Икымше гана пашам тӱҥалше-влакын паша книгашт электронный лиеш. Нунылан кагаз книжкам ышташ огыт тӱҥал. Электрон паша книжкаште ончычсо семынак чыла увер да информаций лиеш: паша вер, могай кечыште пашам тӱҥалын, должность, профессий, специалность, квалификаций да молат. Электрон паша книжка дене еҥ-влак пашам ыштыме нерген тичмаш уверым кеч-могай жапыште пален налын кертыт.  Данныйым Пенсий фондын сайтше, але «Госуслуги» портал, МФЦ гоч, тыгак пашам ыштыме организацийыште налаш лиеш. Ушештарена, пашам ыштыше граждан-влаклан электрон паша книжка кодшо ий гыч илышышке пураш тӱҥалын. Ӱмаште кумылан-влак кагаз книгжка гыч электрон книжкашке кусненыт. Республикыште  177 тӱжем утла пашам ыштыше еҥ могай книжкам ойырымо шотышто йодмашым возен. Тышечын лу процентшын пашам ыштыме нерген уверышт  электрон книжкаште аралалташ тӱҥалеш.  

Республике правительствыште «Лесная сказка» кугыжаныш унитарный предприятийын финанс пашажым саемдыме нерген ойленыт. Таче кечын тудын 28 миллион теҥге кредит парымже уло. Совещанийыште предприятийын пашаже, тыгак пашам саемдыме нерген, парымым петырыме шотышто ойленыт. Регион вуйлатыше Александр Евстифеев палемден: тыште тӱҥжӧ тыршыше-влакын  праваштым  аралаш, еҥ-влак  жапыштыже да тичмаш пашадарым налшаш улыт. Тӱҥ шотышто республике правительстве предприятий-влаклан полша. Тыге мутлан, шке жапыштыже республике «Мостремстрой» предпряитийлан уэш йолӱмбаке шогалаш полшен. Таче тудо сайын пашам ышта. 

Марий Элыште транспортым виктарыме ик системе лиеш. Тидлан кугыжаныш предприятийым ыштат. Тудо тӱшкан пайдаланыме транспортым, лӱдыкшыдымылык йодышым эскераш да тиде пашам виктараш тӱҥалеш. Тидын нерген республике правительствыште каҥашеныт. «Управление транспортом» автоматизированный системе дене пашам саемдат. Таче кечын тудын деке  троллейбус транспортым ушеныт, идалык мучаш марте частный перевозчик-влакын эше 100 единице автобусыштым ушат. Тиде системе тӱрыснек пашам ышташ тӱҥалеш гын, еҥ-влак электрон картыште транспортын маршрутшым ончен кертыт. 

Совещанийыште Йошкар-Олаште автовокзалым ыштыме йодышымат нӧлталыныт, тудын проектшым каҥашеныт. Республике правительстве тиде йодышым тӱткын эскера. Вашлиймаште троллейбус транспортым уэмдыме нергенат ойленыт. 

Почетан донор-влаклан тений утларак тӱлаш тӱҥалыт. Индексаций дечын вара выплатын кугытшо 15 тӱжемат 109 теҥгешке шуэш. Оксам идалыклан ик гана 1 апрель марте пуат. Тиде окса гыч налог огеш налалт. Республикыште таче кечын 3 тӱжем тула еҥ почетан донор, 2020 ийыште эше 79 еҥ тиде радамышке ушнен.

ОРВИ дене черланыше-влакын чотышт шукемын. Роспотребнадзор увертара. Пытартыш арняште пӱсӧ респираторный чер дене 3300 еҥлан тиде диагнозым шынденыт. Кок арня жапым таҥасатараш гын, тылечын ончычсо 7 кечылаште ик тӱжемат 400 черле лийын. Грипп республикыште уке. Грипп дечын прививкым 360 тӱжем еҥлан шынденыт, тиде республикыште илыше-влак гыч 53%.

Республикын эҥерлаштыже вӱд пеҥгыдемын шуын. Специалист-влак эреак ийын кӱжгытшым висат. 18 январьлан ончымаште Юл эҥерыште ийын кӱжгытшӧ Чебоксар вӱд аралыме верыште 25-32 сантиметр, Куйбышев вӱд аралыме верыште 40 сантиметр. Вӱтла эҥерыште 30 сантиметр. Йошкар-Олаште Изи Какшаныште 38-42 сантиметр марте вӱд кылмен, Рӱдӧ пляж кумдыкышто гын 42-45 сантиметр марте. 

1 апрель гыч калык чотым шотлат – перепись тӱҥалеш. Тудо ик тылзе 30 апрель марте шуйна. Тений 2021 ийыште калык чотым шотлымо годым тений икымше гана цифровой йӧным кучылтыт. Ончычсо семын переписчик-возышо-влак веле огыл мӧҥгӧ толыт, тыгак кумылан-влак «Госуслуги» портал гоч, тыгак мобильный да стационарный участке-влак, МФЦ-шке миен возалтмашке ушнаш лиеш. Волонтер-влак калык чотым шотлаш полшаш тӱҥалыт. Марий Элыште чылаже 206 участке лиеш, 82-шо Йошкар-Олаште. 

Куженер районышто кок ял коклаште корным ыштышаш улыт. Тушко тыгыде кӱйым шарат. Кугыжаныш закупко сайтын уверже дене, корно Кугу Лаждӱр да Марий Олма ял-влакым уша. 3 километр кужытан корным чоҥаш районысо бюджет  3 миллион теҥгем ойыра.

Йошкар-Оласе троллейбус кондуктор дечын посна пашам ышташ тӱҥалын. 18 январь гыч 10 номеран троллейбус маршрутышто кастене билетлан оксам погышо да билетым пуышо посна еҥ огеш лий. Пассажир-влак водитель дене улшо терминал гоч оксам тӱлен кертыт. Еҥ-влак тиде маршрутышто ончыл омса гыч пураш да лекташ тӱҥалыт. Тидын нерген «Троллейбусный транспорт» муниципал предприятийыште палдарат.  

Тений Марий Элыште икымше шояк оксам муыныт. Марий Эл МВД-ын пресс-службыжо увертара: тиде 5 тӱжем теҥгеаш кагаз окса. Йошкар-Оласе ик банк гыч шижтарымаш пурен. Полиций пашаеҥ-влак банкнотым налын, тергымашке колтеныт. Кызыт уголовный пашам тарватыме шотышто йодыш уло. Марий Эл МВД-ште палдарат, 1997 ийыште лукмо 5 тӱжем теҥгеаш кагаз оксам регионышто веле огыл, чумыр элыштат шуко гана шекланеныт.