Икымше апрель гыч Российыште социал пенсий-влакым 8,6% процентлан кӱзыктат. Тиде инвалидность, шоҥгылык, пукшышым йомдарыше-влаклан пенсий-влак. Российыште социал пенсийым 4 миллион утла еҥ налеш. Тидлан нимогай йодмашым пуыман огыл, выплатым автоматически шотлат. Индексацийлан федерал бюджет гыч 33 миллиард утларак теҥге ойыралтеш.
Тений кеҥежым кундемыштына 3 тӱжем утла гектар кумдыкышто пушеҥгым шындышаш улыт. Тидын нерген Пӱртӱс аралтыш министерстве палдара. Икымше ошкыл апрель-майыште лиеш. Тунам «Шарнымаш сад» акций эртаралтеш.
Российыште коронавирус дене кылдалтше чарымашым кӱртньыгорно транспортышто пассажир-влаклан кораҥденыт. 21 март гыч торашке кайыше поездлашке медицин маскым чийыман огыл, температурымат висаш огыт тӱҥал.
Российысе регион вуйлатыше-влакым чоҥымаш да илымвер-коммунал озанлык министр Ирек Файзуллин черетан видеосовещанийыш чумырен. Тушко Марий Элым вуйлатыше Александр Евстифеев ушнен. Совещанийыште контракт-влакым пеҥгыдемдыме да инфрастуктурым вияндымашке колтымо бюджет окса йодышым каҥашеныт.
Чебоксар олаште «Мари калыкын землячествыжым» ыштеныт. Верысе калыкле-тӱвыра автономийын председательжылан Курыкмарий районын шочшыжо, кызыт Чебоксар олаште илыше Александр Гурьяновым ойыреныт. Александр Гурьянов 55-ше номеран школым вуйлата, Марий мер каҥашын еҥже.
Тошто пӧрт-влак олмеш шуко пачеран у пӧрт-влакым чоҥаш тӱналыт. Чоҥымо кумдык Йошкар-Олан Соловьев, Пугачев, Тургенев да Павлов урем-влакым авалта. Тачысе кечылан чоҥышо дене ойпидышым ыштыме. Тудын дене келшышын, аварийный пӧрт-влакым пужат, а тушто илыше-влакым у верыш кусарат. Палемдыме участкыште у пӧрт-влакым нӧлтен, тудын кумдыкшым тӱзатат. Тидлан 5 ият пеле жап пуалтеш.
Марий Элыште паша вер шотышто рӱдер паша дечын посна кодмаште лӱдыкшыштӧ улшо-влаклан полша. Российын премьер-министрже Михаил Мишустин Правительствын Телеграмм-каналыштыже пашам темлыше рӱдер-влакын полномочийыштым кумдаҥдыме нерген ойлен.
Озанлык-влак шошо агалан ямдылалтыт. Шыжым мланде пашаеҥ-влак 47 тӱжем гектар кумдыкышто кокияшым ӱденыт, тыгак ятыр кумдыкышто мландым шыжымак куралын коденыт. Кызыт озанлыклаште пырчым тергат, шошо агам эртарен колташ ӱяҥдышым да техникым ямдылат. Озанлыклаште 80 процент удобренийым ямдылыме, тыгак тений 63 единице у техникым налыныт, тидын радамыште 16 трактор, пырчым погаш 4 комбайн.
Марий Элысе колонийлаште свиданийым эртарыме правил вашталтын. 11 март гыч коронавируслан кӧра пуртымо чарымашым лушкыдемдымылан кӧра, четлык коклаштат свиданийым эртыме шотышто вашталтыш пурен. Тидын нерген УФСИН-ын пресс-службыжо увертара.
Йошкар-Олаште троллебус-влакын мучаш станцийым Лебедев урем гыч Тыныслык уремышке кусарат. Транспорт ты уремысе 15 номеран пӧртын йӱдвел ужашыже марте каяш тӱҥалеш.
