Марий Элыште коронавиурс инфекцийым шижтарыме дене посна ямде улмо шотышто режимым 27 сентябрь марте шуеныт. Тидын шотышто указым Александр Евстифеев кугарнян пеҥгыдемден. Регион коронавирус инфекцийым шагалемдыме шот дене чарымашым кораҥдыме кумшо этапыште. Таче кечын туныктышо, тӱвыра, спорт учреждений-влак пашам ыштат, парк, сквер, кафе, ужалыше рӱдер-влак почмо улыт. Тыгодым тушто санитар-эпидемиологий правилым шуктыман. Тӱшка верлашке да транспортышто маскым чийыман да социальный дистанцийым кучыман. 

Килемар районысо Визимьярыште у йочасад шке омсажым почеш. Тудо Новый урем 1 «Б» адрес дене верланен. Тушто 50 верым ыштеныт. У зданийыште пищеблок, медицин блок, музыкальный да методический кабинет-влак улыт. Йочасадым у мебель да инвентарь дене пойдарыме.

  Шкетан лӱмеш марий драме театрын артистше-влак Крымышке чоҥештеныт. Тушто «Крымская театральная осень» Российысе национальный театр-влакын фестивальже эрта. Тудо Сеҥымашын 75-ше идалыкшылан пӧлеклалтын. Марий театрын артистше-влак 5 сентябрьыште Керчь оласе «Корабел» тӱвыра полатын сценыштыже Александр Островскийын «Снегурочка» спектакльжым ончыктат.  Фестивальышке тыгак Чеченский республике, Калмыкий, Татарстан, Чуваший, Тува, Башкортостан, Карелий гыч коллектив-влак чумыргеныт. Тушто руш да совет жапысе классик-влакын произведенийышт дене спектакльым ончыктат.

Марий Элыште кажне кечын коронавирус дене черланыше еҥ-влак тиде шучко черым сеҥат. Тидын годым инфекционный стационарлаште эмлалтше-влакын чотшо огеш шагалем, пытартыш кечылаште шукемеш веле. Таче кечын коронавирус але тудын лийын кертме лӱдыкшӧ дене стационарыште 370 утла еҥ эмлалтеш. Шуко еҥын пневмоний. Пандемий тӱҥалме дечын вара республикыште 40 утла еҥ тиде черлан кӧра ӱмыр лугыч лийын. Кече еда специалист-влак 15-17 еҥлан «коронавирус» диганозым шындат. Тачысе эрлан 17 еҥын тиде диагноз пеҥгыдемдалтын. Стационарлаште 374 еҥ эмлалтеш.

Рушарнян кумылан-влак Йошкар-Олаште грипп дечын прививкым ыштен кертыт. Кажне каныш кечын 6, 13, 20 да 27 сентябрьыште грипп дечын прививкым ышташ лиеш. Тӱҥжӧ пелен полис да, уло гын, прививочный сертификат лийшаш. Вакцинацийым эртарыме жап-  9 гыч 13 шагат марте. 1-ше номеран поликлиникын автомашиныштыже «Прививки от гриппа» возымым ужаш лиеш. 7 сентябрь гыч кумылан-влак Поликлиникын 3-шо номеран филиалыштыже , а тудо Вашский урем – 7 адрес дене верланен, кажне кечын прививкым ыштен кертыт. Прививкым яра шындат. 

Волжскышто школын у корпусшым почшаш улыт. Тыгак оласе йӧнан средам ыштыме шотышто российысе конкурсышто сеҥыме проектым илышышке пурташ палемдат. Регион вуйлатыше Александр Евстифеев 5-ше номеран школын чоҥалтше кокымшо черетшым ончалын. Тушто пашам лишыл жапыште мучашлат. Икмыняр жап ончыч регион вуйлатыше Волжскыш миен. Тидын дечын вара школышто у оборудованийымат вераҥдаш тӱҥалыныт. Александр Евстифеев физике, химий, биологий кабинет, актовый да спортивный залым ончен, школ йыр кумдыкым аклен. 

Марий Элыште у тунемме ий тӱҥалме дене ийготыш шудымо-влаклан «комендат шагатым» пуртат. 1 сентябрь гыч 18 ияш марте йоча-влак 22 шагат гыч 6 шагат эр марте тӱшка верлаште ача-ава але законный представительышт дечын посна коштшаш огытыл. Йоча-влак тиде законым пудыртат гын, ача-ава-влаклан штрафым пуат.

Республикысе ялозанлык-экономикым вияҥдыше отрасль. Таче кечын озанлык-влак регинышто ыштыме валовый продукт гыч  20 процентшым луктыт. Ялозанлык пашаеҥ-влак коллегийыште пашаштым иктешленыт, тыгак ончыкыклан планым ыштеныт. Шылым ыштен налме, пакчаскам да пареҥгым куштымо дене мемнан республике Юл кундемысе федерал округышто ончыл верыште. Ялозанлык пашам вораҥдараш, але тӱҥалаш шонышо-влаклан кугыжаныш полыш ойыралтеш. 

Шанче да профессионал кадрым ямдылымаш, тыгак национальный проект-влакым илышышке пуртымо, да регионын экономикыжым вияҥдыме шотышто шанче пашам виктарыме йодыш-влакым черетан вашлиймаште каҥашеныт. Тудым регион вуйлатыше Александр Евстифеев «Юл кундемысе технологический университетын» туныктышо да ончылъеҥышт дене каҥашен. Тений тиде кӱшыл тунемме верыште бакалавриатыште очно тунемше-влаклан бюджет верым шукемденыт.