«Марла-рушла кÿэмалтше ойсавыртыш мутер» - воткылыште. Кок томан у савыктышын PDF-версийжым Вконтакте соцкылысе Электрон книгагудышто вераҥдыме. Ушештарена, тиде поян саска ош тÿням шукерте огыл ужын, Марий Эл Республикын 100 ияш лÿмгечыжлан пöлеклалтше программе почеш савыкталтын. Кÿэмалтше ойсавыртыш мутер кок том дене печатлалтын. Ик могырым уникальный да вес могырым оҥай да ойыртемалтше савыктыш поян материалым арала. Тудым чумырымаште уста шанчыеҥ-влак Людмила Барцева, Елена Андриянова, Надежда Краснова, Галина Эрцикова кыртмен пашам ыштеныт. Мутер дене филолог, писатель, журналист, кусарыше, туныктышо, студент, марий йылме да тÿвырам тунемше кажне кумылан еҥ пайдаланен кертеш. 

Козьмодемьянск эшеат моторрак да лÿдыкшыдымырак лиеш. Лишыл жапыште тушто икмыняр вере 15 видеокамерым вераҥдат. Кызыт олаште «Формирование комфортной городской среды» федерал проект дене келшышын, Космонавт-влакын бульварыштым да Ош пöрт воктенсе кумдыкым тöрлат. 

Марий Элысе кӱсото-влакын чекыштым палемдаш. Нунын нерген тичмаш уверым погаш да шнуй вер-влаклан йомаш пуаш огыл. Лач тыгай шонымаш дене икмыняр ий почела Т.Евсеев лӱмеш Калыкле тоштерын шанчыеҥже, Юл кундемысе технологий университетын туныктышыжо да кадастр рӱдерын специалистышт Марий Элысе кÿсото-влакым шымлат. Тиде пашам теният шукташ ямдылалтыт. 

Марий артист-влак «Лебединое озеро» балетым Шереметев замокышто ончыктат. 17 июльышто Эрик Сапаев лӱмеш опер да балет театр тиде постановкым Юринышто ончыкта. Икымше гана тиде балетым Большой Театр эше 1877 ийыште 20 февральыште шынден. Сюжет шукыштлан палыме. Марий кундемысе театр труппо балетым икымше гана 2014 ийыште сценышке луктын, а 2015 ийыште тудым уремыште ончыктеныт. Тунам тудым 1 тӱжемат 500 утла еҥ аклен. 

Йошкар-Олаште исправительный рӱдерын кокымшо участкыже почылтын. Тачысе кече марте Медведево поселкышто 3-шо номеран исправительный колоний пелен 56 еҥлан пашам темлыше рӱдер лийын. 

Шукерте огыл 7-ше номеран колоний-поселений пелен 25 еҥлан келаштаралтше исправительный рӱдер почылтын.  Тышке судын кӱштымашыже почеш колтымо еҥ-влак Йошкар-Ола да Звенигово районышто пашам ыштат. Кызыт тыште Пермский край, Московский область, Мордовий, Башкортостан, Чуваший, шукынжо Марий Эл гыч улыт. Южгунам эрык дечын кодымо олмеш суд принудительный пашашке колта.  Тышке колтымо еҥ-влакын срокышт кугу огыл, эн шукыжо ныл ий. Осуждённый-влак исправительный рӱдер кумдыкышто илат.

Марий Турекыште  «Комфортная городская среда» проект дене келшышын поселкысо Советский уремыште тротуар-влакым тӧрлаш тӱҥалыныт. Тений тиде кундемыште Советский, Комсомольский, Красноармейский уремлаште троуар-влакым уэмдат, асфальтым, бордюр-влакым вашталтат. Пашалан 3 миллион утларак теҥге ойыралтеш. 

Советский поселкышто  тиде проект дене рӱдо скверым тӱзаташ тӱҥалыныт. Тений пашан икымше этапшым шуктат. Скверыште теҥгыл, модаш да канаш вер лийыт, тротуар-влакым ыштат.  

Волжский районышто Шарача селаште памашым тӱзатат. Пашам 1 июльышто мучашлышаш улыт. Тушто понар-влакым вераҥдат, печым печат, теҥгыл-влакым уэмдат. Помар селаште, "Тазалык» лӱман кумдыкым шотышко кондат. Тений пашан кокымшо этапше кая. Тидын нерген район-влакын  администрацийышт увертарат. 

Марий кундем экспортышко сатум палемдыме дечын 22 процентлан шукырак колтен. Тӱҥ шотышто регион гыч вес эллашке шӧр, шыл, пырчым ужалат, тора кундемыште колтымо чыла сату гыч пелыже тиде кочкыш продукций лийын. Ялозанлык да продовольствий министерстве палдара: мемнан республикын 23 эл дене кылже уло. Тӱҥ партнер-влак -  Узбекистан, Таджикистан, Сербий, нине эллашке экспорт сату гыч 50 процентшым колтат. 

Маристат палдара: апрельыште республикыште йошкарушмен 23 процетлан, тыгак  кешыр, пареҥге, шоган шергештыныт.   Кочкыш сатулан ак, кодшо ий дене таҥастарымаште, 0,8 процентлан кугемын. Мунылан ак 11 процентлан шергештын, тыгак шемшыдаҥ, рис, моло шӱраш-влакланат ончысо дечын шукырак оксам луктын пыштыман.  Кинде, чай, сакыр, мороженый да коллан ак волен. Продовольственный огыл сату нерген ойлаш гын, чоҥымо материал-влаклан ак кугемын, тидын дене пырля шовын, мебель, йолчием шергештыныт. 

Шуко пачеран пӧрт-влакым капитально тӧрлат. Идалык тӱҥалтыш гыч  15 пӧртыштӧ пашам шуктымо. Нине пӧртлаште 2700 еҥ ила. Кундемыште 2021 ийыште шуко пачеран 91 пӧртыштӧ тӱшка погым шотышко кондат, тыгак 66 пöртлаште леведышым алмаштат. Кодшо ийын 97 пӧртым кпаитально тӧрленыт, пашам олалаште веле огыл, тыгак поселко ден селалаштат шуктат. 

Кугыжаныш Думо мӱшкыран ӱдырамаш да йочан еш-влаклан полыш шотышто законым пеҥгыдемден. Документ президентын Федерал Собранийлан посланийын кӱштымашыже дене кылдалтын. 1 сентябрь гыч шым ий марте йоча дене шинчымылан больничный пашадарын 100 процентше тӱлалташ тӱҥалеш. Тичмаш огыл, шагал парышан ешлаште - кандаше гыч 16 ияш марте йоча-влак улыт гын, 1 июль гыч нунылан регионышто йоча-влаклан илен лекташ ситыше кугыт гыч пелыжым тӱлаш тӱҥалыт. Неле илыш ситуацийышке логалше мӱшкыран ӱдырамаш-влакланат 1 июль гыч пособий тӱлалтыт.