Марий йӱла: Руководитель организации марийской традиционной религии рассказал о работе весной и летом.

Кыдалаш статусшым арален, у тунемме ийым тӱҥалын. Советский районысо Кельмаксола кыдалаш школ тений 137-ше гана шке омсажым почын. Тений ты школ 111 йочам парт коклашке шынден. Нунын коклаште юнармий отряд. Патриот воспитанийлан ты туныктымо тӧнежыште поснак тӱткышым ойырат. 1-ше гана парт коклашке 11 йоча шинчын.

Республикысе чыла школлаште икымше йыҥгыр йонген. 87 тӱжем наре йоча парт коклашке шинчын. Йоча, ача-ава да туныктышо-влак дене пырля пайрем кумылым Марий Эл Республик вуйлатыше Юрий Зайцев пайлен. Тудо Советский районысо Ӱшнӱр кыдалаш школышко миен. Тений тиде туныктымо тӧнежым капитально тӧрленыт. Уэмдыме школым мемнан съемочный группынат аклен.

Черетан у шӱдыр-влакым чӱкташ жап. Тений Марий Элыште кумдан чапланыше «Ший памаш» эстраде муро конкурс-фестиваль угыч эртаралтеш. Вокал таҥасымаш финн-угор калыкым уша. Кызыт фестивальышке ушнаш йодмашым погат.

Мордовий Республике ик эн виян скульптор Степан Эрьзя дене кугешна. Саранск олаште тудын лӱмжым нумалше сӱретсымыктыш тоштер уло. Тушто ик кугу пӧлкаже лач тудлан пӧлеклалтын. Тиде тоштерыште мемнан съемочный группына лийын.

У тургымым Марий Эл радио дене пырля. Калыкын ик эн йӧратыме радиожо молгунамсе семынак 1 сентябрь гыч у тургымым тӱҥалеш. Могай вашталтыш-влак лийыт да колыштшо-влакым мо вуча? Вашмут-влак сюжетыште.

Лумлӧ семмастар, Кугу Ачамланде Сарын участникше Михаил Степановым шарнен, Морко район Марий Кужер ялыште 100 ияш лӱмгечыжлан пӧлеклалтше пайрем эртен. Тудын илыме пӧрт пырдыжыштыже шарныме оҥам почыныт, концертым эртареныт, Михаил Степановын родо тукымжо дене вашлиймаш лийын. Тыгак М. Шкетан лӱмеш Марий Кугыжаныш драме театрын артистше-влак «Морко сем» спектакльым пӱртӱс лоҥгаште ончыктеныт.

Ик эн тошто да поян историян ола. Эртыше кечылаште Козьмодемьянск ола 440 ияш шочмо кечыжым палемден. Кечыгут тыште пайрем шӱлыш озаланен. Икмыняр тӱжем дене уна да турист-влак олаште улшо чыла моторлыкым ужын савырненыт. Таче ола кузерак ила да мо дене кугешна? Вашмут сюжетыште.

Проектым чын возаш туныктат да грант конкурслашке ушнаш таратат. Самырык-влаклан «МолодЙошка» республикысе форумышто 4 кечыште республикысе да федерал спикер-влак шке опытышт негызеш проект паша дене лишкырак палымым ыштат. Участник-влаклан 6 виктыш дене шинчымашым пуат. Кумданрак сюжетыште.

Кенеж каныш шенгелан кодын, ончылно – у театр тургым, у роль-влак да у сеҥымаш. М. Шкетан лӱмеш Марий Кугыжаныш драме театр 28 сентябрьыште «Элнет» спектакль дене у тургымжым почеш. Тений у сезон могайрак лиеш да мыняр у постановкым калык ончыко луктыт? Тиде да моло йодышлан вашмутым ямдылыме материалыштына пален налын кертыда.