Республикын кечыже вашеш Йошкар-Олаште Марий паркым торжественно почыныт. Марий калыкын историй сынан событийыштыже Российын тӱрлӧ регионжо гыч толшо марий-влакат лийыныт. Рӱдоласе у каныме верым пайремлын почмаште мыйын коллегем-влак лийыныт.
Ныл ийлан - ик гана. Тиде кечылаште Йошкар-Олаште Марий калыкын 12-шо погынжо пашам ышта. Тений Марий Элын рӱдолаже Российын 20 регионжо гыч 400 утла делегатым вашлийын. 1 ноябрьыште Погыным пайремлын почыныт. Делегат-влакым Марий Эл Республик вуйлатыше Юрий Зайцев саламлен. Съездым почмаште мемнан съемочный группына лийын.
Сергей Чавайнын «Изи мӱкшыжӧ» сеҥымашым конден. Йошкар-Оласе 29-ше номеран «Ший оҥгыр» йочасадыш коштшо 5 ияш Амира Матвеева Россий кӱкшытан сылнымут конкурсышто лауреат лийын.
Шочмо элым йӧратыше, сылнымутлан шӱмаҥше йоча-влак чумыргеныт. Валентин Колумб лӱмеш йоча да самырык-влаклан книгагудышто 9-ше гана «Мый йӧратем родной элемым» сылнымут конкурс эртен. Таҥасымаш чылаже 90 утла участникым ушен.
Ончыкылык армий службылан кӱлеш шинчымашым налыт. «Авангард» сарзе-патриот рӱдерыште республикысе патриот ушем-влакын слётышт кая. 200 наре юнармеец саркурал, медицине да инженер тактике дене палыме лийыт, дроным виктараш тунемыт. Мемнан съемочный группына Куяр посёлкыш практике занятийыш миен коштын.
Моштымашыштым тергат да ешартыш шинчымашым налыт. 8-11 класслаште тунемше ӱдыр ден рвезе-влак краведений дене республик кӱкшытан олимпиадыш ушненыт. Нуно изирак шымлымаш пашам эртареныт. Тыгак объектым лудын моштымо да уш-акылым пудыратыше конкурслашке ушненыт. Кумданрак Эльвира Петрован сюжетыштыже.
Йошкар-Олаште Марий калыкын 12-шо погынжо шке пашажым тӱҥалын. Форум пленум дене почылтын. Рӱдоласе калык келшымаш пӧрт Российын 20 регионжо гыч 400 утла делегатым вашлийын. Нуно марий тӱняште пӱсын шогышо йодыш-влакым каҥашеныт.
Республикына мучко Калык-влакын икоян улмо кечыштлан пӧлеклалтше мероприятий-шамыч эртат. Марий Элыште таче 100 утла национальностьян калык ила. Икте-весе коклаште вашкылым пеҥгыдемдаш да келшымашым вияҥдаш тӱрлӧ организаций, рӱдер да ассамблей полшат. Йочасад ден школлаштат калык келшымашлан кугу тӱткыш ойыралтеш. Теве Параньга район Кугу Пумарий школышто туныктышо-влак каникул деч ончыч оҥай акцийым эртареныт.
Волжск олаште куштылго атлетике дене кросс-гандикап эртен. Тиде таҥасымашын лӱмжӧ - «Пелед, тӱзлане, Марий Эл». Организатор-влакын палемдымышт почеш, республикыштына марий лӱман таҥасымаш - икте гына. Тудо марий калык конгрессын темлымашыже почеш 2022 ийыште шочын да Марий автономийын шочмо кечыжлан пӧлеклалтын. Тений кросс кумшо гана спортсмен, спорт дене кылым кучышо-влакым чумырен. Тиде гана чылаже 50 утла участник шке вийжым терген. Нуно Марий Эл, Татарстан, Чуваший гыч лийыныт.
29 октябрьыште Комсомолын шочмо кечыже палемдалтеш. Лач тиде кечын комсомол организаций шочын. Тений тудлан – 106 ий. Йошкар-Олаште шке жапыштыже комсомолец радамыште лийше-шамыч «Тулан ийласе комсомолец-влаклан» памятник воктеке пеледышым пыштеныт, самырык пагытыштым шарналтеныт. Тунам ты организаций тӱжем дене ӱдыр-рвезе-влакым иктыш ушен, илышыштым виктарен. Тачысе кечын комсомол – тиде историй.
