Йошкар-Олаште «Калык вургем пайрем унала ӱжеш» Российысе национальный костюм фестиваль-конкурс тӱҥалын.  Культурно-просветительский проект кышкарыште эртаралтше пайрем Калык тӱвыра пӧртыштӧ регион кокласе шанче-практик конференций дене почылтын. Тудо калык вургемын национальный стильжылан пӧлеклалтын.  Тыгак кеҥежымсе фольклор экспедицийым да этнопленэрым иктешлен кугу фотоончер почылтын. 
 

Йошкар-Олаште тиде кечылаште «Российысе регионлаште калык да конфессий кокласе кыл» Россий кӱкшытан шанче-практик конференций эрта. Рӱдолашке элнан 14 регионжо гыч 100 утла шымлызе да эксперт толын. Кок кече жапыште нуно тӱрлӧ йодышым лончылаш тӱҥалыт. Кумданрак сюжетыште. 

Пашамат ыштат, канашат жапым муыт. Мутем, студент отрядын чолга еҥже-влак нерген. Марий Эл гыч ВУЗ да СУЗ-ын студентше-влак кеҥежымсе паша тургымыштым иктешленыт. Чылаже 1100 наре ӱдыр-рвезе шкенжым у профессийыште терген. Пашадар деч посна нуно опытым погеныт, куан кумылым налынат. 

90-ше ийлан легендыже калык дене вашлийын. Уста гармоньчо, бард Виктор Комаров лӱмгече концертшым эртарен. Мыскараче мурызо пайремжым «Мыланем 720 тылзе» ман лӱмден. Сценыште ятыр у муро йоҥгалтын. Артист да тудын коллегыже-влак дене Вера Горохова вашлийын.       

Тылзе утла кундемыштына шыже озалана. Тений тудо мемнам шокшо игече дене ӧрыктара. Южо вере олмапу, груша кокымшо гана пеледеш. Кушкыл-влакым телылан ямдылыме нерген Марий кугыжаныш университетын преподавательже, ялозанлык шанче кандидат Нина Апаева дене мутнам вашталтена. 

Марий Эл ТВ: Гвардий капитан Борис Салдаев. 

3 гыч 5 октябрь марте кундемна поро озаватышке савырна. Тиде кечылаште Йошкар-Олаште Россий кӱкшытан «Калык вургем пайрем унала ӱжеш» фестиваль эрта. Проект икмыняр ужаш гыч шога. Усталык лабораторий, «Калык костюм художественный национальный стильын негызше» Всероссийский калык вургем фестиваль; фольклор да этнографий школ, кид дене ыштыме национальный костюман курчак ончер, этноблогер-влакын мастерскойышт, фотоплэнер да ончер. Тиде фестивальыш ушнышо ик участник дене мемнан съемочный группына вашлийын. 

Конкурсыш ушно да тӱҥ призым сеҥен нал. Октябрь кыдалне Марий Элысе тӱвыра министерстве ден С. Чавайн лӱмеш книгагудо «Идалыкын книгаже-2024» конкурсым увертареныт. Йодмашым 21 ноябрь марте погат, а сеҥыше-влакын лӱмышт дене Марий тиште кечын, 10 декабрьыште, палдарат. Тенийсе конкурсын условийже да ойыртемже-влак нерген Эльвира Петрован сюжетыштыже. 

Марий йомак тоштер руш, марий, татар йомак-влак дене палдарыше куснылшо ончерым Запорожский областьысе Куйбышевский районлан пӧлеклаш ямдылалтеш. Куснылшо ончер Марий Элыште илыше калыкын йомакше, мифше, легендыж дене палдара. Проект дене пашам идалык тӱҥалтыште тарватыме. Тудым Чарла Кремль да тӱвыра поянлыкым аклыме шотышто мер ушем Культурный инициативе шотышто президент фонд полшымо дене пырля ыштеныт. «Нӧнчык патыр», «Ший пӱян Пампалче», «Айдеме да тул», «Ирга» - чылаже 5 йомак. Кажне йомак 5-6 кугу планшет гыч шога. Тыгак калык вургемым чиктыме манекен-влак лийыт. 

«Могай улат, марий?» Шернур районышто самырык-влаклан икымше гана марий шоу эртен. Тӱрлӧ ийготан самырык еҥ-влакым ушышо программе онай да ойыртемалтше лийын. Кумданрак Дмитрий Веденькин палдара.