Регион вуйлатыше Москваште Российын чоҥымаш министрже Ирек Файзуллин дене вашлийын. Тудо - Республикым вияндыме шотышто индивидуальный программым шуктымо дене регионын кураторжо. «Экологий» нацпроект дене келшышын республикыште «Юл эҥерым тазаҥдымаш» федерал проект график почеш шукталтеш.
Лишыл кечылаште Йошкар-Олаште регион-влак кокласе парикмахер сымыктыш да эстетике дене чемпионат лиеш. Тудо визымше гана эртаралтеш да регион-влак коклаште тений онлайн йӧн дене эрта. Марий Эл дечын чемпиронатышке 25 еҥ ушна, 23 студент да 2 мастер. Чылаже тений дистанционно конкурсышко 64 еҥ ушна.
82 ий сценыште! Марий калыкын ик эн йӧратыме «Салика» спектакльже 900-шо гана сценышке лектеш. Сергей Николаевын возымо «Салика» пьесыже тачат шке пӱсылыкшым йомдарен огыл. Шкетан лӱмеш театрын репертуарыштыже «Салика»- 1936 ий гычак эн почетан верым налеш. Икымше гана тиде спектакльым 1938-ше ийыште ончыктеныт. 29 ноябрьыште Марий кугыжаныш театрын шочмо кечынже «Салика» спектакльым залыште шинчен, тыгак онлайн йӧн дене ончаш лиеш.
«Культура» нацпроект дене республикыште Оршанка район Кугунурышто тӱвыра пӧртым капитально олмыктеныт, тиде паша дечын аныклалтше окса дене Марково тӱвыра пӧртым тӧрлат. Республикыште У Торъял рӱдӧ библиотекын модернизацийжым ыштеныт. «Культурная среда» регионысо проект дене Я.Эшпай лӱмеш марий филаромонийым чоҥат, кызыт пашам 40% шуктымо.
Республикысе йоча да самырык-влаклан технический усталык рӱдер «Туныктыш» нацпроект дене келшышын у оборудований дене пойдаралтын. Кызытсе жаплан келшыше техникым 2 кабинетышке налыныт. «Моделизм» кабинетлан тӱрлӧ станок-влакым, 3-Д принтерым да моло оборудованийымат. Тыште йоча-влак «Авиамоделирований», «Судомоделированийлан» тунемыт.
Медведево поселкышто у школын икымше пачашыжым нӧлтеныт. Тунемме верым Киров уремыште июль тылзыште чоҥаш тӱҥалыныт. 825 верлан ыштыме школым Йошкар-Олаште 9-В микрорайонысо школын типовой проектше дене нӧлтат. Чумыр паша 274 миллион теҥгелан аклалтеш. У школым 2022 ийыште ыштен шуктышаш улыт.
11 классыште тунемше-влак иктешлыше сочиненийым 5 апрель дечын ончыч огыт возо, 9 классыште тунемше-влак, собеседованийым дистанционно эртарен кертыт. 11 классыште шинчымашым погышо-влак 2 декабрьыште сочиненийым возышаш улыт ыле, но пандемийлан кӧра, тудым кусарыме. 9 класслан собеседований 10 февральыште эртышаш. Но тудын шотышто иктешлымаш кызыт уке.
Марий Эл гыч ковид-стационарлаште тыршыше 175 медицин пашаеҥ тений санаторийыште канен. 20 июль гыч 4 октябрь марте «Сосновый бор» санаторийыште коронавирус инфекцийым эмлыше специалист-влак каненыт. Нунылан тӱрлӧ процедурым ыштеныт, тыгак тӱвыра программым темленыт. «Сосновый бор» санаторийын у статусше материально-технический базым пойдараш полшен. Каныме верын кумдыкыштыжо у печым ыштеныт, медикамент-влакын шапашыштым пойдареныт.
Марий Элыште ковид-стационарлаште медик-влаклан ординатор да студент-влак полшат. Таче кечын инфекционный отделенийлаште пашам ыштыше врач-влаклан полшаш 66 еҥ толын. Тиде медицин ВУЗ-лаште шинчымашым погышо, ординатор, Йошкар-Оласе медицин колледжын тунемшышт. Регионысо тазалыкаралтыш министерстве палдара: самырык кадр-влак пашам ыштат але практикыште улыт, тыгак волонтер семын тыршат. Студент-влак вес регионла гычат толыт, Казанский, Кировский, Чувашийысе кугыжаныш медуниверситетла гыч. Тиде кечылаште больницылашке Марий Кугыжаныш университетын 35 студентше ушнышаш.
Закондымын аралыме саркуралым сдатлаш лиеш. Марий Элыште Росгвардий виктем профилактический мероприятийым эртара. Лицензионно-разрешительный рӱдерын сотрудникышт МВД пашаеҥ-влак дене пырля разрешений дечын посна аралалтше пычал, пудешталт кертше вещества, патороным, кондаш йодыт. Тидлан оксам пуат.
