто 12 площадкым ыштеныт. Таҥасымаш 32 компетенций дене лийын.
Тений Марий элыште регионысо ава капиталым 69 еш налын. Январь гыч апрель марте тидлан 4 миллион утларак теҥге ойыралтын. Социал вияҥмаш министерстве ушештара: тиде полышым ешыште нылымше ала варарак икшыве шочмеке, тыгак кӧн парашыже 10 тӱжемат 184 теҥге дечын шагалрак, пуат. Тачысе кечын регионысо ава капиталын кугытышто 63 тӱжемат 078 теҥге. Весымат палемдат, нылымше ала варарак шочшо икшывылан ик ий теммеке веле, ача-ава-влак регионысо ава капиталлан йодмашым возен кертыт.
«Авангард» сарзе-патриот рӱдер кеҥежлан ямде. Учрежденийын пашажым саемдаш тений 37 миллион теҥгем ойыреныт. Регионлаште сарзе-патриот рӱдер-влакын пашашт нерген селекторный совещанийыште ойленыт. Тудым кодшо кечылаште Российын обороно министрже Сергей Шойгу эртарен. Мутланымашке Александр Евстифеев ушнен. «Авангард» сарзе-патриот рӱдерым республикыште кодшо ий шыжым ончычсо «Каменная речка» санаторий олмышто ыштеныт. Мемнан республикыште тыгай рӱдерым ик эн ончыч ыштеныт. 10 гыч 17 ияш самырык-влаклан тушто школ каникул жапыште 5 кечаш сбор-влак эртаралтыт. Кодшо ий октябрь тылзе гыч 20 тыгай сборым эртареныт. Школышто тунемше, сарзе-патриот клуб да юнармеец-влак , чылаже ик тӱжем утла еҥ патриот шӱлышеш шуаралтыныт. Тений рӱдерыште препятствий полосам уэмдат да спорт дене кылым кучаш верым саемдат.
Меланомо чер дене кучедалме кече вашеш республикысе коваште-венерологий диспансер акцийым эртара. Тудо Йошкар-Олаште Патриарший площадьыште курчак театр воктене лиеш. Кодшо ийын тиде акцийышке ик тӱжем утла еҥ ушнен, коваште рак але меланомо лийын кертме дене пациент-влакым онкологий диспансерышке колтеныт. 9 гыч 12 шагат марте шочмо пале-влакым дерматоскоп аппарат дене ончат. Тудо коваште рак лийын кертме лӱдыкшым палаш полша. Акций 18 гыч 21 май марте эрта.
