Йошкар-Олаште аварийныйлан шотлалтше 17 пӧртым пужаш ямдылалтыт. Муниципал погым виктарыше комитет тидын шотышто аукционым эртара. Оласе бюджет гыч тидлан 1 миллион утла ойыралтеш. Йодмаш-влакым 28 май марте налыт, проектым 80 кече жапыште ыштат тӱҥалыт. 2023 ий марте «Тоштемше пӧртла гыч еҥ-влакым кусарымаш» программе дене рӱдӧ олаште 63 портым пужат, а тушто илыше-влаклан йӧнан пачерым пуат. Марий Элыште програмышке 404 пӧрт пурталтын, тушто илыше 7 тӱжемат 54 еҥым кусарышаш улыт. 

Республикыште вес ийын тӱзатышаш объект-влак верч онлайн-йӱклымаш мучашлалтын. Тидын нерген Йошкар-Олан мэрийже увертара. Эн шуко йӱкым погышо оласе кумдыкым вес ийын федерал бюджет кӱшеш тӱзатышаш улыт. Йошкар-Олаште еҥ-влак 19, Волжскышто – 3, да Козьмодемьянскыште – 9 кумдык коклаште ойыреныт. Тӱшка верым да кумдыкын тӱзатыме вер-влакын дизайн-проектышт дене еҥ-влак 12.gorodsreda.ru  платформышто палыме лийыныт да туштак йӱкленыт. 

У тунемме ийыште «Земский туныктышо» программа почеш республикысе школлашке 12 туныктышо пашам ышташ кая. Нуно элнан  тӱрлӧ кундемлаж гыч улыт. Педагог-влак Угарман, Карачаево-Черкесий, Тыва республика,  Санкт-Петербург гыч толыт. Нунын коклаште Марий Элын ик районжо гыч весышке куснышо-влакат улыт. «Земский туныктышо» программыш ушнышо кажне педагоглан федерал бюджет гыч 1 миллион теҥге окса ойыралтеш. Тений ты программе дене келшышын, конкурсыш 28 йодмаш пурен, кодшо ийын 11 туныктышо яллашке пашам ышташ каен. 

Икымше иктешлыше кугыжаныш экзамен. 11 классым пытарыше-влак ЕГЭ-м возеныт. Тӱҥ этап 31 майыште тӱҥалын да 2 июль йотке шуйна. Тидын нерген туныктыш да шанче министерствыште палдарат.  31 майыште тунемше-влак ойырымо предмет дене: литератур, географий, химий дене экзаменым кученыт. 3, 4 июньышто эн тӱшка экзамен эрта – руш йылме дене. Тудым республикыште 3 тӱжем наре йоча кучаш ямдылалтеш. Выпускник-влак коклаште математике, обществознаний да физике предмет-влак йодмашан улыт. Экзаменым республикысе 24 школышто возат, онлайн-трансляцийым эртарашлан видеокамере-влакым вераҥденыт, тыгак чыла кӱлешан оргтехникым налыныт. 

Тений ЕГЭ-м 287 еҥ гыч шогышо комиссий терга. 

«Марий Эл Республикыште здравоохраненийын первичный звенон модернизацийже» регионысо программе дене келшышын транспортым икмыняр районышко колтеныт:  Курыкмарий районышко 5 автомашинам, икте дене Шернур да Волжский районлашке. Медведево районышко тений 5 санитарный автомашина толшаш, кокытшым конденыт. Республикышке «УАЗ» маркан 10 автомашинам кондышаш улыт. Транспорт медпашаеҥ-влакым кондыштараш, эм препарат, биологический материал-влакым кӱлеш учрежденийышке намиен шукташ полшышаш. Модернизаций программе дене келшышын, учреждений-влаклан транспортым уэмдаш 5 ий жапыште федерал да республикысе бюджет кӱшеш 2 миллиард наре теҥгем ойырат. Тиде окса дене 83 единице техникым налыт. 

