Марьино-Юрино автокорным тений мучаш марте тӧрлен шуктышаш улыт. Тыгай задачым Марий Эл вуйлатышын сомылжым жаплан шуктышо Юрий Зайцев паша визит дене Юрино кундемыш миен коштмыж годым шынден. Кодшо ийын ты трассыште икмыняр участке корным олмыктеныт..
Марий Элыште мӧртньӧ гыч колигым искусственно лукмо верым ыштеныт. Пӱртӱс ресурс министерстве палдара: тиде паша федерал бюджет кӱшеш ойырымо шийвундо дене кол поянлыкым шукемдаш ышталтеш. Тыгай верым Волжский да Звенигово районлаште Куйбышев вӱд аралыме верыште ыштеныт. «Искусственный нерестилища» манмым кож лӱс гыч ыштен, метрат пеле келгытышке вераҥдат. Ончыкыжым мӧртньӧ гыч ловал-влак лекшаш улыт.
Мемнан кундемыште мӱкшызö-влак 25 тӱжем утла мÿкш ешым кучат. Тиде данный 1 январьлан. Мӱкш ешыште коклаште шот дене 20-30 тӱжем утла мӱкш уло, а кеҥежым 60 гыч 80 тӱжем марте. Мӱй лектыш: игече, пеледыш, тыгак мӱкш ешын тазалыкше дечын палдырна. 2018 ийыште республикыште 800 тонн мӱйым погеныт, 2020 ийыште 742 тонным кӱзеныт, утларак шке (частный) озанлыклаште.
Марий Эл Республик вуйлатышын сомылжым жаплан шуктышо Юрий Зайцевлан Калмыкий Республикын Почетан гражданинже чап лӱмым пуэныт. Тидын нерген официал телеграмм-каналыштыже палемден кодымо. Ушештарена, Юрий Зайцев ты марте Калмыкий Республик Правительство Председатель лийын. Май тылзыште Президент Владимир Путин тудым Марий Эл Республик вуйлатышын сомылжым жаплан шуктышо семын палемден. Ончыкыжым Калмыкий да Марий Эл республике-влак коклаште вашкылым вияҥдаш шонат.
Республикыште регионысо да район-влак коклаште корным тӧрлат. Кызыт пашам Шернур трактыште, тыгак Оршанка-У Торъял, Корта-Куяр, Елеево-Лоп, Шойбулак-Тумер кугорнылаште ыштат. Тидын дене пырля республикын районлаштыже куд вере асфальтым уэмдат, тидлан 800 тӱжем тонн асфальтобетонным кучылтшаш улыт. Пашам Курыкмарий, Марий Турек, Советский районлаште шуктат. Оршанкыште Пограничная уремым капитально тӧрлат. Йошкар-Олаште нацпроект дене келшышын, 5 уремыште пашам шуктат. Ушештарена, тений республикыште 230 километр наре автомашина корным тӧрлышаш улыт.
Юрино послекышто глэмпинг-влакым чоҥат. Нуно турист-влаклан келышатаралтыт, тушто малаш вер, туалет да душ лийыт. Глэпминг-влакым Юл эҥер серыште ыштат, кызыт 7 тыгай пӧртым нӧлтат. Тушто идалыкын кеч-могай пагытыштыжат канаш лиеш. Кодшо кечылаште самырык-влаклан политике, спорт да туризм министерствын еҥышт Юрино поселкышко миеныт.
Марий Эл Республикысе 1700 туныктышын лӱмжӧ энциклопедический книгаште. Тений Анатолий Муравьевын «Учителями жива Россия» лӱман книгаже савыкталтын. Тушко автор сулло да калык туныктышо лӱмым нумалше, тыгак орден, медаль да значок-влак дене палемдалтше педагог-влакым пуртен.
Йошкар-Олаште пашадымылык пел процент нарышке шуэш. Пашам темлыше рӱдерыште учётышто 500 утла еҥ шога. Кодшо ийын тыгаяк жапыште 2241еҥ паша верым кычалын. Идалык тӱҥалтыш гыч Марий Элын рӱдӧ олаштыже 340 еҥлан у паша верым темленыт. Тачысе кечын рӱдерыште 3 тӱжем утла вакансий уло. Ик пашадымылан 6 паша вер темлалтеш. Эн кӱлешан специалист-влак коклаште: монтажник, автомашинам виктарыше, кевытче, повар, упаковщик, полицейский, слесарь, менеджер, бухгалтер, медшӱжар.
Тений Марий Элысе медицин организаций-влаклан 24 у автомашинам налыт. Тышечын кумытшым Волжск оласе рӱдӧ эмлымверлан конденыт. Мемнан элыште лукмо транспорт пациент да врач-влакым кондыштараш, эм, биологический материалым кӱлеш верышке намиен шукташ кучылталташ тӱҥалеш.
Марий Элысе спортшкол-влакым у инвентарь дене пойдареныт. «Спорт – илышын нормыжо» федерал проект дене келшышын республикылан ик миллион утла теҥге субсидийым ойыреныт. Комплексный да «Виктория» спорт школ-влаклан байдарке, гребной тренажер, моторный пушым, бинокольым, моло арверым налыныт. У экипировко республикыште шуаралтше спортсмен-влакын лектышыштым кугемден кертеш. Ушештарена, тений, нацпроект дене келшышын, У Торъялыште физкультур-спорт комплексм чоҥен шуктат, Волжскшто Спорт Полатым, Советский да Шернурышто ГТО нормативым сдатлаш изирак спорт площадкым ыштат.
