3-шо классыштак юнармий формым чиеныт. Йошкар-Оласе 3-шо номеран школышто 92 йочам юнармий радамыш пуртеныт. Ты почётан событийыш ача-ава, сарзыеҥ, СВО-н участникше, Юнармий штабын начальникше толыныт. Кызыт 3-шо номеран школышто 20 юнармий класс уло, 6-шо – тÿҥалтыш класс-влак. Тушто чылаже 480 утла тунемше шинчымашым налеш. Тиде туныктымо тӧнежыште тыгак орлята да кадет движений чолган пашам ыштат. Тачысе кечылан 14 кадет классыште 395 йоча тунемеш. Юнармий радамыш шогалше йоча-влаклан ты кече историйыш возалтеш. Вет нуно сарзе-патриот воспитанийлан кугурак тӱткышым ойыраш тӱҥалыт.

Йошкар-Оласе калык арвер сымыктыш пӧрт-тоштерын кудывечыже юзо тӱняш савырнен. Поро йӱла почеш тыште 3-шо ий почела пидаш, тӱрлаш йӧратыше, сымыктышлан шӱмаҥше кидмастар-влакым фестивальыш чумырат. Тушто мемнан корреспондентна Лира Матвеева лийын.

Республикыштына профессионал шинчымашым налме шотышто приёмный кампаний эрта. Тудын кышкарыште 8-11 класслаште шуаралтше ӱдыр-рвезе-влак рынкыште йодмашан профессий дене шинчымашым налын кертыт. Тений тыгай йӧн дене 700 наре икшыве пайдаланен. У тунемме идалыкыште эше 800 йочам авалташ палемдыме. Программылан Республикын профессийлан ончылгоч ямдылыме рӱдерже вуйын шога. Тудак тунемше-влаклан профориентаций сынан занятий-влакым эртара.

Советский районысо Ӱшнӱр кыдалаш школышто лапта – шукертак палыме спорт модыш. Школышто кажне ийын соревнованийым эртарат. Тений пионерий кечын лапта дене 5 команде модын, тиде Вечын, Кадам, Кукмарий да Ӱшнӱр школ гыч тунемше-влак. Лапта дене турнирыште Вера Горохова лийын.

Еш дене жапым эртареныт. Шинча пӱсылык шотышто эмганен вияҥше йоча да нунын ача-авашт еш лагерьыште каналтеныт. Тыгай йӧным Сокыр-влак ушемын Марий Элысе пӧлкажын сеҥыме черетан грантше ыштен. «Волшебная радуга» лӱман проект 100 утла еҥым, изижымат-кугужымат ик площадкыш чумырен. Еш-влак дене Эльвира Петрова ден Николай Азиков вашлийыныт.

Студент-влакын «Финн-угор калык-влакын поянлыкышт» тӱнямбал кӱкшытан форумышт эрта. Тудо Российысе финн-угор регионышто тунемше студент ден аспирант-влакым 11-ше гана чумырен. Студент форумышто толшо-влак шке пашашт дене 10 секцийыште палдареныт да тачысе кечылан келшыше йодышым тарватеныт.

Марий книга савыктыш лудшо-влакым у книга дене палдарен. Жанр шот дене нуно тӱрлö улыт. Тиде почеламут, ойлымаш, шанче паша, йоча-влаклан произведений. Презентаций С. Чавайн лӱмеш калыкле книгагудышто эртен. Кумданрак Лира Матвееван сюжетыштыже.

«Тӱвыра» нацпроект почеш республикыштына тений кум тоштерым оборудований дене пойдарат. Нунын коклаште Юрино поселкысо Г.П. Лосев лӱмеш историко-художественный тоштер, Куженер историко-краеведений тоштер да А.Ф. Конаков лӱмеш Шернур тоштер-ончер комплекс. Тачысе кечын Шернур районысо тоштерыште могай паша шукталтеш? Тидын дене мемнан корреспондентна Дмитрий Веденькин палдара.

Йошкар-Олаште регион кӱкшытан 4-ше шанче-практик конференций эртен. Тудын лӱмжӧ - «Города среднего Поволжья: История и современность». Конференций Марий Элын рӱдӧ олажлан, тудын историйжылан пӧлеклалтын. Тушко студент, самырык тукым, историк, шанчыеҥ-влак ушненыт. Конференцийыште «История Йошкар-Олы» тÿшка монографий дене палдареныт. Тудо Йошкар-Олан 440 ияш лӱмгечыжлан пӧлеклалтын.

1-ше ужаш.