Республикысе курчак театр шке тургымжым тӱҥалын. Корней Чуковскийын йомакше дене «Крокодил» спектакльым луктыныт. Тудым «Театры-детям» федерал проект дене шынденыт. Спектакльым Кострома гыч режиссер Михаил Логинов шынден. Ты марте тудо Йошкар-Оласе театрыште 2017 ийыште «Бамбуковый остров» спектакльым ямдылен.
Класс вуйлатыше-влак 1 сентябрь гыч ешартыш оксам налаш тӱҥалыт. Российыште школ вуйлатыше-влаклан кажне тылзын 5 тӱжем теҥгем пуат. Россий Президент Владимир Путин тыгай темлымашым икмыняр тылзе ончыч ыштен. Тыгодым регионышто улшо выплате-влакат аралалтын кодшаш улыт. Просвещений министерстве увертара, федерал бюджет гыч класс вуйлатыше-влаклан оксам тӱлаш 73 млн теҥге палемдалтеш. Тудын кугытшо классыште мыняр йоча улмым, шотышко налаш огыт тӱҥал.
1 сентябрь гыч тӱҥалтыш класслаште шинчымашым погышо-влакым яра пукшаш тӱҥалыныт. Тидым Россий Президент Владимир Путин Федеральный Собранийлан обращенийыштыже ойлен. Марий Элыште тидлан чылажат ямде. Школлаште пищеблокым ямдыленыт, кулмӧ семын у оборудованийым налыныт. Туныктыш да шанче министерстве 1 сентябрь гыч шокшо линийым почын.
«Марий Эл Радио» кеҥеж фотоконкурсым иктешлен. Икмыняр арня жапыште конкурсышко ушнышо-влак кеҥеж жапыште ыштыме фото-влакым колтеныт. Конкурышко республикын тӱрлӧ районлаж гыч паша-влак пуреныт. Фото-влакын озаштлан «РИО» ужалыше пöрт деч модыш набор, самокат, кум ораван велосипедым кучыктена. Сеҥыше-влак радамыште - Провой кундем Ташнур ял гыч Марина Дружинина! Морко район Кораксола гыч Венера Кириллова ден Ярослав Гаврилов! Шернур район Кучанур ял гыч Лиза Соловьева!
Коронавирус дене кылдалтше чарымашым уэш лушкыдемденыт. Регион вуйлатыше А.Евстифеев Республике правительствын постановленийышкыже ешартышым пуртен. Документ дене келшышын, Россий Федераций да Марий Элысе сборнйыште шуаралтше спортсмен-влакым ямдылыше спорт объект-влак тичмашнек пашам ыштен кертыт. Ты марте нуно палемдыме кугыт гыч 50 процентшым веле пуртен кертыт. Тыгак гостинице, пансионат, каныме базе, санаторий, идалык мучко пашам ыштыше йоча лагерь-влак, республикыште верланыше санаторно-курортный оргнизаций-влак пандемий дечын ончысо семынак еҥ-влакым вашлийын кертыт.
1 сентябрьыште икымше гана парт коклашке 9930 ӱдыр-рвезе шинчын. Республикыште 252 школ тунемшым вашлийын. Тений Марий Элыште у школым чоҥен шуктеныт. Йошкар-Оласе 31 номеран школ 825 верлан ышталтын. Школын зданийжым Удмуртийын Ижевск оласе семын типовой проект дене ыштеныт. Пашалан 270 млн наре ойыралтын. Школ воктене спортплощадке, каныме вер уло. Учрежденийым оборудований, мебель дене пойдараш консолидированный бюджет гыч 100 млн теҥге ойыралтын. Таче кечын школышто туныктышо-влак 99 процентлан ситат, тыгодым музыкым, рисованийым, тӱҥалтыш классым туныктышо-влакын ваканскийышт уло. Школышто 41 классым чумыреныт, тышечын 10 - икымше.
Школлаште ешартыш шинчымашлан вер-влакым ыштат. «Кажне йочан сеҥымашыже» федерал проект дене тений туныктымо 45 учрежденийыште 3072 верым ышталтын. Йоча-влак физкультур-спорт, естественно-научный, турист да краеведений, технике, художественный, социал-педагогике могырым ешартыш шинчымашым налаш тӱҥалыт. Таче кечын районлашке у оборудованийым конденыт. Тиде «Робототехнике», «Лӱдыкшыдымылык школ», «Киностудий», «Школ лесничестве» программе дене.
Калыклан юридический полышым пуымо опыт вес регион-влаклан пайдале лийын кертеш. Тидын шотышто Марий Элын вуйлатышыже А.Евстифеев Кугыжаныш Погын дечын Федераций Советыште сенатор Сергей Мартынов да Республикысе кугыжаныш погынын председательже Анатолий Смирнов дене вашлийын мутланен. Мемнан республикыште «Граждан-влаклан юридический полышым яра пуымо шотышто» законым 2003 ийыште пеҥгыдемденыт. Федерал кӱкшытыштӧ тудо 2011 ийыште веле лектын.
Марий Элыштат «Кино йӱд» российысе акций лийын. Йошкар-Олаште акций «Дубки» микрорайонышто Россий Армий тӱвыра полатыште, тыгак «Октябрь» да «Синема-Эл» кинотеатрыште лийын. «Кино йӱд» Куженер, Морко, Килемар, Медведево, Звенигово районлаште да Волжск олаште эртен. Чыла площадкылаште Роспотребнадзорын темлымашыжым шотышко налыныт. Тений акцийышке ушнышо-влак российыште ыштыме кум фильмым акленыт.
Йошкар-Оласе аэропортышто у терминалым ышташ палемдат. Тидлан оксам федерал бюджет гыч ойырышаш улыт. Кугыжаныш погын депутат-влакын заседанийште транспорт да корно озанлык министр Александр Герасименко увертарен. Кызыт чоҥымашым тӱҥалме шотышто келшымашым ыштат.
