Республикысе рӱдӧ юмынйӱла ушемын у вуйлатышыже. Шуматкечын онаеҥ-влакын черетан погынымашышт лийын. Тушто оргнизацийын у вуйлатышыжым сайленыт, тыгак уставышке ешартышым да вашталтышым пуртеныт. Тыге онаеҥ-влак шке ушемыштым ик ой дене Александр Бирюковлан вуйлаташ ӱшаненыт.
Марий Эл «Профессиональный доходлан налог» посна налог режим шотышто экспериментыш ушнен. Тудо 6 сентябрьыште тӱҥалын.
Профессиональный доходлан налог – тиде ешартыш налог огыл, а самозанятый-влаклан у специальный налог режим. Тудын дене 10 ий пайдаланаш лиеш. Тушко еҥ-влак шке кумылын куснен кертыт.
Ондалалтше дольщик-влакын йодышышт рашемммыштым регион вуйлатыше А.Евстифеев эреак терга. Регион вуйлатыше Йошкар-Олаште чоҥен шуктыдымо объект-влакым ончен. Тиде Красноармейский да Первомайский уремлаште пӧрт-влак. «Оршанский» микрорайонышто 84 пачеран пӧрт дене пай дене чоҥаш 31 ойпидышым ыштеныт. 10 августышто у чоҥышо дене келшымашым ыштеныт.
Республикысе калык усталык рӱдер «Куштымаш арням» эртареныт. Тудо 27 август гыч 3 сентябрь марте лийын. Ик арня жапыште «Марий Эл радиошто» куштымаш семым колын, кумылан-влак шке куштымыштым видеош возен, калык усталык рӱдерышке колтеныт.
Республикысе тӱвыра, печать да калык-влакын пашашт шотышто министрын алмаштышыже Михаил Матвеевлан «Марий Эл тӱвыран сулло пашаеҥже» чап лӱмым пуымо. Тидын шотышто Указым регион вуйлатыше Александр Евстифеев 3 сентябрьыште пеҥгыдемден. Михаил Иванович республикыште веле огыл, марий тӱняште палыме еҥ. Тудо Кўшыл шинчымашым Марий кугыжаныш университетыште налын.
Республикыште пытартыш суткаште 16 еҥын коронавирус пеҥгыдемдалтын. Тидын нерген оперативный штаб увертара. Республикыште инфекционный стационарлаште 416 еҥ эмлалтеш, 400 утлажым пневмоний. Пандемий тӱҥалме дечын вара республикыште 4375 еҥын тиде инфекцийым пеҥгыдемденыт. Лабораторно пеҥгыдемдалтше инфекций гыч 70% кум мунициапал районышто Йошкар-Ола, Медведево район да Волжксий районышто. Инфицироватлатше-влак 1664 еҥ але 38% пӧръеҥ-влак, 2695 - 61 % ӱдырамаш-влак. Шукын коронавирус дене ешыште да лишыл еҥ-влак дечын черланеныт. Лабораторийлаште 121 тӱжем утла тестым ыштеныт.
Республикыште йоча-влакын кеҥежымсе каныме да тазалыкым пеҥгыдемдыше жапыштым мучашленыт. Тений Марий Элыште 5 лагерь пашам ыштен. Тушто 961 йоча канен. Тений лагерьлаште каныме жап кодшо ийла дечын ойыртемалтын. Чыла организацийлаште йоча да пашаеҥ-влак ик кечын толыныт. Лагерьлаште пашам ыштыше 200 утла сотрудник COVID-19–лан тестым ыштен, чыланыштынат тудо отрицательный лийын. Каныме верыште йоча-влак коклаште тӱшка мероприятийым чареныт, ача-ава дене вашлийме кече лийын огыл, тӱрлӧ отряд-влак икте-весе дене вашлийын огытыл.
Боксер-влак у залыште шуаралтын кертыт. «Олимпиаде эҥертыш семын лӱмын ямдылыше тӱрлӧ видан спорт школын» бокс пӧлкаже «Лесмаш» спорт залышке куснен. Тудо Йошкар-Оласе Суворов уремыште верланен. Ты марте спортсмен-влак дзюдоист-влак дене пырля ик залыште шуаралтыныт. Спорт, туризм да самырык-влакын политикышт шотышто министерствын тыршымашыжлан кӧра спортсмен-влаклан шуаралташ сай йӧн ышталтын.
Марий кундемын 100 ияш лӱмгечыж вашеш ший оксам луктыт. Россий Банк Марий автономийым ыштымылан 100 ий темме лӱмеш шарнымашан 3 теҥгеаш оксам ыштен. Тидым банкын пресс-службыжо увертара. Ший оксан ик могырыштыжо – Россий Федерацийын кугыжаныш гербше. Все могырыштыжо – марий вургем дене шӱвырым шоктышо пӧръеҥ да марла куштышо ӱдырамаш.
Марий Эл гыч 12 самырыкеҥ Worldskills Russia конкурсын финалышкыже ушна. Национальный чемпионатын черетан этапше тений дистанционно-очно эрта. «Самырык профессионал-влакын» чемпионатше Российыштат, тӱнямбал кӱкшытыштат ик эн тӱшка да кумда лиеш. Тушко Российын 83 субъектше шыч 2800 наре еҥ ушна. Профессионал мастарлыкым 130 компетенцийыште аклат. «Финал» 21 сентябрь марте регионысо колледж да техникумлаште эрта. Самырык-влакым дистанционно да онлай йӧн дене тергат.
