24 декабрьыште Шернурышто онлайн йӧн дене «Йӱштӧ Кугыза дек унала» республике кӱкшытан фестиваль-конкурс лиеш. Тудо историйыште икымше гана эртаралтеш. Фестиваль-конкурс икмыняр номинаций дене эрта: «У Ий вургем». Тушко йодмаш-влак Курыкмарий, Волжск, Звенигово, Куженер, Килемар, У Торъял, Медведево, Морко, Марий Турек, Шернур, эсогыл Мурманск да Нижегородский областьысо Семенов ола гыч пуреныт. 19 коллектив «Йуштӧ Кугыза – 2020» усталык программым ончыкташлан кумылаҥын. Тиде республикын районлаж гыч, тыгак Башкортостан республикысе Сибай ола, тыгак Киров область Пижан район гыч. Конкурс паша-влакым Шернур рӱдӧ клуб системын лаштыкыштыже ончаш лиеш. 

Марий Йӱшто кугызан резиденцийже Шернур район Кукнур кундемыште верланен. 

Волжск олаште лиймыже годым Александр Евстифеев тулык йоча-влаклан Волжскысо рӱдерыште лийын. Регион вуйлатыше коррекционно-оздоровительный корпусын у зданийжым аклен, тыгак йоча-влакын пайремыштышт лийын. У Ий вашеш пӧлек-влакымат кучыктымо. Регион вуйлатыше рӱдерлан видеоаппаратурым, а тиде телевизор, медиасистемым пӧлеклен. Тудын дене онлайн –урок-влакым эртараш келша. Регион вуйлатышын лӱмжӧ дене пайрем вашеш тулык да ача-аван попеченийже дечын посна кодшо йоча-влаклан 8 кугыжаныш учрежденийлашке пӧлекым колтат. Таче кечын нине социал тӧнежлаште 394 икшыве ила. 

Лишыл жапыште Волжск оласе 5-ше номеран у школышто икымше йыҥгыр йоҥга. Тидым туныктышо да тунемше-влакат чот вургыжын вучат. Ты марте учреждений 1937 ийыште чоҥымо тошто оралтыште верланен ыле. У корпусым чоҥаш, да тушто 336 верым ышташ «Образований» нацпроект дене 169 миллион тенге ойыралтын. Тиде окса дене школыш у корпусшым нӧлтеныт. Тушто йоҥгыдо кабинет, спортивный да актовый зал, библиотеке, кумда вестибюль улыт. Школышто у оборудований. Тазалык дене эмганыше йоча-влакланат тунемме верым келыштареныт, тушто пандус, санитар зоно, лифт уло. Школын у корпусшым ыштен шуктымеке, тушто школысо историй тоштерым чумыреныт. У тунемме верым пайремлын почмашке регион вуйлатыше Александр Евстифеев миен. Волжск олан мэрын пашажым шуктышо Алексей Веслов дене йошкар тасмам пӱчкын.  

 «Калыкын чонжо» республике правительствын премийжым сулышо-влакым саламленыт. Марий Элым вуйлатыше Александр Евстифеев 2020-шо ийлан Правительствын «Калыкын чонжо» премийжым пуымо шотышто распоряженийышке кидпалыжым пыштеню.

8 ийым темыдыме йоча-влаклан Владимир Путинын кӱштымашыже дене 5 тӱжем теҥгем пуат. Тидын нерген элын вуйлатышыже кугу пресс-конференцийыште увертарен. Указым пеҥгыдемдыме. Оксам налаш справкым погыман огыл. Кеҥежым 3 гыч 16 ияш марте ийготан йоча-влаклан пособий ойыралтын гын, оксам тиде реквизит денак колтат. Реквизитыште вашталтыш уло гын, пенсий фондышко йодмашым пуыман. Президент увертарен: ешыште 8 ийым темыдыме йоча уло гын, 5 тӱжем теҥгем пуат. Тиде У Ий вашеш шкешотан пӧлек. Марий Элыште тиде выплатым 65 тӱжем утла еҥ налшаш. 

Марий Элыште келшен икмыняр калык-влак илат. Южыжын шке автономийыштат уло Республикыште илыше азербайджан-влакын калыкле-тӱвыра автономийышт у фотоончерым чумырен. Тудо «Азербайджан-тулан эл»  маналтеш. Ончер  Йошкар-Олаште «Благовещений башня» тӱвыра-выставке рӱдерыште пашам ышта. Экспозицийыште Азербайджанысе фотограф-влакын пашаштым вераҥдыме. Тушто Кавказ элын мотор да пале вер-шӧржым, историй памятникшым, калыкын кочкыш-сийжым, йӱлам ончыктымо. Тыгак тушто калык вургем, сурт-коклаште кучылтмо ӱзгар, тошто книга-влакым ужын аклаш йӧн уло. Ончер 15-ше январь марте пашам ышта. 

Иван Ямбердов-Марий Элын калык сӱретчыже. Тидын шотышто указышке кидпалыжым регион вуйлатыше Александр  Евстифеев 14 декабрьыште пыштен. Уло кумылын Иван Михайловичым тиде чап лӱмым сулымыжо дене саламлена. Иван Ямбердов – республикыште веле огыл, Российыштат палыме сӱретче. Тудо Волсжкий районышто шочын кушкын, 1983-шо ий гычак тудо сӱрет сымыктыш фонд Марий пӧлкажын уста сӱретчыже лийын. Ятыр портрет да пейзажын авторжо. Иван Михайловичын пашаже-влакым Финляндий, Венгрий, Израиль, Италий, Эстоний да Элнан тӱрлӧ олаласе тоштерлаште ужаш лиеш. Тыгак тудын ятыр пашаже республикысе музейлаште аралалтеш. 

Пытартыш жапыште чодырам шолып руышо-влак шагалрак вашлиялтыт. Марий Элыште тений, кодшо ийла дене таҥастарымаште, 8 пачаш тыгайже шагалемын. Тений 11 тылзе жапыште 566 кубометр чодырам шолып руымо. Эҥгек, кодшо ий дене таҥастарымаште, 6 пачаш шагалемын. Тидын нерген регионысо пӱртӱс ресурс министерстве увертара. Юридический лица-влак дене ыштыме административный права пудыртмаш-влак иземын толеш. 

У Торъял районышто ГТО нормативым сдатлаш площадкым почыныт. Тушто кумылан-влак норматив-влакым сдатлен кертыт. Рӱдер  У Торъял поселкышто верланен. Таче кечын Марий Элыште ГТО нормативым стадлаш 13 рӱдер уло. 

Самырык-влакым спортлан шӱмаҥдаш у оборудований полша. Хоккей дене спорт школлан «Демографий» нацпроектын «Спорт - илышын нормыжо» федерал проект дене келшышын,   у оборудованийым налыныт. Самырык-хоккеист-влаклан шуаралташ оборудованийлан 25 миллион теҥгем ойыреныт, утларак шийвундо федерал бюджет гыч. Тиде субсидий дене Курыкмарий район Кулаково селаште хоккейный коробкым ыштеныт, тушко информационный таблом вераҥденыт. Ончыкыжым тиде районыштат ий вид дене спорт школын хоккей пӧлкаже лиеш. Спорт школ да Красноволжский школ коклаштышт ойыпидышым ыштеныт. Йоча-влак школын спортзал, вургемым вашталтен чийыме вер, душевой-влак дене пайдаланаш тӱҥалыт. Таче кечын тыгай пӧлка Йошкар-Ола да Марий Турекыште уло. Тушто чылаже 160 йоча ямдылалтеш.