Йоча-влакым у йӧнан автобус-влак шупшыкташ тӱҥалыт. Республикыште школ да кыдалаш тунемме вер-влакын вуйлатышыштлан регион вуйлатыше Александр Евстифеев у автобус-влак дечын сравочым кучыктен. Республикын правительствыже йоча-влакым школ марте лӱдыкшыдымылын кондыштарымылан кугу тӱткышым ойыра. Тунемме вер-влакын автобус паркыштым кажне ийын уэмдат, да ончыкыжымат тиде пашам шукташ тӱҥалыт. 

Лишыл кечылаште мемнан кудемыште йӱштӧ игече озаланаш тӱҥалеш. Уралыште кугу антициклон вийым налын, тудлан кӧра арня мучаш марте республикыште теле толмо шижалташ тӱҥалеш. Южын кокла температуржо тиде пагытлан келшыше дечын 6-9 градуслан йӱштырак лиеш. Йӱдым 18 гыч 23 градус марте йӱкшемда, кечывалым 10 гыч 15 градус марте йӱштӧ лиеш. Вес арняштат тыгаяк  игече аралалтеш. Марий Гидрометеорологий службо увертара: Йошкар-Олаште эн йӱштӧ декабрь 1978 ийыште лийын, тунам 31 декабрьыште 46 градус йӱштӧ лийын.  1955 ийыште 6-7 декабрьыштак 35, 36 градус марте йӱштӧ озаланен. Пытартыш 20 ийыште йӱштӧ декабрь 6 гана лийын: 2016, 12, 10, 09, 02, 2001 ийлаште. Россий Гидрометеорӱдерын данныйже дене, декабрь, январь тылзылаште игече жаплан келшыше лиеш гын, февраль да мартыште йӱштӧ лийшаш. 

Марий Турекын рӱдыштыжо - ош йӱксӧ гай полат. Ий Полатым 2011 ий 1 сентябрьыште почыныт. Спорт объект шинчымаш кече вашеш чапле пӧлек лийын. 9 ий жапыште тудо шке кӱлешлыкшым пенгыдемден. 2018 ийыште тыште, мутлан, 18 тӱжем утла еҥ лийын гын, ӱмаште - 23 тӱжем утла. Марий Турекысе Ий Полат Йошкар-Оласе "Дружба" стадионышто верланыше Ий полатым ушештара: кум пачашан зданий, кумда ий арена, тренажёр зал, буфет, врач да тренер - влаклан пӧлем-влак. Таче ты спорт сооруженийыште хоккей дене йоча да ветеран-влакын  командыштын тренировкышт эртат, ӱдырамаш-влак   стэп-аэробике дене заниматлат, пеҥгыде да мотор кап-кылым ышташ шонышо - влаклан тренажёр зал пашам ышта. Кажне кечын чыла кумылан-влак коньки дене мунчалтен кертыт. 

Марий Турекысе Ий Полатышке  пошкудо районла, тыгак Киров кундем да Татарстан республик гыч толыт. Ончыкылык планыште - фигурный мунчалтымаш дене секцийым почаш.

Йошкар-Олаште лумым эрыктыше технике парк пойдаралтын. Ноябрь тылзыште «Город» муниципал предприятий мини-погрузчик-влакым налын. У технике шыгыр верыште лумым эрыкташ келшен толеш, мутлан тротуарыште. Тыгак погрузчик-влакым лумым ӱшташ, ийым шулыктарыше материалым шыжыкташ кучылтыт. Таче кечын предприятийын паркыштыже 77 единице трактор да автомашина технике уло. Кодшо арняште лумым площадь да турист верла, кӱварла гыч лукташ тӱҥалыныт. 

Колызо-влак правилым эскерышаш улыт. Кугыжаныш инспектор-влак Изи Какшаныште профлактике рейдым эртареныт. Специалист-влак колызо-влаклан правилым шотышко налаш кӱлмым ушештареныт. Теве мутлан, Ширяйково микрорайонышто кӱвар тураште еҥ-влак чӱчкыдын лектыт, а тиде верыште ий пеҥгыдемын шуктен огыл.Специалист-влак шижтарат, ий сер воктене, кушкылан верыште, кӱвар тураште вичкыж. 

