Озанлык-влак шошо агам мучашлат. Эртыше кечылаште палемдыме кумдык гыч 91 процентыштыже ӱден пытареныт. Параньга, Шернур, Морко, Оршанка, Килемар да Юрино районласе ял озанлык предприятий-влак планым 100 процентлан теменыт. Эн кугу кумдыкышто – 27 тӱжем наре гектарыште - икияшым Марий Турек районышто ӱдаш палемдыме. Тушто 25 тӱжем наре гектарыште ӱденыт.
Шуко вере корным тӧрлат. Тидын нерген автомашинам виктарыше-влаклан шижтарат. Тачысе кечын республикыште 39 вере корным тӧрлат, тидын нерген регионысо кугыжаныш автоинспекций палдара. Федерал кӱкшытан ныл корным, регионысо 26 корным да Йошкар-Олаште 9 вере тӧрлымӧ паша кая. Чоҥышо-влак Озаҥ, Кокшайск, Шернур кугорнылаште, «Куяр-Солнечный-Ронга» велне, Килемар, Оршанка, Морко да моло районлаште пашам ыштат. Йошкар-Олаште Эшкинин, Водопроводный, Суворов, Панфилов, Серов, Машиностоитель-влак уремым шотышко кондат.
Йоча лагерьлашке канаш кайыше-влаклан кешбэк программе Россий семынак, Марий Элыштат вийым налын. Тудо 25 майыште тӱҥалын. Россий Президент Владимир Путин Федерал Собранийлан посланийыштыже тидын нерген ойлен. Икшывым лагерьышке кеҥежын кеч-могай тылзыштыжат, 15 сентябрь марте колташ лиеш. Путевкын акше гыч пелыжым пӧртылтат, но 20 тӱжем теҥге дечын шуко огыл.
Марий Элыште Россий Президентын Федерал Собранийлан посланийже шотышто пашам шуктымо планым пеҥгыдемденыт. Комплексный планышке 11 тӱрлӧ виктыш дене мероприятий-влак пуреныт. Тидын радамыште республикысе онкологий диспансерын поликлиникыжым, Йошкар-Оласе 2-шо номеран йоча поликлиникым да Юрино поселекышто поликлиникым чоҥымаш.
Марий Элыште верысе бюджет-влаклан 4 миллиард теҥге финанс полышым ойыреныт. Тидын нерген регионысо финанс министерстве увертара. Дотаций-влакын кугытышт 483 миллион теҥге наре. Тиде оксам муниципалитет-влаклан эн кӱлешан роскотлан ойыреныт. Целевой полыш 3 миллиард наре теҥге, тышечын утларакше – субсидий-влак. Ты шийвундым школлаште тунемше-влаклан шокшо кочкышым пукшаш, тыгак регионласе образований организацийыште у вер-влакым ышташ да самырык еш-влаклан илымверым чоҥаш ойыреныт. 2 миллиардат 600 миллион теҥге субвенцийым школлаште туныктымашлан да опекун-влаклан выплатылан колтеныт.
Регион вуйлатыше Александр Евстифеев правительстве еҥ, муниципал образований вуйлатыше-влак дене пырля «Образований» национальный проектым илышышке пуртымо нерген совещанийыште каҥашен. Туныктыш да шанче министр Наталья Адамова ешарен: республикыште регионысо 5 проект илышышке пура.
Волжский районлан «Культура» нацпроект дене келшышын, у «Автоклубым» налыныт. Шуко функциян рӱдерыште мероприятийым эртараш кӱлшӧ оборудований уло. Волжский районышто тудын презентацийжым «Пеледыш пайрем» годым эртараш палемдат. Ешарен кодаш лиеш, ты марте тыгай автоклубым Параньга районлан налыныт, а идалык мучаш марте эше 5 районыш кондат. Республикыште 7 культур рӱдерым налаш 33 миллион теҥге ойыралтын.
Июль тылзыште «Марий вургем пайрем унала ӱжеш» калык вургемым ончыктымо регион-влак кокласе конкурс лиеш. Тудо ныл номинаций дене эрта: этнографий костюм, кызытсе жаплан келшыше авторын вургемже, сценылык костюм, тыгак кид дене ыштыме курчак. Фестиваль-конкурс 15-17 июльышто лиеш.
Идалык тӱҥалтыш гыч республикысе 27 йолешке корнотуткарышке логалын. Кодшо ий тыгаяк жап дене таҥастараш гын, туткар-влакын чотышт 60 процентлан шукемын. Тиде кечылаште кугыжаныш автоинспекций профилактике операцийым эртара. ДПС инспектор-влак йолешке да автомашинам виктарыше-влаклан корно правил нерген ушештарат.
Икымше кварталыште шояк окса-влакым палымаш 32 процентлан шагалемын. Мемнан республикыштат фальшивке-влак шагалемыныт. Тыге кум тылзыште 21 шояк оксам муыныт. Тӱҥ шотышто – тиде радамыште кугу кагаз окса, 5 тӱжемаш шояк кагаз оксам – 12 , ик тӱжемашым – 4 шекланеныт. Тыгак 10 теҥгеаш тыгыде 4 оксамат муыныт, кодшо ийын тыгайже лийын огыл.
