Регион-влакын газификацийыштым элын правительствыже ик эн кӱлешан социал йодыш семын акла. Россий Президент Владимир Путин 2024 да 2030 ийла марте субъектлашке газым пурташ планым ышташ темлен. Тидын нерген Россий Федераций Правительстве Председательын алмаштышыже Александр Новакын эртарыме совещанийыштыже ойленыт. Тудын пашашкыже регион вуйлатыше Александр Евстифеев ушнен. Пытартыш 15 ийыште регионлаште газификаций 53%  гыч 70% марте кугемын, тыгодым тиде пашам ешарыман. Президентын кӱштымашыжым шукташ, кундемыште газификаций шотышто пашаче группым ыштыме,  тидлан программе уло. Таче кечын Марий Элыште газификаций 89% шуэш. 

Марий кундемын 100 ийже лӱмеш уста да чолга еҥ-влакым палемдат. Мер Каҥаш акцийым увертара –  "100 ий – 100 шӱдыр". Пуымо спискыште 100 лӱм.  Нунын коклаште Сергей Чавайн, Иван Петров, Ксенофонт Сануков,  Александр Конаков, Тихон Ефремов да молат. Нине  еҥ-влак Марий Элым да марий калыкым чапландареныт да чапландарат. Нунын кокла гыч 10  еҥым палемдыза. Спискыште иктаж пагалыме  еҥ огеш сите гын, тудым шке ойырымо лу коклашке пуртен кертыда.
 Йӱклымӧ деч вара спискым рейтинг почеш савыктат. Йӱклымаш  Мер Каҥашын сайтыштыже  9 декабрьыште 12 шагатлан мучашлалтеш – mer-kanash.ru

Курыкмарий театр Мордовийын рӱдӧ олашкыже Саранскыш миен толын. Гастроль республикын 100 ияш лӱмгечыжым палемдыме кышкарыште эртаралтын. Мордовийысе калыкле драме театрын сценыштыже курык марий артист-влак кум спектакльым ончыктеныт. Нуным синхронно руш йылмыш  кусареныт. Кумытшат  республике да тӱнямбал кӱкшытан тӱрлӧ театр фестивальлаште ончыктымо улыт. Иктыже йоча-влаклан шындыме «Кутко сӱан».

Марий Элыште кокымшо декабрьыште онлайн-йӧн дене «Илаш! Йӧраташ! Ӱшанаш!» кокымшо антинаркотический форум лиеш. Мероприятий республикыште илыше-влаклан законым эскераш, лишыл еҥым йӧратараш, таза илыш дене илаш виктаралатын. Форум  тӱҥ  шотышто - профилактикылан эртаралтеш, самырык тукым специалист-влакын каҥашыштым колыштеш. «Илаш! Йӧраташ! Ӱшанаш» форум 9 шагатлан почылтеш, 17.00 шагатлан тудо петыралтеш. Тудо Юлтехын тӱҥ корпусшо гыч ончыкталтеш. 8 тематике площадкыште наркотик дене кучедалме да профилактике паша дене дискуссий-влак эртат.

Йошкар-Олаште переписьлан 82 участкым ямдылат. Ушештарена, калык чотым вес ийын апрель тылзыште шотлат. Перепись икмыняр йӧн дене эрта. «Кугыжаныш услуго» порталыште шке нерген данныйым возаш лиеш,  тыгак шошым элыште стационарный участке-влак лийыт. Тушко толын, переписьышке ушнаш лиеш, тыгодым пропискым огыт ончо. Участкыште бланкым возышо але кугыжаныш услуго порталыште шке нерген данныйым ончыктышылан кодым пуат. Тудым мӧнгӧ толшо переписчиклан ойлыман. Переписчикым «Российыште калык чотым возымашын» символикыже дене жилет, шарф, сумка да планшет палдараш тӱҥалеш. Калык чотым шотлымашын икымше иктешлымашыжым вес ийын шыжым ыштат. Ушештарена, перепись тений эртышаш ыле, но коронавирус пандемийлан кӧра, Россий Правительство тудым вес жаплан кусарен. 

Автоинспектор-влак тӱшкан пайдаланыме транспортышто пассажир-влакын маске дене улмыштым тергат. Кодшо кечылаште рейд жапыште 200 утла машинам шогалтеныт, 20 пудыртымашым шекланеныт. Кажне кечын ГИБДД патруль троллейбус, маршрутко, да автобус-влакым шогалта, пассажир да автомашинам виктарыше-влакын маске уло-укем терга. Правилым пудыртышо-влаклан штрафым пуат. Рейдлашке тыгак транспорт министерствын еҥышт да участковый-влак ушнат.

Озанлык-влак комбайн-влакым налыныт. Кодшо кечылаште пырчым погаш икмыняр комбайн республикышке толын. Ончыкыжым нуно «Победа» да Параньга районысо «Агрофирма Батыр» озанлыклаште, тыгак кок технике «Лукозышто» пашам ышташ тӱҥалыт. Нуным тӱрлӧ программе дене налыныт. «Лукоз» технике паркшым Марий Эл Республикын социал-экономике вияҥмашыже шотышто индивидуальный программе дене уэмден, вес кок озанлык «Росагролизинг» льгот программе дене.  Тений ноябрь мучашлан республикыште 651 единице техникым налыныт, тидыже, кодшо ий тыгаяк жап дене танастарымаште, ик пачашат 7 луашлан шукырак. Ялозанлык техникым уэмдаш республикын ялозанлык министерствыже полша. 

Республикыште лишыл 5 ийыште 58 ялышке «канде тул» толеш. Регион вуйлатыше Александр Евстифеев «Газпром» компанийын правлений председательже Алексей Миллер дене пырля уэмдыме программышке кидпалыштым пыштеныт. Тудо 2021-2025 ийлам авалта. Тиде жапыште республикыште 58 кундемым газифицироватлат. Инвестиций кугыт 4 миллиард утларак теҥгешке шуэш.

Марий самырык театр кодшо кечылаште Чебоксар олаште эртыше «Волжская сказка» фествиальышке миен. Тушто артист-влак  «Сӧсна поминка деч вара» сатирический комедийым ончыктеныт да 5 диплом дене палемделтаныт. «Эн сай эпизод роль» номинацийыште Зинаида Долговам саламленыт. Жюри шке спецпризшым Александр Кожевников, Игорь Актуганов, Валерий Григорьев да Артем Куклинлан кучыктен.

Коронавирус дене черланыше-влак шукеммылан кӧра, волонтер-влакын пашашт поснак йодмашан. Йошкар-Олаште доброволец-влакын штабышт уэш пашам ышташ тӱҥалын. «Мы вместе» российысе акцийышке ушнен, волонтер-влак илалше еҥ, тазалык дене эмганыше, шагал парышан да шуко шочшан еш-влаклан полшат.