- Дата: 14:04, 22-06-2022
- Просмотров: 532
Марий Элыште тенийлан тӧрлаш палемдыме южо корным ыштен шуктеныт. Кызыт нацпроект дене шотышко кондымо кум участкым сдатлаш ямдылалтыт.
Марий Элыште тенийлан тӧрлаш палемдыме южо корным ыштен шуктеныт. Кызыт нацпроект дене шотышко кондымо кум участкым сдатлаш ямдылалтыт.
Республикыште спорт объект-влакым тӱзатат. У Торъял поселкышто физкультур да тазалыкым пеҥгыдемдыме комплексым чоҥат. Тачысе кечылан тушто конструкцийым поген шуктеныт, бассейнлан верым ыштат, душевой да санузелым плитке дене оптат. Тыгак кӱварым ямдылат. Вентиляций, отоплений да канализаций системым ыштен шуктышаш улыт. А Волжск олаште Спорт полатым олмыктат. Туштат пашаеҥ-влак 1 апрель гычак тыршат. Кызыт борьбам эртарыме залым шотыш кондат. Чоҥымо паша «Спорт – илышын нормыжо» федерал проект почеш шукталтеш.
Юрий Зайцевын кӱштымашыже дене Козьмодемьянсклан кредитор парымым тӱлаш да корным ачалаш полшат. Марий Эл вуйлатышын пашажым жаплан шуктышто Юрий Зайцев Козьмодемьянск олан мэрже Михаил Козлов дене вашлийын. Регион вуйлатыше республикысе бюджет гыч 17 миллион утла теҥге финанс полышым ойыраш кӱштен. Тыгак Юрий Зайцевын темлымашыже дене Водоканалым саемдыме шотышто планым ыштышаш улыт. Эше ик йодыш - корным тӧрлымо паша. Кызыт Правительствын постановленийжым ончат, тудын дене келшышын, район-влак корным тӧрлаш 300 миллион теҥгем ойырышаш улыт, тышечын 26 миллионым Козьмодемьянсклан колтат.
Йошкар-Олаште икымше классышке каяш 4 тӱжем утла йодмаш пурен. Тидын нерген рӱдӧ оласе туныктыш виктем палдара. 13 июньысо данный дене келшышын, чыла йодмаш гыч 1700 утлам ача-ава-влак туныктыш портал гоч пуэныт. 30 июнь марте 1 класслашке йодмашым прописке але жаплан ыштыме регистраций дене налыт. Тидын дечын вара ача-ава-влак школышко кӱлеш документ-влакым кондышаш улыт.
Марий Эл Российыште ик эн ару экологий регион-влак радамыште. «Зеленый патруль» мер ушем 2022 ий шошым ыштыме рейтинг дене палдарен. Ончылно Тамбовский да Белгородский область, тыгак Алтай республике. Аутсайдер коклаште Свердловский, Иркутский, Омский область-влак. Юл кундемысе федерал округышто Чуваший да Удмуртий ончылно улыт. Марий Эл Юл кундемысе федерал округышто кумшо верыште, Российыште 17 верыште.
Тазалык дене эмганен вияҥше-влак коклаште «Абилимпикс» чемпионатыште сеҥыше кум еҥлан грантым кучыктеныт. Андрей Лебедев да Виктор Федоров «Резьба по дереву», а Людмила Новоселова - «Художественное вышивание» номинацийыште ойыртемалтыныт. Сертификат-влакым ешартыш шинчымашым але реабилитацийлан технике могырым средстве-влакым налашлан кучылташ лиеш. Тидым кажныже шкаланже шке рашемда.
Марий Элын тӱҥ онаеҥже Александр Иванович Таныгинын "Ший мундыра" книгажым руш йылмышке кусарен савыктен лукмо. Тудын презентацийже шочмын Валентин Колумб лӱмеш йоча да самырык-влакын книгагудыштыжо эртен. Тиде книган марий вариантше 2013 ийыште лектын. Тушко марий юмынйÿла нерген умылымашым, марий княжествын 9-15 курымласе илышыже нерген, тыгак калыкын акрет годсо кечышотшо, марий патыр-влак, марий калыкын лӱмлӧ да пагалыме онаеҥже-влак нерген возеныт.
Республикысе талантан йоча-влаклан Эрик Сапаев лӱмеш опер да балет театрыште кеҥежымсе усталык мастерской почылтын. Тудо «Тӱвыра» нацпроект кышкарыште эрта. Республик кӱкшытан туныктымо форум 400 утла йочам ушен.
Марий Элыште йоча-влаклан пособий да мӱшкыран ӱдырамаш-шамычлан выплате ешаралтын. Тидыже илен лекташ ситыше кокла кугыт ешаралтме дене кылдалтын. Тичмаш але тичмаш огыл шагал парышан ешыште 8 гыч 17 ияш йоча-влакын ача-авашт 12 тӱжемат 500 теҥге марте налын кертыт. Тыгак изи срокышто учетышко шогалше ӱдырамаш-влак тылзыште 6 тÿжемат 667 теҥге оксам налаш тӱҥалыт. Вашталтыш-влак 1 июньышто пуреныт. Июнь марте йодмашым возышо-влак июльышто утларак оксам налыт.