13 январь - Российыште печать кече. СМИ-влакым   пайрем кече дене регион вуйлатыше Александр Евстифеев саламлен. Правительстве пӧртыштӧ республикын социал-экономике могырым ончыктымаште правительстве премийым сулышо-влакым саламленыт. Премийым МЭТР телеканалын пашаеҥыштат налыныт. Нунын гыч иктыже журналист Наталья Ямаева. Тудын республикыште илыше калык-влакын ойыртемыштым ончыктышо пашаже-влакым палемденыт. 

Республике правительствын премийжым тыгак «МЭТР» телеканалын усталык коллективше, а тиде - журналист Рамиля Салихова, оператор Сергей Ефремов, монтажым ыштыше режиссер Федор Волконидин, йӱк режиссер Илья Беневоленский суленыт. Нуно социал илышым да верысе инициативым эн сайын ончыктеныт. «МЭТР» телеканал пандемий тӱҥалме дечын вара волонтер, врач-влак нерген чӱчкыдын каласкален да каласкала, еҥ-влаклан правилым шукташ кӱлмӧ нерген ушештара. 

Тӱвыра илыш нерген эн сайын возышо семын  «Марий Эл» газетын журналистше Алевтина Байковам, ялозанлык пашам ончыктымаште «Знамя» газетын корреспондентше Дмитрий Кочергиным, йоча да самырык-влак нерген возышо «Марийская правда» газетын корреспондентше Екатерина Романым саламленыт. 

«Золотое перо» премийым Килемар районысо «Восход» газетын тӱҥ редакторжо Любовь Смирнова сулен. 

Марий Элыште 2021 ийыште ЖКХ тариф-влак инфляций дечын чот огыт кугем. Тыгодым тариф-влакым 1 июльышто веле кугемдат. Январь тылзе гыч коммунал суаплыклан тӱлымӧ шотышто вашталтыш огеш лий. Июль тылзе гыч электроэнергий шергештеш, олаште илыше-влаклан - 3 теҥгеат 89 ыр гыч 4 теҥгеат 2 ыр марте кугемеш. Яллаште идалыкын кокымшо пелыштыже   ик киловаттше 2 теҥгеат 81 ыр лиеш. 

Инфекционный стационарлаште коронавиурс але тудын лийын кертме лӱдыкшӧ дечын 918 пациент эмлалтеш, 360 еҥын коронавирус инфекций пеҥгыдемдалтын. 140 пациент чот нелын черле, 400 еҥ кислород полшымо дене шӱла. Оперативный штаб увертара, республикыште 11 январьлан 9738 еҥын коронавирус пеҥгыдемдалтын, 8477 еҥ эмлалтын. 

Каныш кечылаште республикыште 500 наре еҥын коронавирус инфекций пеҥгыдемдалтын, 10 кече жапыште тиде черлан кӧра 10 еҥ колен. Тыге республикыште чылаже тиде вируслан кӧра 132 еҥ ӱмыр лугыч лийын. Пытартыш суткаште республикыште 50 еҥын тиде вирус пеҥгыдемдалтын. 

У Ий каныш кечылаште республикыште 21 пожар лийын. Россий МЧС-н республикысе виктемже увертара, 7 оралте йӱлен, ик еҥ тулеш ӱмыр лугыч лийын. Тулазап-влакын тӱҥ амалышт- электровоштырын начар улмыжо да коҥгам олтымо годым правилым пудыртымаш. Эн шуко пожар Медведево районышто лийын, тушко пожарым йӧртышӧ-влак 6 гана лектыныт, 3 тулазап дене Йошкар-Ола ден Волжскышто, 2 пожар дене Курыкмарий, Марий Турек, У Торъял районлаште, икте дене Морко, Звенигово да Шернурышто лийыныт.  

Лишыл кечылаште республикыштына йӱштӧ игече озаланаш тӱҥалеш. Тыгай годым ача-ава-влак йочам школышко колташ але уке, шкешт палемдат. «Йошкар-Ола » оласе округысо»   администрацийын туныктыш виктемже палдара: метеорологический службын увержым да кажне кундемыште, микрорайонышто игечым шотышко налын, 25 градус йӱштӧ гын -  1-4 класслаште тунемше-влаклан, 28 градус йӱштӧ гын-   5-8 класслаште шинчымашым погышо-влаклан, 30 градус дечын йӱштӧ гын -  9-11 класслаште тунемше-влаклан школышко каяш огыт темле. 

Йоча школышко толын гын, тудым садак туныкташ тӱҥалыт. Вӱргече марте республикыштына йӱштӧ игече озалана. 

Марий Элыште нацпроект дене тренажер, коньки дене кошташ установко, информационный табло да моло спорт инвентарьым налыныт. Тений федерал бюджет гыч спортоборудований да инвентарьым налаш 25 миллион теҥге ойыралтын. Марий Эл вуйлатыше Александр Евстифеев «Марий Эл» Ий полатыште лийын. Тушто Демографий нацпроект дене «Спорт-илышын нормыжо  федерал проект» дене келшышын ойырымо окса дене налме спорт оборудованийым вераҥденыт. Спортын теле видшылан рӱдолаште веле огыл тӱткыш ойыралтеш. Федерал проект дене тений Курыкмарий район Кулаково селаште хоккейный площадкым чоҥеныт.  

Марий Эл вуйлатыше Александр Евстифеев «Кумыл кож» акций дене келшышын республике гыч кум йочан шонымашыжым шуктен. Иктыже Курыкмарий район Ямангаш села гыч Ника Матрюшкина, изи ӱдыр тазалык дене эмганыше. Тудо шке тазалыкшым шуараш «Шведский стенкым» йодын. Эше ик шонымаш Йошкар-Ола гыч Николай Антоненко деч пурен, тудлан регион вуйлатыше фотоаппаратым пӧлекла. Йошкар-Ола гыч Ксения Уртьева тулык ӱдыр, тудо У ийлан нотбукым вуча. «Кумыл кож» акций республикыште «Мы вместе» Российысе марафон кышкарыште эртаралтеш. Тудын жапыште тулык, тыгак тазалык дене эмганыше йоча да 60 ий марте кугыеҥ-влакын шонымашыштым шуктат. 

Советский поселкышто у пӧртыштӧ пачер-влакым тулык, тыгак тоштемше пӧртлаште илыше-влаклан пуэныт. У ий вашеш 7 тулык йоча да аварийныйлан шотлалтше пӧртла гыч 13 еш у пачерыште пӧртсийым палемда. Регион вуйлатыше Александр Евстифеев нунылан пайремлын сравочым кучыктен. Советский районышто аварийныйлан шотлалтше 5 пӧрт гыч 39 еҥ у пачерышке кусна. Вес ийын эше 119 еҥым кусарыман. Регион вуйлатыше палемден: кызыт Роҥго селаште шуко пачеран пӧртым чоҥат, Солнечный поселекыштат пӧртым нӧлташ тӱҥалыныт. 

К спортивной акции присоединились и друзья радио, опытные спортсмены и любители, которые не один раз становились гостями в студии.