Наркоманий ваштареш. Тыгай шонымаш дене Йошкар-Олаште «Илаш! Йӧраташ! Ӱшанаш!» луман антинаркотический форум эртен. Тений тудо кокымшо гана лийын. Тиде кугу мероприятийлан ончылгоч ямдалалташ тӱҥалыныт. 100 наре спикер ден специалист да икмяняр оборудований. Онлайн форматыште эртыше кугу масштабан форум икымше опыт лийын.
Йошкар-Олаште эше ик у йочсад икшыве-влакым вашлиеш. Кугу Ачамланде сарыште Сеҥымашлан 70 ий темме лӱмеш бульварыште «Теплые ладошки» лӱман 320 веран йочасадым почыныт. У объектым «Демографий» нацпроект дене ыштыме. Тидлан 206 миллион теҥге ойыралтын. У йочасад чыла шотыштат йӧнан, зданий кӧргыштӧ да оралтын тӱжвал могыржо гыч видеокамере-влак улыт, пожар нерген шижтарыше сигнализацийым келыштарыме, пурымаште электрон замок-влак.
Балетым куштышо-влак «Душа танца» Россий балет суаптарым суленыт. Тений тушто 16 призым кучыктеныт. Тыге мутлан, «Рыцарь танца» номинацийыште «Бауман лицейын» директоржо Григорий Пейсахович сеҥен. Тиде тунемме вер ынде ятыр ий балет артист-влакым кушта. Эрик Сапаев лӱмеш опер да балет театрын артистше-влакат тиде конкурсышко ушненыт. Прима-балерина Екатерина Байбаева да премьер Артем Веденкин «Восходящая звезда» номинацийыште палемдалтыныт. «Душа танца» призым 1994 ийыште «Балет» журнал да Российын тӱвыра министерствыже ыштеныт. Тудым кажне ийын хореограф, композитор, дирижер, сӱретче да куштымаш нерген возышо журналист-влаклан пуат.
2021 ийыште Шернур, тыгак Курыкмарий район-влакым ыштымылан 100 ий темеш. Лӱмгечылан ямдылалтме нерген Указышке кидпалыжым регион вуйлатыше Александр Евстифеев пыштен. Тудын дене келшышын, лишыл жапыште оргкомитетым чумырат да мероприятий-влакын радамыштым пеҥгыдемдат. Шернур районым ыштыме кечылан 1921 ий 15 январь шотлалтеш. Тунам Шернур кантон ышталтын, тушко Виче губернийын Уржум да Яран уездше-влак пуреныт. 15 январьыштак Курыкмарий кантон ышталтын. Таче тиде район 1700 квадрат километр кумдыкым айла.
Марий Элыште 300 километр корным ышташ ешартыш шийвундым ойырат. «Сай качестван да лӱдыкшыдымӧ автомашина корно» национальный проект дене келшышын республике сай лектышым ончыктен. Кок ий жапыште палемдыме дечын утларак корным ыштеныт, 2019 ийыште план дечын 22 километрлан, 2020 ийыште 30 километрлан шукырак тӧрленыт, садланак вес ий-влаклан утларак корным ышташ шийвундым ойырат. Тыге план почеш 2024 ий марте республикыште 300 километр корным тӧрлышаш улыт.
Марий Элыште инвалид-влакын декадышт тӱҥалын. 10 декабрь марте тидлан пӧлеклалтше акций-влак лийыт. Тачысе кечын республикыште 63 тӱжем утла тазалык шотышто эмганен виянше еҥ ила, тидын радамыште 2751 йоча. Кажне ийын инвалид-влакын декадышт вашеш республикыште мер ушем-влакын вашлиймашышт, йыргешке ӱстел-влак эртат. Тений тӱшка мероприятий-влак огыт лий, тыгодым социал рӱдерлаште изирак тӱшка дене , южо вере онлайн-йӧным кучылтын тӱрлӧ мероприятий-влак эртат. Тыгак видеоролик-влакын презентацийышт лийыт.
Республикыште илыше-влак кучем еҥ деке корно йодыш дене лектыт. Пытартыш арняште регионышто социал кыллаште корно, тазалыкаралтыш, илымвер-коммунал озанлык, кундемым тӱзатыме, социал аралымаш йодыш-влакым пуат. Мониторингым «Инцидент-менеджмент» автоматизироватлыме системе эртарен. Чылаже 190 йодыш пурен, кажныжлан вашмутым пуэныт да умылтареныт. Ушештарена, системе граждан-влакын вуйшиймашыштым шотышко налеш да кӱлеш ведомствылашке вашмутым пуаш колта. Эртыше арняште эн шуко йодыш Йошкар-Ола да Козьмодемьянск оласе администрацийлан, тазалыкаралтыш, туныктыш да шанче, социал вияҥмаш министерствылан пурен.
«Педагогический дебют» конкурс иктешлалтын. Тушко республикысе 26 самырык туныктышо да нунын наставникышт ушненыт. Конкурсым эртымеке, сеҥыше-влакын лӱмышт пале лийын. «Самырык туныктышо» номиацийыште Медведево поселкысо 2-шо номеран школышто математике да информатикым туныктышо Николай Андреевич Сморкаловым, «Самырык воспитатель» номинацийыште Йошкар-Оласе 39-ше номеран йочасадын воспитательже Березина Дарья Петровнам палемденыт. «Педагог-наставник» семын Звенигово районысо Красногорский йочасадын кугырак воспитательже Гузель Минулловна Латфуллинам саламленыт.
Мемнан кундемыште граждан-влакын социал полышлан, кугыжаныш да муниципал учреждений-влаклан, тушто тыршыше-влаклан пашадарлан тӱлаш оксам ситышын ойырат. Тиде да моло нергенат Россий финанс министр Антон Силуанов дене эртарыме совещанийыште пале лийын. Республике дечын видеоконференцийышке Александр Евстифеев ушнен. Министр ушештарен: регион-влак социал-кӱлешан виктыш дене роскотым шотышто кучышаш да жапыште шийвундым ойырышаш улыт.
Йошкар-Олаште аэровокзалын у терминалжым чоҥаш тӱҥалыт. Тудым Россий Правительстве дене пеҥгыдемдыме Республикым социал-экономике могырым вияҥдыме шотышто индвидуальный программышке пуртымо. Терминалын проектшым ыштыме шотышто конкурсышто Санкт-Петербург гыч институт сеҥен. 24 ноябрьыште Марий Элын транспорт да корно озанлык министерствыже да «Ленаэропроект» акционер ушем кугыжаныш контрактым пеҥгыдемденыт, тудо 59 миллион теҥгешке шуын. Совещанийыште регион вуйлатыше да правительстве еҥ-влаклан ончыкылык аэровокзалын эскизшым ончыктеныт. Комплекс 400 пассажирлан келыштаралтын. Тушто толшо да вес олашке кайыше-влаклан посна пӧлем-влак улыт. Проект почеш тыгак кевыт, кафе, ава да икшывын пӧлемже, медпункт, санитар комнате-влак лийыт.