Вес ийын  Йошкар-Ола гыч Сочишке чоҥешташ сай йӧн лийшаш. Мемнан аэропорт гыч Сочи да Санкт-Петербруг олалашке маршрутлан 2021 ийлан субсидийым ойырат. Тиде данный Росавиаций сайтыште уло. Тидын дене келшышын, вес ий июнь тылзе гыч Марий Элыште илыше-влак Сочишке Йошкар-Ола гыч чоҥештен кертыт. Рейс-влак арняште кок гана сентябрь мучаш марте лийыт. 2021 ийыште Санкт-Петербругышко маршут тыгак арнялан кок гана лиеш. 

Кажне кечын эмлымверлашке 100 утла еҥ коронавирус але пневмоний дене логалеш. Эртыше суткаште республикыште 140 еҥым стационарышке пыштеныт гын, 165 еҥым эмлалтмеке, мӧҥгышт колтеныт. 10 стационарыште 1 тӱжемат 159 еҥ эмлалтеш, 366 еҥын коронавирус. 200 наре еҥ нелын черле. Пытартыш суткаште тиде черлан кӧра ик еҥын ӱмыржӧ кӱрылтын, 51 еҥын тиде вирусым пеҥгыдемденыт. 1 декабрьлан республикыште черланыше-влакын чотышт 7600 эртен,  93 еҥ колен.   

Кок ий гыч Волжск олаште у роддомым ыштен шуктышаш улыт. Икмыняр кече ончыч подрядчикым ойыраш электрон аукционым увертарыме. Пашам тӱҥалаш 330 миллион теҥге палемдалтеш. Тудын дене икымше да кокымшо пачашым нӧлтышаш улыт. Волжскышто у роддом кум пачашан лийшаш, тыгак тушто тачысе саманлан келшышын  медицин оборудованийым вераҥдат. План дене январь тылзыште тиде медицин учрежденийым чоҥаш тӱҥалыт, а 2022 ийыште шыжым пашам мучашлышаш улыт.  

Российыште изирак да кокла предпринимательствым эше ик ий тергаш огыт тӱҥал. Тидын нерген Премьер-министр Михаил Мишустин увертарен. Пандемий жапыште бизнесъеҥ-влак нелылыкыш логалыныт, садланак нунылан ончыкыжымат полшыман. Шошым Владимир Путин бизнеслан полшымо йӧн-влак нерген законыш кидпалыжым пыштен. Документ дене келшышын, пел ийыште бизнесъеҥ-влак НДС-ым гына тӱленыт.  Моло налогым вес жапыштат тӱлен кертыныт, тыгак пашадарлан але чот кӱлешлыклан кредитым але изирак процент дене займым налаш йӧн лийын. Панкрутышко нуным лукташ чарыме, тыгак план але план дечын посна тергымаш-влак лийшаш огытыл. Президент тиде мораторийым ончыкыжымат шуяш темлен. 

Декабрь гыч Российыште, тыгодым Марий Элыштат, икмыняр вашталтыш илышышке пурен.  Тыге мутлан, льгот дене пайдаланыше-влаклан «Кугыжаныш услуго» порталыште льгот нерген уведомлений-влак толаш тӱҥалыт. Тыгак нуно поезд да электричкылашке билетым интернет полшымо дене налын кертыт. Тидлан «Госуслуги» портал гыч перевозчикын сайтышкыже пурыман. 14 декабрь гыч еҥ-влак икмыняр вере пашам ыштат гынат, ик больничныйым налын кертыт. Электрон йӧн дене тудым налаш, шкем палдарыше документ да СНИЛС лийшаш улыт. Декабрь тылзе гыч медицин пашаеҥ-влак кугыжаныш услуго портал гыч ковид-пациент-влак дене пашам ыштымылан оксам налдыме шотышто вуйым шийын кертыт. Йодмашыште шке регионым да могай тылзылан окса тӱлалтын огыл палемдыман.