Марий Элыште коронавирус инфекцийым шижтарыме шотышто утларак ямде улмо режимым 5 июль марте шуйымо. Шуматкечын оперативный штабын черетан заседанийже лийын. Тудым регион вуйлатыше Александр Евстифеев эртарен. Роспотребнадзор виктемын вуйлатышыже Светлана Булатова палемден: «Республикыште коронавирус чер огеш шагалем, пытартыш арняште стационарлашке логалше-влакын чотышт кугемын». Майыште республикышке Индий, Непал, Белоруссий гыч толшо 5 еҥын коронавирус пеҥгыдемдалтын. Эртыше шым кечылаште стационарлаште койко-вер-влакым шукемдыме.

Вакцинаций нерген ойлаш гын, 28 майлан республикышке 63 тӱжем комплект вакциным конденыт, элыште регистрацийым эртыше кум вакцине: «Гам-КОВИД-Вак», «ЭпиВакКорона» да  «КовиВак» дене прививкым шындат. Кундемыште вакцинацийым эрташ 110 пункт, тыгак 64 мобильный бригаде уло. 28 май гыч мобильный пункт-влак сад товариществылаштат пашам ыштат, тазалык дене эмганен вияҥше граждан-влаклан мӧҥгышт миен, прививкым шындат.

«Финн-угор тÿнян рÿдыверже» лÿм верч кок ял таҥаса«Финн-угор тÿнян рÿдыверже» лÿм верч кок ял таҥаса. Тидын нерген Финн-угор тÿнясе тÿвыра рÿдола-влакын секретариатше увертарен. Конкурсын йодмашыже-влаклан кок ял келшен толын. Тиде – Удмуртий республике Алнаш район Байтеряково – Байтэрек да Марий Эл Республикысе Курыкмарий районышто верланыше Йоласал села.

«Чумбылат могучий» оперын премьерыже. Чыла шотыштат öрыктарыше произведенийым  кызыт Эрик Сапаев лÿмеш опер да балет театрыште ямдылат. Немда эҥер серыште, 8 метр кÿкшытан да 27 метр лопкытан кÿ торашке коеш. Преданий почеш, лач тиде верыште марий калыкын онжо – Чумбылатым поген пыштыме. Илымыж годым тудо патыр, писе, чулым лийын, тыгодымак поро да мунло койышыж дене ойыртемалтын. Элина Архипован возымо «Чумбылат» опере тиде талешке нерген легендылан эҥерта: кушто шочын, кузе шке калыкшым тушман дечын арален да курык йымаке каен возын, но марий-влакым аралаш сöрен. Тиде преданийым семлан келыштарымеке, лÿмлö композиторна чапле оперым шочыктен. Тыште тул, йÿк, хореографий ден шомак-влак иктеш ушналтыныт 

Таза лийнет гын, спорт дене кылым кучо. Йошкар-Олаште тиде арня мучко «Ужар фитнес» проект кышкарыште 18 тренировко эрта. У тургым рудолаште 21 майыште почылтын. Шочмо гыч шуматкече марте, тÿшкан ончалмаште, 18 тренировко лиеш. Кумылан-влакым яндар южышто хатха-йога, калланетика, пилатес, зумба, стретчинг, аргентин танго да моло дисциплине дене занятий-влак вучат. Тренировко-влакым кастене яра эртарат. Расписаний дене палыме лияш манын, экраныште палемдыме сайтышке пурыман. А регистрацийым ончылгоч эртыман.

Ушештарена, ÿмаште Йошкар-Олаште «Ужар фитнес» проектышке ик тÿжем утла участник ушнен. Тудо илышышке «Демографий» нацпроектыш пурышо «Спорт – илышын нормыжо» проект дене келшышын шыҥдаралтеш. 

Йоча каныш шотышто йодышда уло гын, «Шокшо линийыш» йынгыртен кертыда. Тудым Роспотребнадзорын Марий Элысе виктемже 31 май гыч 11 июнь марте эртара. Йоча каныш дене кылдалтше йодыш-влак тургыжландарат гын – поснак тиде услугым темлыме, лÿдыкшыдымылык правилым эскерыме, тыгак йоча сатум налме – специалист-влак вашешташ ямде улыт. Консультацийым налашлан 8(8362)68-19-44, 68-19-21, 68-19-04, 8-800-707-61-77 номер-влак дене йынгырташ лиеш.