Марий Элышке шокшо игече пӧртылын. Марий гидрометеорологий рӱдерын палемдымыж почеш, южын температурыжо лишыл жапыште 28 градус марте шокшо лиеш. Сандене вӱд воктене каналташ да йӱштылаш пурышо-влакын чотышт уэш ешаралтеш. Марий Эл Республикыште Российысе МЧС тӱҥ виктемын данныйже почеш, тений йӱштылмӧ тургым почылтмо гыч 18 еҥ вӱдыш пурен каен колен. Тышечын кокытшо – йоча. 16 гыч 21 август марте гына вӱдыш пурен кайыме 5 случайым пеҥгыдемдыме. 

29 август - Эдес ола гыч Константинопольыш Господь Иисус Христосын Нерукотворный образшым кондымо кече. Ты кечын Пӱкш спас палемдалтеш. Тудым эше Кинде спас маныт. Тиде кечын у шурно ложаш гыч киндым пыштеныт, чодыраште пӱкшым погаш тӱҥалыныт. Кинде илян кече шыжымсе пайремлан тӱҥалтышым пышта. Тудын  тӱҥ шонымашыже – у кинде лектышым налмылан Юмылан тауштымаш, ончыкыжым кокияш шурнылан сайын кушкашыже йӧным йодмаш.
 

Тӱвыра аланыште тыршыше туныктышо-влак пырля погыненыт. Рӱдолаште йоча сымыктыш школ да тӱвыра тӧнежлаште тыршыше педагог-влакын августысо конференцийышт эртен.  

Эрвел марий калыкын йӱлажым ончыктышо спектакль. Шкетан лӱмеш Марий кугыжаныш драме театр у премьере дене вашка. 5-ше сентябрьыште Александр Арзайнын пьесыж почеш шындыме «Микулан - презе, Якулан - ӱдыр» музыкальный комедийым калык ончыко луктеш. Постановко эрвел марий калыкын муро-куштымашыжым, чием, йылме ойыртемжым почын пуа. 

Туныктышо, кусарыше да миссионерым шарнен. Эртыше кечылаште черетан историй возалтын. Морко районысо Арын селаште святой ача, туныктышо, шанчызе ден йоча-влак Гавриил Яковлевлан пӧлеклалтше кугу вашлиймашке погыненыт. Тыште Христос шочмо лӱмеш храм ваштареш марий калыкын протоиерейже Гавриил Яковлевлан памятникым почыныт. Кумданрак Эльвира Петрован материалыштыже.
 

Семӱзгар-влаклан кокымшо илышым пӧлекла. Вячеслав Корнев 20 ий утла гармонь-влакым ачала. Ончыч шке инструмент-влак ден гына шинчылтын гын, пытартыш 10 ий жапыште йодын толшыланат ачала. А йодмашыже тӱрлӧ кундем гыч пура. Гармонь мастар нерген кумданрак сюжетыште.                             
 

Параньга район Кугу Пумарий селаште СВО-што ÿмыр лугыч лийше, тале спортсмен Алексей Кузнецов лÿмеш спортплощадкым почыныт. Алексей спорт дене кылым изи годсек кучен, волейбол дене модаш йöратен. Тудын командыже ятыр гана призовой верлаште лийын. Волейбол дене модаш площадкым ышташ шонымаш кок изак-шолякын, Алексей ден Альберт Кузнецовмытын, кодшо ийынак шочын. Но тиде шонымаш шукталтын огыл. Алексей шке кумылын специальный военный операцийышке каен. Патыр марий эргын ӱмыржӧ тений февраль тылзыште кӱрылтын.
 

Пакчазе-влакын шокшо тургымышт тӱналын. Тачысе кечын нуно пакчасаскаштлан куанен, телылан шапашым ыштат. Нунын лектышышт могайрак – мемнан съемочный группына пален налын. 

Шернур районысо ӱдыр-рвезе-влак форумыш ушненыт. Шернур район Кукнур селаште, Марий Йӱштӧ Кугызан илемыштыже, самырык-влаклан «Энергия будущего» форум лийын. Кумданрак мемнан корреспондентна Дмитрий Веденькин палдара. 

Школыш погынаш – пытартыш тат. Арня гыч 80 тӱжем наре икшыве угыч парт коклашке шинчеш, эше кандаш тӱжем йочалан икымше йыҥгыр йоҥгалтеш. Росстатын уверже почеш, тений «Икымше классын наборжо» рвезе икшывылан - 22 тӱжем утла теҥгыш шуэш, ӱдыр-влаклан - 27 тӱжем нарым луктын пыштыман. Эн шергыже – костюм. Школысо пазарлаште канцеляр сатум кеч-могай бюджетлан погаш лиеш. Тидын нерген ача-ава-влак ойлат. Иктышт наледыме сомылым пытартыш кечылан коденыт гын, весышт шошо гычак изин-изин ямдылалтыт.