28 август эрлан республикыште эмлымверлаште коронавирус да тудын лийын кертме лӱдыкшӧ дене 279 еҥ эмлалтеш. Нине еҥ-влак гыч 105 коронавирус пеҥгыдемдалтын. Ик кечылаште стационарышке 37 еҥым пыштеныт, 27 еҥым колтеныт. Оперативный штабын данныйже дене, 28 августлан республикыште 17 еҥын лабораторно тиде вирусым пеҥгыдемденыт. Пандемий тӱҥалме дечын вара черланыше-влакын чотшто 4211 шуын, 39 еҥ колен, 3763 эмлалтын.
Сорла тылзын коло кандашымше кечынже Кинде Илян кече палемдалтеш. Тиде кече шурно пырчын амбарыш пурен вочмыжым ончыкта. Руш православий йўлам кучышо-влак тиде кечым Шнуй Юмынаван Успений кечыже маныт. Южо кундемыште тиде кечын шӱгарлаваке тоштыеҥым ушташ коштыт.
1 сентябрь лишемеш. Ӱдыръеҥым школышко погаш, эрге йоча дене таҥастарымаште, тений шулдырак лийын. Тидым Маристат шотлен луктын. Специалист-влак школ сату да вургемлан акым шотышко налын, статистикым ыштеныт. Ӱдырым школышко погаш кокла шот дене 9424 теҥге кӱлеш, эрге йочам гын 10213 теҥге. Тидым шотлымо годым школлан вургем, сумка, йолчием, физкультур уроклан формым, тыгак канцеляр сату да пеледышын акшым шотышко налыныт.
Тений октябрь тылзыште У Торъял районышто у модельный библиотекым ыштен шуктат. Тудым «Культура» национальный проект дене чоҥат. Кодшо кечылаште Марий Элыште тӱҥ федерал инспектор Павел Волков тушто паша кайымым аклен. Тыгак тудо Юл кундемысе федерал округышто Россий Президентын ӱшанеҥын кӱштымашыже дене калык дене вашлийын. Приемышто район администраций да У Торъял районын прокуратурыж гыч еҥ-влак лийыныт. Районышто илыше-влакым тӱрлӧ йодыш тургыжландара: яллашке газым пуртымо, «школ маршрут» дене корным ыштыме да молат. Районышто илыше ик еҥ У Торъялыште физкультур-спорт комплексым ыштен шуктымо шотышто тургыжланен йодын. Объектым 2012 ийыштак ышташ тӱҥалыныт, но 2016 ийыште ыштымым чарненыт.
Йошкар-Олаште магистральный объездной корным улшо план дене келшышын ыштат. Регион вуйлатыше А.Евстифеев Киров-Строителей уремым ушышо корным ыштымаште лийын. Ик арня ончыч регион вуйлатыше генеральный подрядчиклан «дорожный картым» жапыште огыл шуктымо шотышто шижтарен. Тунам А.Евстифеев пашам писештараш да график дене келшышын шукташ кӱштен.
Республикын 100 ийже вашеш курыкмарий йылме дене антологий-влак лектыныт. Марий книга савыктыш ныл книгам луктын. Тиде «Калевала» - карел да финн калык-влакын эпосшо. Тудым шке жапыштыже курыкмарий йылмышке Геннадий Матюковский кусарен. Марий автономийын 100 ийже вашеш лукмо вес книга- палыме писатель Мишши Юхма дене возымо йомак-повесть. Эше ик антологийышке Российыште илыше финн-угор писатель-влакын сылнымутыштым пуртеныт. Ныл книгамат ик дизайн дене ыштен, моткоч чот сылнын сӧрастареныт.
МЭТР телеканалыште лекше передаче-влак шукемыт. Шочмо 31 август гыч тудо у паша радамышке кусна, у тургымым тӱҥалеш. Марий йылме дене передаче–влак 6 шагатлан тӱҥалыт, 6.30 минутлан «Тыланем мый тыланет» у программым ончыза, тушко саламлымашым кажныже колтен кертеш. Кажне паша кечын вӱдышӧ-влак Лира Матвеева, Наталья Ямаева да Жанна Федорова ончышо-влакын мурсаламыштым намиен шуктат. 7 шагатлан «Утро на МЭТР» тӱҥалеш, руш йылме дене лекше эр эфирым ончыза.
Республикыште шуко пачеран 1400 наре пӧрт да учреждений йӱштӧ толмо жаплан ямде. Илымвер-коммунал озанлыкын шокшым пуымо жаплан ямде улмыжо нерген Российысе регион-влакым вияҥмышт шотышто Правительственный комиссий президиумын онлайн- заседанийыштыже каҥашеныт. Тачысе кечылан республикыште шуко пачеран 3 тӱжем утла пӧрт да 443 котельный ямде.
Марий Элышке грипп дечын вакцинын икымше партийже толын. Санитар врач-влаклан 40 тӱжем утла дозо вакцине толын. Тиде йоча-влаклан кӱлмо йодмаш гыч 50 %. Икмыняр жап гыч кугыеҥ-влаклан вакцине толеш. Прививкым сентябрь тӱҥалтыште ышташ тӱҥалыт. Тидыже вес арняште. Ончыч привикым йоча-влаклан шындаш тӱҥалыт.
Марий Элыште коронавирус дене черланыше-влакын чотшо шагалемеш гынат, стационарлашке нелын черланыше-влак логалыт. Тидын шотышто Тазалык аралымаш министерстве еҥ-влаклан санитар правилым шукташ кӱлмӧ нерген ушештара, тӱшка верлаште шагалрак коштса, маскым чийыза, кидым шовын дене сайын мушман, антиспетикым кидышке шыжыктыман. 27 август эрлан республикысе инфекционный стационарлаште 269 пациент эмлалтеш, 260 еҥын пневмоний, 106 еҥын коронавирус инфекций пеҥгыдемдалтын, 78 еҥ нелын черле. Ик суткаште 31 еҥым госпитализироватленыт гын, 22 пациентым эмлалтмеке, мӧҥгышт колтеныт. Оперативный штабын уверже дене, 27 августлан 16 еҥын лабораторно коронавирус пеҥгыдемдалтын, ик еҥ ӱмыр лугыч лийын. Пандемий тӱҥалме дечын вара черланыше-влакын чотшто 39 лийын.
