Марий Эл ТВ: Делегация Марий Эл продемонстрировала гостеприимство мари на выставке «Отдых» в Москве.

Кугу Ачамланде сар, сар деч варасе илыш, специальный сарзе операций. 1 сентябрь гыч Российын регионлаште 10 да 11 классласе ӱдыр ден рвезе-влак историйым икгай учебник почеш тунемаш тӱҥалыныт. Историй факт-влак икымше тӱнямбал сар гыч тӱҥалын тачысе кече марте жапым авалтат. Книгам мемнан съемочный группынат аклен.

Стартыш лекташ ямдылалтыт. «Нацийын кроссшо» таҥасымаш российын чыла регионыштыжо эртаралтеш. Тӱшка стартым «Спорт-илышын нормыжо» проект дене пуат. Тудын вашеш республикынын районлаштыже куржталмаш-влак эртарлтыныт. Мутлан, Шойбулакыште тӱшка старт вашеш районысо таҥасымаш лийын. Тушко школышто тунемше-влакат, кугырак ийготан-влакат лектыныт.

Бурлаковын кышаже… Советкий районысо Кужмарий кундем РСФСР-ын, Марий АССР-ын калык артистшым Виктор Бурлаковым чапландарен шарна. Верысе тӱвыра пӧрт кугу артистын лӱмжым нумалеш. 22 сентябрьыште Виктор Бурлаковын шочмо кечынже тудым чапландарыме пайремым эртарат. Ила ыле гын, марий калыкын йӧратыме артистше 96 ийым тема ыле.

Кӱртньыгорно, йоча лагерь, кол промышленность, чоҥымаш да унагудо – Марий Эл гыч студент-влак кеҥежымсе паша тургымыштым иктешлат. ВУЗ да СУЗ-ын 400 тунемшыже Мӱндыр Эрвел, Сибирь, Российын кечывалвелныже лийыныт. Лач студент отрядлан кӧра, пашадар деч посна нуно опытым погеныт, куан кумылым налыныт. Нунын дене мемнан съемочный группына кутырен.

Ик калык туныктышылан шукырак. Август мучаште Морко 2-шо номеран школышто пашам ыштыше Марий Элын сулло туныктышыжо Эльза Семеновам Марий Эл Республик вуйлатыше Юрий Зайцев Марий Элын калык туныктышыжо чаплӱм дене палемден. Тудо 40 ий руш йылмым да литературым туныкта. Тудын дене мемнан съемочный группына вашлийын.

Саранск ола – Мордовий Республикын рӱдолаже. Тудо Эрьзя лӱмеш сӱретсымыктыш тоштер, Фёдор Ушаковын кафедральный соборжо, Пушкинын лӱмжым нумалше каныме да Сеҥымаш парк-влак, кугу фонтаже дене, унам вашлийын моштымыжо дене кугешна. Олан сӧраллыкше, марий да мордва калыкын икгайлыкше дене мемнан коллегына-влак палыме лийыныт.

Тӱрлӧ шӧрынан сӱретче. Российын сулло да Марий Элын калык сӱретчыже Измаил Ефимов этнофутурист, монументальный сымыктыш, станкОвый сӱрет, графике да моло сынан паша дене палыме. Радынаштыже шочмо кундемын сӧралжым, марий калыкын илыш-йӱлажым, историйжым ончыкта. Республикысе сӱретсымыктыш тоштерыште «Измаил Ефимовын этносферыже» лӱман ончер почылтын. Тиде циклышке сӱретче тошто да ик эн ончыч шочшо теме дене кылдалтее паша-влакым луктын. Авангардный да экспериментальный сынан радына-влак улыт.

Айдемын илышыже – книга, айдеме – тудын авторжо. Чынжымак, книган илышыже моткоч кужу. Тудо историйым, тӱрлӧ кончышым, сылнымутым, фольклорым арала. Книгам почын айдеме тӱрлӧ вере да тӱрлӧ саманыш логалын кертеш. Теве «Торъяльский край – Торъял кундем» книгат лач тыгай. Тудын авторжо Алексей Максимович Кленов. У Торъял районын 100 ияш лӱмгечыже вашеш курымаш хроникым чумырен.

Усталыкым шуараш да тунемашлан – у кумдык. Марий Эл Республикын вуйлатышыже Медведево районысо икмыняр социал объектыште лийын. Мутлан, Руэм посёлкышто у школым чоҥат. Тыгак тушто музыкальный школын реконструкцийжым ыштат.