Коронавирус инфекцийлан кӧра тений шошо да паша кечылан пӧлеклалтше шествий огеш лий. Тидын нерген Инстаграммыште Марий Эл вуйлатышын официальный аккаунтыштыжо увертарат. Демонстраций -влак кокымшо ий огыт лий. Эпидемиологический ситуацийлан кӧра профсоюз организаций-влакын таҥошкылмашышытым чарыме.
Тидланак кӧра «Курымашлык полк» акцийым 9 май гыч 24 июньлан кусарат. Сеҥымаш кечын республикыште илыше-влак акцийышке онлайн ушнен кертыт.
Школ, ВУЗ да предприятийын вашкылже. Тиде - кӱкшӧ квалификациян специалист-влакым ямылаш полша. Республикысе опорный ВУЗышто шанче-туныктымо аудиторийым студент да инженерный класслаште инчымашым погышо тунемше-влаклан почыныт. Йошкар тасмам пӱчмашке Александр Евстифеев ушнен. Тачысе кечын шуко абитуриент профессийым 10, 11 классыште ойыра. Южгунам тунемше-влак ончыкылык пашашт нерген моткоч чот шагал палат. Тыгодым инженерный класс-влак йоча-влалан профессийым шижаш полшат. Республикысе икмыняр школышто кугу промышленный корпорацийын инженер классше-влак улыт. У аудиторийым почмеке, йоча-влак шинчымашыштым йӧнан кабинетыште келгемден да ончыкылык профессийым куштылгыракын ойырен кертыт.
Тений Звенигово районышто газораспределительный станцийым ыштат, Оршанка районысо Кугунур да Шуледӱр яллашке, Советский районысо Голубой да Солнечный поселко марте газ пучым шупшыт, У Торъял да Оршанка районысо икмыняр яллашке «канде тулым» пурташ проект пашам мучашлат. Тидын нерген газификаций да газоснабжений вияҥме шотышто пашаче тӱшкан заседанийыште ойленыт. 2025 ий марте республикыште 260 километр кужытан 17 межпоселковый газпучым чоҥат, тиде 58 ялышке газым пурташ полша, Волжский районышто газораспределительный станцийын реконструкцийже лийшаш.
Шошо да паша, Сеҥымаш кече вашеш лӱдыкшыдымылыкым эскерыме йодышым Республикысе антитеррористический комиссий да Оперативный штабын заседанийыштыже каҥашеныт. Тудым регион вуйлатыше Александр Евстифеев эртарен. Оласе, районласе администраций, ведомство-влак 30 апрель марте инструктаж-влакым эртарышаш, террорист лӱдыкшым шижтарыме да тудын дечын аралалтме йодыш-влак нерген эше ик гана ушештарышаш улыт. Пайрем кечылаште дежурство йудшӧ-кечыже оператививный штаб пашам ышташ тӱҥалеш, уремлаште правам аралыше орган-влак шукемыт. Мутлан, Кугече йӱдым 250 утла, Сеҥымаш кечын 850 утла сотрудник, калык дружинник-влак, тӱшка верлаште лӱдыкшыдымылыкым эскераш тӱҥалыт.
"Российын сулло журналистше" лӱмым Марий Эл газетын журналистше Юрий Исаков сулен. "Марий Эл" газетын коммерческий йодыш дене редакторжо Юрий Валентинович Исаковлан Россий Президент Владимир Путинын 2021 ий 6 апрельыште лекше Указше дене келшышын отечественный журналистикым вияҥдыме суапшылан да ятыр ий тӱвыргӧ лектыш дене пашам ыштымыжлан "Россий Федерацийын сулло журналистше" чап лӱмым пуымо! Юрий Валентинович - марий мутын ямжым шижын, шочмо йылмынан яндарлыкшым арален возышо мастар. Марий журналистикыште шукыштлан пример.
Юрий Исаков - Марий Элыштына тыгай кӱкшытан лӱмым налшыже гыч кокымшо. Икымшыже - "Волжская правда" газетын тӱҥ редакторжо - Александр Лукаев.
Йоча-влакын кеҥеж канышыштлан ямдылалтыт. Тидын нерген Россий Правительстве председательын алмаштышыже Татьяна Голикован совещанийыштыже мутланеныт. Тудын пашашкыже Александр Евстифеев ушнен. Тений Марий Элыште кеҥеж каныш жапыште йоча-влакым 184 организацийыште вашлийыт, тушто 16 тӱжем утла икшыве канышаш. Ончычсо семынак профильный лагерь-влакат пашам ышташ тӱҥалыт. Мутлан, «Радужный» рӱдерыште 5 профильный смене лиеш. Кундемыште 42 тӱжем утла йоча кечывал лагерьлаште канаш да тазалыкыштым шуараш тӱҥалыт, 2 тӱжем утла еҥ республике дечын ӧрдыжтӧ канышыш , 300 утла еҥ «Артек», «Орленок», «Смена», «Сириус» федерал рӱдерлашке канаш кая.
Российысе акций жапыште рӱдӧ оласе кадет класс, патриот клублаште шуаралтше-влак Воин чап монумент воктене шогат. 10 май марте почетан караул вахтым кучаш тӱҥалеш. Тидын вашеш сеҥымашын кумлымшо идалыкше лӱмеш тӱвыра полатыште патриот клуб-влакын слетышт эртен.
Сеҥымаш парад 9 майыште 11 шагатлан тӱҥалеш. Тудым МЭТР телеканал вияш эфирыште ончыкта. Икымше репетиций-влак эртеныт, тыгак 28, 30 апрельыште, 4 да 7 майыште репетиций-влак лийыт.
«Оласе йырвелым йӧнаным ыштымаш» федерал проект дене келшышын, 2022 ийыште тӱзатышаш кумдык-влак верч йӱклымаш тӱҥалын. Республикыште тӱзатышаш объект –влак верчын 4 тӱжемат 500 утла еҥ йӱклен.
Республикыште посна противопожарный режимым пуртымо. Игече юалге да вӱдыжгӧ гынат, кундемыште пожар-влак шукемыт. Тидын нерген правительстве заседанийыште Республике правительстве Председательын алмаштышыже Степан Воронцов палемден. 4 кече жапыште 106 гана тул ылыжын, 81 гана шудым да шӱкым йӱлалтымылан кӧра. Кодшо арняште 76 тулазап лийын. Волжск, Йошкар-олаште, тыгак Курыкмарий, Звенигово да Медведево районлаште пожар-влакын чотышт шукемын.
