Марий Элыште ешым шагал чумыраш тӱҥалыныт. Тыгай увер дене Маристат палдара. Шымлымаш почеш, 2022 ийысе тӱҥалтыш кок тылзыште мужыраҥмаш шагалемын. Тыгай иктешлымашым 2021 ийысе данный дене таҥастарен ыштеныт.
Тений республике мучко 299 тӱжем гектарыште пырчым ӱдышаш улыт. 150 тӱжем гектарым – шурнылан ойырат. Ял-озанлык министерстве палдара: тений кокияш сай лийшаш. Тачысе кечылан кундемыштына шурно-пырче, рапс, кукурузо, паренге да моло пакча-саска шапаш ситышын уло. Мо ок сите гын, шкенан элысымак налаш шонат. Тидлан нӧшмым, пырчым ыштыше Российысе рӱдер-влак дене ойпидышым пеҥгыдемденыт.
Январь тылзе гыч Марий Элыште аварийныйлан шотлалтше 5 тӱжем квадрат метр илымверым рончен пуженыт. «Илымвер да оласе среда» нацпроект дене келшышын, 2019 ий гыч республикыште кок тӱжемат 700 утла еҥым у илымверышке кусарыме. Январь гыч март тылзе марте республикыште 5 тӱжем утла тошто пӧртым пуженыт. Тиде Звенигово, Параньга, Марий Турек районла, тыгак Йошшкар-Ола, Волжск да Козьмодемьянскыште. Национальныепроекты.рф портал увертара: кызыт 2017 ий 1 январь марте аварийныйлан шотлалтше пӧртла гыч еҥ-влакым кусарат.
Марий Эл вуйлатыше Александр Евстифеев да Нижегородский областьын губернаторжо Глеб Никитин тӱвыра, сымыктыш да туризм шотышто келшымойым пеҥгыдемденыт. Кок регионышто турист-влакым вашлийме, тӱвыра поянлыкым аралыме нерген мутланеныт.
Марий Элын картыжым тӱрлен пытарыме. Звенигово оласе калык усталык пӧрт «Российын тӱрлеман картыже» проект кышкарыште марий кундемым тӱрлен. А-5 форматан картым Чебоксар олашке колтеныт. Лачак тушто Российын 85 регионжо гыч тӱрлымӧ картым погат да Российын кечыже вашеш ик кугу радынаш чумырат.
У Торъял районысо Чӱксола тӱвыра пӧртым тӧрлышаш улыт. Пашам «Тӱвыра» нацпроект дене келшышын шуктат. Тушто леведышым алмаштат, окнам вашталтат, тыгак клубын тӱжвал сынжымат саемдат. Тидын дене пырля эвакуаций омсам да пурымо тӱҥ омсам тӧрлышаш улыт. Уэмме дечын вара тӱвыра пӧрт Чӱксола ялшотан илемын тӱвыра вияҥмаш рӱдерже лийшаш.
«Йошкар-Ола театральная» фестиваль сеҥыше-влакым палемден. Икмыняр кече шуйнышо фестиваль театр пайремыш савырнен. Марий Элыште пашам ыштыше театр-влак ты тургымысо премьерыштым аклаш луктыныт. Тиде гана фествиальын Гран-Приж дене Эрик Сапаев лӱмеш опер да балет театр палемдалтын. Тудо устан «Хрустальный дворец» балетым ончыктен. Тыгак ты балетым сценышке лукмаште, да тушто куштышо-влакым ятыр номинацийыште акленыт. Тыгак фестивальын дипломжым Шкетан театрын режиссержо Степан Пектеевлан кучыктеныт.
Волжск олаште Спорт полатым олмыкташ тӱҥалыт. Тидлан окса «Спорт илышын нормыжо» - федерал проект почеш ойыралтеш. Ыштышаш паша изижак огыл. Апрель тылзыште подрядчикым рашемден, пашам тӱналаш шонат. Зданийыште тул, вӱд, канализаций, вентиляций да отоплений системым чыла алмашташ палемдыме. Тыгак видеонаблюдений да сигнализаций лийшаш.
Юл кундем федерал округын эн мастар театр коллективше-влакым увертареныт. Тидым «Театральное Приволжье» фестивальым иктешлыме кышкарыште ыштеныт. Усталык таҥасымаш ПФО-н 14 регионжо гыч йоча да самырык коллектив-влакым ушен. Нуно пытартыш ийлаште шындыме ик эн сай пашаштым калыклан да жюрилан ончыктеныт. Спектакльым, артист-влакым да режиссёрым лӱмын чумырымо комиссий аклен.
Тений Марий Элыште 6 школым олмыктышаш улыт. Школ туныктымо системым уэмдаш тӱрлӧ йӧным кучылтыт. Тыште «Туныктыш» проектымат палемден кодыде ок лий. Ты программе дене келшышын, кундемыштына школ-влакым чоҥат, тыгак тунемме верым олмыктат, школ оборудований ден техникым уэмдат.
