Йошкар-Олаште илыше да коллектив-влакым «У Ий открытке»  фестиваль-конкурсышко ушнаш ӱжыт. Посна  участник але усталык ушем ик пашам веле пуэн кертеш. Открыткым сӱретлаш, тудым кагаз, куэм да вес материал гыч ышташ, тыгак компьютер графике полшымо дене ямдылаш лиеш. Кугытшо – А4 формат деч кугырак лийшаш огыл. Открыткым фотоаппаратыш войзен, тыгак лӱм, фамилийым, коллективым палемден, 16 декабрь марте, okcentr2010@mail.ru электрон адрес дене колтыман. Конкурсым 21 декабрьыште иктешлат.

8 декабрььыште Республикысе сӱрет сымыктыш тоштерыште Алевтина Шайдуллинан ончерже почылтеш. Тудлан «Расскажите, птицы…» лӱмым пуэныт. Экспозицийышке тӱрлӧ жапыште да тӱрлӧ материал гыч ямдылыме паша-влакым луктыт. Нуным ик теме уша – кайык-влак. Алевтина Шайдуллина тиде образым чӱчкыдын кучылтеш. Мутлан, пейзажышке кайыкым пурта але тудым курчакысе вургемын тӱрыштыжӧ ужаш лиеш. Кидмастар тӱрлӧ жанрыште пашам ышта – графике, пластике, но утларакше   тудым керамикыш сӱретлыше семын палена. Икымше художественный шинчымашым Алевтина Шайдуллина Йошкар-Оласе музыкально-художественный интернатыште налын. Вара Моско воктенысе Абрамцевский художественно-промышленный училищыште тунемын.

Марий Элысе сӱретче-влак ушемым вуйлатыше «За заслуги перед Марий Эл» орденын медальже дене палемдалтын. Республикын вуйлатышыже Александр Евстифеев «Российысе сӱретче ушемын» Марий Элысе  пӧлкажым вуйлатыше Евгений Ярановлан «За заслуги перед Марий Эл» орденын медальжым кучыктымо шотышто 30 ноябрьысе Указышке кидпалыжым пыштен. Тыге художникын сӱрет сымыктышым вияҥдымашке пыштыме  надыржым кӱкшын аклыме. Евгений Яранов республикыште ик  эн палыме сӱретче. Тудо пейзаж, портрет, натюрмортым воза.  Тӱҥ пашаже- влак сар темылан пӧлеклалтыныт.

У ий пайрем кечылаште «Йошкар-Ола-Москва» поездыште составым шагалемдат. Рейслаште фирменный купе да спальный манме вагон-влак огыт лий. Тидын нерген перевозчик шке официал тӱшкаштыже увертарен. Вагон-влакым 26 декабрь гыч кораҥдат. Вашталтышым эпидемиологий ситуацийым шотышко налын пуртеныт. Нине вагонлашке билетым налше-влак нуным пӧртылтен кертыт. 

Марий Элыште самырык корноинспектор-влак коклаште «Безопасное колесо» конкурс эртен. Тений тушко 18 команде ушнен. Пандемийлан кӧра тений практике таҥасымаш лийын огыл, тиде мутлан велосипедым виктарымаш. Агитбригаде-влакын конкурсыштат дистанционно эртен. Теорийым палыме йӧн тений тыгак ойыртемалтын. Онлайн-йӧн дене иканаште чыла команде-влак таҥасеныт. 

Йошкар-Олаште аварийныйлан шотлалтше 66 пӧртыште илыше-влаклан у йӧнан пачерым пуат. Кундемым вияҥдыме да чоҥымо программе дене  куд микрорайонышто у пӧрт-влакым чоҥат. Таче кечын мутлан, Гагарин проспект, Панфилов, Первмомайский да Успенский урем-влак коклаште микрорайонышто пӧрт-влакым нӧлташ чоҥышо дене ойпидышым ыштеныт. Тушто аварийныйлан шотлалтше кок пачашан 6 пӧртым пужат, еҥ-влаклан 3 ий жапыште у пачерым ойырат. Тиде кумдыкышто чоҥышо организаций 6 ийыште у пӧрт-влакым  нӧлтен шуктышаш. Оласе администраций эше кок ойпидышым пеҥгыдемден. Нунын дене Тыныслык,  Сталинград верч кучедалше герой-влак урем да Данилов бульвар коклаште, тыгак Чехов, Первомайский, Красноармейский, Яков Эшпай урем коклаште пӧрт-влакым ыштат. 

Советский районысо «У Илыш» озанлыкыште у презе вӱтам почыныт. Тыге у паша вер-влак ышталтыныт. Тидын дене пырля пашаеҥ-влаклан канаш пӧлем уло. Презе вӱта воктене тыгак ветеринар-влаклан тӱрлӧ процедурым ышташ вер лиеш. У сооруженийым чоҥаш 10 миллон утларак теҥге ойыралтын. 

Марий Элыште коронавирус дене кыдалтше йодышым рашемдаш call-центр пашам ышташ тӱҥалыт. Кызыт тушто 45 волонтер пашам ышта, нуно лӱмын тунемыныт. Эртыше кечылаште нуно пурышо 70 йодышлан вашештеныт. «122–ан»  номерышке сото телефон гычат, стационарный телефон гычат йыҥгырташ лиеш. 

Оперативный штабын данныйжым ончалаш гын, пытартыш суткаште республикыште 49 еҥын тиде вирус пеҥгыдемдалтын, ик еҥ ӱмыр лугыч лийын. Стационарлаште 1 тӱжемат 186 еҥ эмлалтеш, 372 еҥын Ковид-19. Российыште, пытартыш суткаште 29 тӱжем еҥын тиде вирус улмым пален налыныт. 

Черым шижтарыман. Шкем аралыман, да весылан лӱдыкшым ыштыман огыл. Марий Элыште 15 январь марте коронавирус инфекцийым шижтарыме шотышто посна ямде улмо режим. Тиде жапыште еҥ-влак маскым , перчактым чийышаш улыт, тыгак социал дистанцийым эскерыман. Роспотребнадзорын специалистышт тӱрлӧ организацийлашке, кевыт,   тоштерлашке рейд дене лектыт. Ты гана санитар врач-влак Йошкар-Оласе банклаште лийыныт. Пашам ыштыше да толшо-влак маскым чийыме режимым кузе шуктат, онченыт. 

Марий Элыште 153 инвалид пашам темлыше рӱдерын полшымо дене паша верым муын. Нунын гыч 5 еҥ квото дене, 45 еҥ жаплан тыршаш тӱҥалыныт. Тазалык дене эмганыше-влак экономист, сантехник, пашаеҥын полышкалышыже, автомашинам виктарыше да моло профессийыштат тыршат.