Республикыште урлыкан вольыкым шукемдыме, тыгак кургым саемдыме, ушкал-влаклан у фермым чоҥымылан кӧра, тидын шотышто паша сайынракын кая. Тений 10 тылзыште республикыште ик ушкаллан шотлымаште 547 килограмм шӧрым лӱштеныт, тидыже 2019 ий дечын палынак шукырак.
Медведево гимназийын тунемшышт у тунемме ийым олмыктымо школышто тӱҥалыныт. Школым эше 1962 ийыште чоҥымо, 50 ий эртымеке, тунемме верым капитально олмыктеныт. «Развитие образования» кугыжаныш программе дене гимназийыште столовый, спортзалым тӧрленыт, леведышым вашталтеныт.
Тиде спорт комплексым эше икмыняр ий ончыч нӧлташ тӱҥалыныт, но тӱрлӧ амаллан кӧра, пашам шогалтеныт. Регион вуйлатышын тыршымыже дене, тений июнь тылзыште физкультур-спорт комплексыште паша тарванен.
Йошкар-олаште аварийныйлан шотлалтше 63 пӧртла гыч еҥ-влакым 2023 ий марте у илымверышке кусарат. Республикыште тиде программе 2025 ий марте палемдалтын, но регионын правительствыже тудым кок ийлан ончычырак илышышке пурта. Таче кечын Йошкар-Олаште 2300 шуко пачеран пӧртла гыч 200-же аварийныйлан, эше тынарак тоштемшылан шотлалтыт.
Шернур район Зашижемье селаште фельдшер–акушер пунктым чоҥат. Таче кечын тушто отделке пашам шуктат, коммуникацийын монтажшым ыштат. Ушештарена, ФАП-влакым «Здравоохранений» национальный проект дене келшышын нӧлтат. Тений идалык мучаш марте республикыште 17 ФАПым ыштен шуктышаш улыт. Нуным модульный блокла гыч чоҥат. Чыла 17 ФАПым типовой проект почеш ыштат, тидлан кӧра нуно тӱжвал сынышт дене чылт икгайрак лийшаш улыт — приёмный, процедурный, эмым аралыме пӧлем.
«Демографий» нацпроект дене «Кугырак тукым» регионысо проект дене келшышын кугырак ийготан-влакым медицин организацийлашке кондыштарат. Тидлан 2019 ийыште республикыште 18 автомашинам налме, мобильный бригаде-влакым ыштеныт. Ик ий ончыч паша тӱҥалын.
Ставрополь крайыште армийыш кайышаш рвезе-влак коклаште Россий кӱкшытан спартакиадыште Марий Элын чапшым Волжский районын командыже арала. Командыште чылаже 10 еҥ: Сотнур кыдалаш, Памар, Шарача школ гыч самырык-влак улыт. Рвезе-влак строевой смотр, кужытыш тӧрштылмаште, автоматым рончен - погымаште мастарлыкым ончыктеныт.
Марий Элыште коронавиурс инфекцийым шижтарыме шотышто посна ямде улмо режимым 15 январь марте шуйымо. Регион вуйлатыше указышке кидпалыжым пыштен. Пурышо вашталтыш дене келшышын, 23.00 шагат гыч 06.00 шагат эр марте кафе, бар-влак, йӱд клуб-влак пашам ышташ огыт тӱҥал. 16 ноябрь гыч 6 декабрь марте 1 гыч 4 класслаште тунемше-влакын каникул лиеш.
Тиде арняште верын лум лумаш тӱҥалеш, южын температурыжо гын, 0 градус наре лийшаш. Синоптик-влак ойлат, вочшо лум, очыни огеш шуло, но лум пургыж але огеш лий. Арня мучаште йӱдвел-касвел мардеж юалге южым конда, верын лум лийын кертеш, южын температурыжо 1 гыч 6 градус марте йӱштӧ лийшаш, каныш кечылаште эшеат йӱкшемда.
Калык календарьым ончалаш гын, ты кечын телымсе кайык-влак чоҥештен толыт маныныт: öрш, киса да молат. Кисам ончен, кугезына-влак игече нерген мужедыныт. Киса сурт деке толеш – йӱштылан. Киса эрдене мураш тӱҥалеш – йӱдлан йӱштым вучо.
Экологий диктант. Тений российысе акцийышке онлайн йӧн дене ушнаш лиеш. Тидын дене пырля тунемме верлаште площадке-влакым ыштат. 15 ноябрьыште «экодиктант.рус» сайтыште йодыш-влак лийыт. Шке профильышке пурен, нунылан вашешташ лиеш. Экодиктантын географийже кажне ийын кумдаҥеш. Тений тудым Российыште илыше ик миллион утларак еҥ возышаш. Школышто тунемше, студент, да чыла кумылан-влак экологий, пӱртусым аралыме шинчымашыштым терген кертыт.
