Марий самырык театр рушарнян ончышо-влаклан шке спектакльжым аклаш темла. У тургымысо шонымаш дене журналист-влакым пресс-конференцийыште палдареныт. Тений театрын тӱжвал ужашыжым чиялтеныт. «Культура малой родины» проект дене технический оборудований вашталтын, у микрофон, тул оборудований.
Константинов лӱмеш руш драме театрыште изи сценым почыт. Таче тушто «Валентинов день» постановко лиеш. Кызытсе пагытын драматургшо Иван Вырыпаевын пьесыже почеш шындыме спектакльыште Юрий Синьковский, Надежда Белобородова, Юлия Охотникова модыт. «Валентинов день» спектакльын геройжо-влак ончышо-влак дене пырля неле илышышке корным, пӧръеҥ да ӱдырамаш коклаште улшо вашкылыште йодыш-влаклан вашмутым кычалаш тӱҥалыт.
Йошкар-Олаште республикын 100 ияш лӱмгечылан пайрем программым ямдылат. Конкурс Москваште Кугу Кремль Полатыште октябрь мучаште эрта. Марий филармонийын коллективше-влак, а тиде «Марий Эл» кугыжаныш куштышо ансамбль, оркестр-влак кызыт репетицийлыште шке программыштым саемдат. Тидын дене прыля концерт программыште Э.Сапаев лӱмеш опер да балет театрын «Акпатыр» опере да «Чодыра сем» балет гыч ужаш-влак. Икмыняр шагат жапыште артист-влак марий кундемын ойыртемжым ончыктышаш улыт.
Социалпроект-влаклан субсидийым ойырымо конкурс Марий Элыште тӱҥалын. Тушко республикыште регистрацийым эртыше да тыштак пашам ыштыше коммерческий огыл организаций-влак ушнен кертыт. Проект йоча пагыт да авалык, илалше-влакын илышыштым саемдымаш, наркотик капканышке логалше-влаклан полыш, граждан-влакын психологий могырым тазалкышытым пенгыдемдымаш да молат. Проект конкурсышко йодмашым 23 сентябрь марте налыт. Ешартыш увер Марий Элын Калык илышым саемдыме шотышто министерствыште.
«Воскресенье» кычалше студент отрядын боецше-влак Заполярье гыч пӧртылыт. Тиде арняште нунын Мурманский областьышке экспедийцийышт мучашлалтеш. Тушко нуно август тӱҥалтыште каеныт. Мурманский областьын Кольский районым арам огыл ойыреныт. Кугу сар кайыме жапыште тушто 14 да 52 стрелковый дивизийыште Марий кундемын ятыр шочшыжо кредалын. Нунын гыч икмынярже тачат увер дечын посна йомшылан шотлалтыт.
Марий Элын верысе бюджетше-влаклан шым миллиард наре теҥге. Тидын нерген регионысо финанс министерствыште палдареныт. Тышечын целевой назначений дечын посна муниципалитет-влакын роскотыштлан ик миллиард наре ойыралтеш.
Килемар районышто тиде каныш кечылаште «Территория согласия» калык-влак кокласе форум тӱҥалеш. Тушко мемнан регионышто илыше 15 калыкын еҥышт чумыргат. Организавтор-влак палемдат, активист-влак икте-весе кокласе кыл, пырля ыштыме проект нерген каҥашат, этнокультур пашам радамлат. Калык-влак кокласе форумлан пӧлеклалтше проект федерал бюджет гыч «Реализация государственной политики» программе дене субсидийым налын. Марий Элыште 50 наре тӱрло калык ила, эн тӱшка -марий, руш, татар-влак.
Республикыште «Еш ешлан полша: школлан ямдылалтына» поро кумыл акций умбакыжат шуйна. Таче кечын 220 еҥ полыш кидым шуялтен. Еҥ-влак кок тӱжем утла тӱрлӧ сатум, а тиде канцеляр сату, вургем да йолчиемым, тыгак 168 тӱжем теҥгем окса дене колтеныт.
Тиде арняште республикыште грипп дечын вакциным вучат. Сентябрь тылзыште привикым ышташ тӱҥалыт. Тудлан илыме вер шот дене поликлиникышке кайыман. Специалист-влак, пашаеҥ-влакын тӱшка иммунитетым пенгыдемдаш, паша верлашке лекташ палемдат. Йоча-влаклан приивкым школ да йочасадыште ыштышаш улыт. Эпидемиолог-влакын темлымашышт дене, тений грипп да ОРВИ дечын поснак аралалташ кӱлеш, веет пандемий жапыште тӱрлӧ вирус дене эмганымаш нелын эртен кертеш.
Йошкар-Олаште у тунемме ий вашеш школ да йочасад воктене дезинфекцийым ыштат. А.Евстифеевын кӱштымашыже почеш, тиде коронавирус инфекцийым шижтараш кӱлеш. Мэрийыште палемдат, обработкым лӱмын раствор дене ыштат, тудо вирус да бактерий, пӱсӧ респиратор черым вияҥдыше микробым пытара.
