Йошкар-Оласе историй тоштер пелен ыштыше Турист-увер рӱдер «Твой сувенир — YOur souvenir» проектым илышыш шыҥдара. Ты проект дене тудо Марий Эл Республик вуйлатышын республикыш толын коштмо да республике деч ӧрдыжкӧ лектын коштмо туризм сферыште увертарыме грантым сеҥен. Регионыш толын коштшо турист-влакын республикын символикыже дене кылдалтше сувенир-влакым ямдылат.
Регион-влаклан йоча выплатым тӱлаш 34 миллиард теҥгем ойырат. Тидын шотышто постановленийым кушкыжмын премьер-министр Михаил Мишустин пеҥгыдемден. Документ дене келшышын, тидыже йоча шочмаш шукеммаш дене кылдалтын. Таче кечын тиде выплатым кум миллион наре еҥ налеш. Тудо йочалан илен лекташ ситыше кугытын пелышкыже шуэш. Элыште кокла шот дене тиде 5 тӱжемат 500 теҥге.
Школышто тунемше-влаклан кокымшо тӱнямбал сар тӱҥалме шотышто урок. 2 сентябрьыште таче республикыште Сеҥымашын 75-ше идалыкше да Тӱнямбал сарын мучашлалтмыжлан пӧлеклалтше акций да урок-влак тӱҥалыныт. Нунын тӱҥ шонымашыже-самырык-влаклан историй шотышто чын уверым намиен шукташ. Тӱнямбал кӱкшытан сар 1939 ий 1 сентябрьыште тӱҥалын, 6 ий гыч 2 сентябрьыште мучашлалтын. Тушко 60 эл ушнен, сарзе действий 40 утла элыште каен, 55 млн наре еҥ сӧй пасушто вуйжым пыштен.
Оршанка районышто «Образований» национальный проектын «Кажне йочан сеҥымашыже» федерал проект дене ешартыш шинчымашым пуымо шотышто утларак йочам шуарат. Йоча усталык пӧртыштӧ технике могырым вияҥдыше кружоклан оборудованийым ойыреныт. Тушто ӱдыр-рвезе-влак «Медиацентр» да «Мир фото и видео» программе дене ешартыш шинчымашым налын кертыт.
Йошкар-Олаште корным веле огыл, тыгак йолешке-влакын коштмо верыштым тӧрлат. Кызыт паша Зарубин уремыште кая. Первомайский гыч Лобачевский урем марте чётан пӧрт-влак могырышто пашам шуктат. Тений «Оласе йӧнан средам ыштымаш» федерал проект дене рӱдӧ олаште икмыняр кумдыкым ыштышаш улыт. Нунын радамыште- Ю.Свирин лӱмеш сквер, тудо Суворов урем могырым авалта. Тыгак йолешке-влаклан келыштарыме 10 тротуарым тӧрлышаш улыт.
Республикыште ялозанлык - экономикым вияҥдыше отрасль. Таче кечын озанлык-влак регионышто ыштен лукмо валовый продукт гыч 20% луктыт. Ялозанлык пашаеҥ-влак коллегийыште пашаштым иктешленыт, тыгак ончыкылыклан планым ыштеныт. Шылым ыштен налме, пакчаскам да пареҥгым куштымо дене мемнан республике Юл кундемысе федерал округышто ончыл верыште. Ялозанлык пашам вораҥдараш, але тӱҥалаш шонышо-влаклан кугыжаныш полыш ойыралтеш.
Республикыште ОРВИ дене черланыше-влак шукемыт. Роспотребнадзорын республикысе виктемже увертара: пытартыш шым кече жапыште 1900 наре еҥ эмлымверышке толын. Арня еда черланыше-влакын чотшо 4 процентлан кушкеш. Врач-влак ушештарат: нер ӱпш йомеш, кугу температур да кокыртыш уло гын - тиде коронавирус инфекцийын палыжат лийын кертеш. Тыгай годым врачым ӱжман. Марий Элыште кызытеш грипп уке. Коронавирус нерген ойлаш гын, 2 сентябрьлан тиде диагнозым республикыште 17 еҥлан шынденыт, инфекционный стационарлаште 350 утла еҥ эмлалтеш, 9 еҥ шодын искусственный вентиляцийыште.
Ий вид дене регионысо спорт школ у оборудований дене пойдаралтынИй вид дене регионысо спорт школ у оборудований дене пойдаралтын. Тыгак тушто ийым ыштыше машинам налыныт. Шергакан техникым «Демографий» национальный проект дене «Спорт-норма жизни» федерал проект ойырымо субсидий кӱшеш налыныт. Машина спортсмен-влакын тренировкышт дечын вара ийым тӧремда. Ушештарена, ий вид дене спорт школышто самырык фигурист да хоккеист-влак шуаралтыт, тыгак тушто тазалыкым пеҥгыдемдыше спорт группо-влакат улыт.
Республикысе исправительный колонийлаштат у тунемме ий тӱҥалын. Тушто парк коклаштке 200 наре еҥ шинчын. Таче кечын кастене-вечерний школ да тунемме-консультаций пункт-влак кажне колонийыште улыт. Эрык дечын посна кодшо южо еҥын аттестатште уке. 350 наре еҥ у тунемме ийыште профессионал шинчымашымат налаш кумылаҥын. Августышто колонийласе школ-влак тергымашым эртареныт. Туштат улшо правил дене келшышын тунеммашым эртарат. Пурымо годым температурым висат, моло санитар правилым шотышко налыт.
Йошкар-Ола-Козьмодемьянск кугорным федерал погыш кусарыме. «Поветлужье» корнын ужашыже-Угарман областьын чекше деч Йошкар-Ола марте 167 меҥгыш шуйна. У трасса регионласе ныл корным уша. Тиде Копорулиха- Подгорный- Угарман областьын чекше марте 8 меҥге, Озёрки- Марьино- Юрино- 47 меҥге, Йошкар-Ола- Козьмодемьянск 92 меҥге да Йошкар-Олам йыр савырныме корно.
