Марий Элыште спортсмен-влакын физически ямде улмыштым  тергаш аппарат-программе коплексым налыныт. Тиде комплекс йоча-влакын могай спортлан келшен толмыштым палаш полша. Тыгак автоматически тӱрлӧ упражнений да тест-влак эртымым  тергаш йӧн уло. Тидын радамыште «ГТО» норматив сдатлымым терген кертыт. Аппаратно-программный комплексым Йошкар-Оласе Вӱд спорт полатыште вераҥденыт. Тестированийышке 6 гыч 12 ияш марте йоча-влак возалтын кертыт, тудо яра эрта. Ешартыш уверым сайтыште пален налын кертыда.

Йошкар-Олаште кеҥеж пагытлан ямдылалтыт. Тений официально йӱштылмо жап 1 июньышто почылтеш. Рӱдӧ олаште «Южный» пляжым почыт, тыгак вантовый кӱвар, Нолька ял лишне, Изи Какшаныште пуш-влакым айлаш пуымо вер воктене, «Динамо» стадион ваштареш, Пӱнчер отын шола могырыштыжо вӱд воктене канаш вер-влак лийыт. Моло вере йӱштылаш огеш лий. Мэрийыште палдарат: пытартыш 4 ий жапыште рӱдӧ оласе  вӱд объектлаштыже 11 еҥ ӱмыр лугыч лийын, утларакше йӱштылаш келыштардыме верлаште. 

«Воскресение» кычалше отрядын чолга еҥже-влак черетан экспедицийын иктешлымашыжым ыштеныт. Кок арня жапыште нуно вес регионласе кычалше отряд-влак дене пырля Йошкар Армийын 20 салтакшым муыныт. Лулеге пелен медальон-влакым верештыныт.

Марий Эл гыч команде «Туриада» лагерьышке каен. Таҥасымаш Юл кундемысе федерал округышто Россий Президентын ӱшанъеҥжын тӱҥалтышыже дене эрта. Кажне ийын тушко регионлаште сеҥыше-влак ушнат. Тений таҥасымаш Саратовский областьыште эрта. Марий Элын делегацийыштыже 40 еҥ. Кодшо ийын мемнан республикын командыже «Туриадыште» йолешке дистанций эстафетыште Юл кундемысе федерал округын Кубокшым сеҥен, моло таҥасымаштат ойыртемалтын. 

Йоча-влакын кеҥеж канышыштлан республикыште 124 миллион теҥгем ойырат. Тышечын 58 миллион теҥге регионысо бюджет гыч, 13 миллион наре муницапал гыч. Тидын нерген республикысе спорт да туризм министерствын увержылан эҥертен ТАСС увер агенстве палдара. Эше 53 миллион теҥге – тиде ача-ава, предприятий, мер ушем-влакын канышлан ойырымо шийвундышт. Тений кеҥежым республикысе лагерьлаште 22 тӱжем утла йоча канышаш. Чылаже 189 организаций пашам ышташ тӱҥалеш. Тидын радамыште ола воктенсе лагерь, школ пелен 168 лагерь, Волжскысо рӱдӧ эмлымвер пелен ик санаторий да кум палатке лагерь.

Краснооктябрьский поселкышто врачебный амбулаторийым чоҥат. У оралтым шыже марте нӧлтен шуктышаш улыт. Амбулаторийым первичный звенон модернизацийже программе дене келшышын ыштат. Тошто зданийым 1959 ийыште чоҥеныт да ты марте капитально ик ганат тӧрлен огытыл. Медпунктышто 4 тӱжемат 500 утла еҥ шотлалтеш, тушто вич врач пашам ышта. Амбулаторийым Киров лӱмеш Санкт-Петербург оласе военно-врачебный академийым тунемын пытарыше Дмитрий Лебедев вуйлата. Тудо Краснооктябрьскийышке «Земский доктор» программе дене толын. Объектым чоҥаш 50 миллион наре теҥге ойыралтеш. Тудын кумдыкшо 500 квадрт метр. Республикыште «Первичный звенон модернизацийже» программе дене чылаже шым объектым ыштышаш улыт. 

Марий Эл корным чоҥымо паша дене ончылно. 2022 ий мучаште рӱдӧ олаште улшо корно гыч 62 процентше, а регионышто 25 процентше нормативлан келшен толаш тӱҥалыт. «Лӱдыкшыдымӧ да сай качестван автомашина корно» нацпроект дене тений пашам шукташ чыла контрактым пеҥгыдемдыме. Тений республикыште 8 кӱварым тӧрлат. Тидын нерген кугыжаныш автоинспекций палдара. Тыгак у трассе-влакымат ыштат, тиде Курыкӱмбал ял деке корно да Морко районышто Шлань-Шурга. Йошкар-олаште Киров Строитель-влак уремым ушышо магистарльым чоҥат. Проектым 2025 ий марте ыштышаш улыт. Республикыште тений 246 километр регионысо кӱкшытан корным да Йошкар-Оласе агломерацийышке пурышо 13 километрым ыштышаш улыт.

Тений икымше гана йочалан пудий пурен. Тидын нерген Роспотребнадзорын республикысе виктемже палдара. Тиде Знаменский кундемыште лийын. Тергымеке, пудийын нимогай инфекций черже лийын огыл. Ведомствышто ушештарат: пудий-влак март гыч октябрь марте пижын кертыт, утларакше май-июньышто. Тений республикыште пудий дене шаркалыме инфекций ваштареш 700 наре еҥ прививкым шынден. 

Марий Элысе спортлан ямдылыше рӱдер 2021 ийысе эн сай спортсмен-влакым палемден. Конкурсыш йодмашым 22 спортсмен пуэн. Сеҥышым спортышто ойыртемалтше, таҥасымаш-влакыште ик гана веле огыл ончыл верыш лекше, республикын чапшым Россий да тӱнямбал кӱкшытыштӧ аралыше-влак коклаште ойыреныт. Мутлан, Мария Петуховам палемдаш лиеш. Тудо шуко ий полиатлон дене таҥаса, тӱнямбал первенствыште сеҥымашыже уло. Тыгак шахматист Максим Волковым саламлаш лиеш. Тудат Российын чемпионжо. Тылеч посна шке таҥаш группышто Дарья Садкова, Владислав Бырля да Михаил Бутин ойыртемалтыныт.

Спортшкол-влакым у оборудований дене пойдарат. «Спорт-илышын нормыжо» федерал проект дене келшышын, спорт организаций-влаклан кугыжаныш полыш ойыралтеш. Тыге, мутлан, футбол да регби дене Олимпийский резерв спорт школлан капкам, мечым да вургемым налыныт. Инвентарьым спорт школын районысо пӧлкалашкыжат колтат. Ешарыман, 2022 ийыште федерал проект дене келшышын, У Торъял районышто физкультур-тазаҥдыме спорт комплексым ышташ тӱҥалыт, Волжскышто Спорт  Полатым тӧрлат, Советский да Шернур районлаште ГТО нормативым сдатлаш изирак спорт площадке-влакым келыштарат.