Советский районысо Шуймучаш ялышке газым пуртеныт. Икымше гана «канде тулым» колтымаш Йошкар-Ола гыч лийын. Тышке Регион вуйлатыше Александр Евстифеев ушнен. Шуймучаш ялышке газым кӱчык жапыште пуртен шуктеныт. «Верысе инициативылан полыш» программе да республикысе бюджет кӱшеш пашам икмыняр тылзыште шуктеныт, октябрьыште верысе администраций дене ойпидыш пеҥгыдемдалтын, идалык тӱҥалтыште тиде пашам мучашленыт. Ынде ялысе 10 утла  пӧртыштӧ газ уло. Ушештарыман, республикыште кодшо ийын Шернур, Куженер, Курыкмарий районлаште чылаже 500 утла пӧртышко «канде тул» толын. Тений пашам Куженер, Курыкмарий районлаште шуят, тыгак планыште газпуч-влакын проектыштым У Торъял, Оршанка районлаште ышташ, Советский, Звенигово районлаште чоҥаш тӱҥалаш.  

Шушаш рушарнян Марий Элыште игече вашталтеш, лум  шулаш тӱҥалеш. Кугарня гыч левешта. Тидын нерген синоптик-влак увертарат. Тиде кечылаште 15 градус марте йӱштӧ лиеш, но писе касвел мардежлан кӧра, йӱштынрак шижалташ тӱҥалеш. Тидын годым шокшынрак чияш кӱлеш. Рушарнян Марий Элыште поран ӱшташ тӱҥалеш, да чот левешта. 

Шернур район Марисолаште, Советский район Вечын селаште, Волжский район Сотнурышто тений тӱвыра пӧрт-влакым тичмаш тӧрлат. Тиде пашам «Культура» национальный проект дене шуктат. Тыгак республикыште ныл йоча сымыктыш школ-влакын модернизацийыштлан окса ойыралтеш. Куженер, Советский, Морко, Юрино йоча сымыктыш школ-влакын оралтыштым тӧрлат. Республикын районжо-влаклан автоклуб-влакым налыт: Волжский, Килемар, Куженер, Медведево, Оршанка, Параньга, Советский рӱдӧ клуб системылан. Йошкар-Олаште Марий кугыжаныш филармонийын полатшым чоҥымо паша теният каяш тӱҥалеш. 

Историк да этнограф Никандр Семенович Поповым «За заслуги перед Марий Эл» орденын медальже дене суапландареныт. Тидын шотышто указышке кидпалыжым регион вуйлатыше Александр Евстифеев пыштен. Никандр Семенович Попов – Валериан Васильев лӱмеш шанче-шымлыше институтышто кугурак шанче пашаеҥ. Тудо 40 ий утла финн-угор калык-влакын историй, тӱвыра, этнографийжым шымла, марий-влакын йӱлашт дене кылдалтше паша-влакын авторжо. Шанчызе 260 утла пашам савыктен, ятыр экспедицийыште лийын. Никандр Попов тыгак «Марийцы. Истрико-этнографические очерки» тӱшка дене возымо монографийын ик авторжо. 

Кагаз окса олмеш карте дене тӱлаш. Кызыт тиде йӧным шукын кучылтыт. Кевытлаште ятырын кагаз окса олмеш банк карте полшымо дене тӱлат. Черетыште - тӱшкан пайдаланыме транспорт. 1 январь гыч республикыште законышко пурышо вашталтыш вийым налын. Ынде перевозчик автобус да маршруткылаште карте полшымо дене тӱлаш терминалым шындышаш.  Кызытат южо маршрутлаште электрон йӧн полшымо дене тӱлаш лиеш. 

Козьмодемьянск администраций тулык да ача-аван попечнийже дечын посна кодшо йоча-влаклан илымверым ситарыме йодыш дене пашам эреак тӱткышыштӧ куча. Кодшо ийын нине категорий дене йоча-влаклан 11 пачерым налыныт. Чумыржо тидлан 10 миллион утларак теҥге ойыралын. Чыла пачер йӧнан, санитар йодмашлан келшен толыт, кажныштыже косметический ремонтым ыштыме. Идалык мучаште эше кум пиалан еҥлан Козьмодемьянскыште пачер дечын сравочым кучыктеныт. 

Курыкмарий районышто Кадышево ял воктене шӱкым сортироватлыше комплексым ыштен шуктышаш улыт. Ӱмаште август тылзыште инвестор, Козьмодемьянск ола да Курыкмарий район администраций-влак коклаште ойпидышым пеҥгыдемденыт. «Экологий» национальный проект дене республикыште лишыл ийлаште икмыняр вере шӱкым сортироватлыше комплекс-влакым ыштышаш улыт. Тиде Йошкар-Ола, Шернур, Курыкмарий, Морко. Идалык жапыште нине верлаште 150 тӱжем тонн шӱкым перерабатыватлаш тӱҥалыт. 

Тений   шошым Йошкар-Олаште Подольский курсант-влак да Медицинский урем-влакым тӧрлаш тӱҥалыт. Кызыт подрядчикым ойырымо аукцион эрта. Подольский курсант-влак уремыште - Машиностроителей гыч Анциферов урем марте - асфальтым вашталтат, Медицинский уремыште гын – Карл Либнехт гыч «Йошкар-Ола» оласе округын чекше марте. Нине корно-влакым тӧрлаш оксам оласе бюджет ойыра. План дене подрядчик 1 майыште пашам тӱҥалын, августышто мучашлышаш. 

Республикыште кодшо ийын корно туткарышке логалше-влакын чотышт ончылийсе дене таҥастарымаште, шагалемын. А теве йӱшӧ вуя руль ончыко шичше-влакын титакыштлан кӧра ышталтше корно туткар-влак шукемыныт. Марий ЭЛ ГИБДД виктем эртыше ийым иктешлен. Кундемыште 600 утла корно туткарыште 75 еҥ колен, 900 утла сусыргеныт. Корно правилым эскерыше службо йӱшӧ вуя руль ончыко шичше 2800 пудыртымашым шекланен. Йоча да самырык-влак кодшо ийын правилым сайынрак эскереныт, корно туткарышке, тылечын ончычсо идалык дечын, шагалрак логалыныт. 

Российысе Президентын грантшым налше-влакын лӱмышт пале улыт. Элна мучко чылаже 2 тӱжем утла проектым илышыш шыҥдарат. Тидлан 4 миллиардат 200 тӱжем тенге оксам ойырымо. Марий Эл гыч 9 организацийын проектшым сайлан шотленыт.  Тиде радамыште «Виктория» йоча музыкальный театр. Тысе коллектив Вячеслав Абукаев-Эмгакын «Юзо шиялтыш»  йомакше негызеш телеспектакльым шындаш тӱҥалеш. Спектакльым Республикысе курчак театрыште ончыктат. Видеоверсийжым школлаште, ИКН предметыште кучылташ тӱҥалыт. Тылеч посна тудым воткылыш луктыт. Кызыт   арняште икмыняр гана репетиций-влак каят. Кажне гана самырык артист-влак театр мастарлыкыштым веле огыл таптат, тыгак марий калыкын тӱвыраж дене палыме лийыт. Каласыман, спектакльыште чылт руш йоча-влак модыт. Нунылан марий йылмым, модышым, куштымашым муро-влакым тунемаш пеш келша. Ушештарыман,  1 февраль гыч президент грантым налаш шонышо-влак угыч йодмаш-влакым пуэн кертыт. Тидым 15 март йотке ыштен шуктыман.