Республикысе ветеринар-влак чодыраште илыше янлык-влакын орымаш чер, бешенство ваштареш кучедалыт. Нунылан тиде пашаште сонарзе-влак чот полшат. Вакциным ял воктенсе чодыраште, ир янлыкын коштмо вержым эскерен, оптат.
Рӱдолаште рейд-влак эртат. Каныш кечын полиций пашаеҥ-влак кугу сатулымо рӱдерлаште ача-ава дечын посна кодшо йоча-влак улмым тергеныт. Марий Эл вуйлатышын Указше дене келшышын, республикыште 15 январь марте коронавирус черым шижтараш утларак ямде улмо режимым шуйымо. Тидлан кӧра йоча-влак ужалыше рӱдерлаште шке семынышт коштшаш огытыл. Тидым пален налмеке, ача-ава-влакым административно муткучаш шогалтат, штрафым пуэн кертыт. Рейд жапыште полиций пашаеҥ-влак правилым пудыртышо-влакым шекланен огытыл.
Йошкар-Ола уремлаште корным национальный проект дене тӧрлат. Рӱдолаште тиде проект 2019 ий гыч илышышке пура. Тиде жапыште оласе 10 уремым тӧрленыт, у магистральым чоҥаш тӱҥалыныт. У технологий дене Ленинский проспект, Карл Маркс, Первомойский, Западный, Красноармйский, Кремлевский, Комсомольский, Пролетарский, Дружба, Машиностроитель уремлаште корным ыштеныт. Тушто тыгак корно воктене бордюр кӱйым вашталтеныт, инженер коммуникацийым шотышко конденыт, газон да тротуар-влакым уэмденыт.
Марий Эл вуйлатыше Александр Евстифеев хронический черан еҥ-влаклан эмым ситараш оксам ойырымо шотышто распоряженийышке кидпалыжым пыштен. Тиде 13 миллион утларак теҥге. Тиде окса дене льгот категорий радамышке пурышо еҥ-влаклан препаратым налыт. Тӱҥ шотышто инвалидностян еҥ-влаклан идалык мучаш марте эмым ситарышаш улыт.
Марий Эл гыч амалкалче-влак кугыжаныш закупкышко кумылынрак ушнаш тӱҥалыныт. Муниципал да кугыжаныш заказ-влакым вераҥдыме, нуным илышышке пуртымо годым законодательствым шуктымо нерген регион вуйлатыше Александр Евстифеев Марий Эл Республикыште федеральный антимонопольный службо виктемын вуйлатышыже Павел Козел дене вашлийын мутланен. 2020 ийыште эпидемиологический ситуаций экономикышкат вашталтышым пуртен.
Йошкар-Олаште эше 6 «закусочныйым», марлаже пурлымыверым, петыреныт. Тиде арняште оласе администраций да полиций пашаеҥ-влак 9 ужалыше объект да общепит заведенийым тергеныт.
1 декабрь марте транспорт, мланде, илымверлан налогым тӱлен шуктыман. Тений налог службо республикыште илыше-влаклан 300 тӱжем утла уведомленийым колтен. Налогым тӱлышӧ-влак гыч ик нылымше ужашыже тудым электрон йӧн дене налын гын, молышт почто дене. Тений республикыште илыше-влак 912 миллион теҥгем тӱлышаш улыт. Тачысе кечылан тудым палемдыме чот гыч 33% тӱлен. Налогым банкын пӧлкаштыже, почта, тыгак налогым тӱлышын «Личный кабинетше», тыгак «Кугыжаныш услугын» порталже гоч тӱлаш лиеш. Кӧ регистрацийым личный кабинетыште эртен, уведомленийым электронно налын, тыгай еҥ-влаклан тудо почто дене огеш тол. Налог 100 теҥге дечын шагалрак, тыгак льгот уло гын, уведомлений огеш тол.
Россий Правительство 3 гыч 7 ияш марте йоча-влаклан кажне тылзын выплатым тӱлаш ешарен 62 миллиард теҥгем ойыра. Тидын шотышто кӱштымашыш кидпалыжым премьер-министр Михаил Мишустин пыштен. Тиде оксам российысе регионлашке, тыгодым Марий Элышкат колтат. Министр-влак кабинетыште умылтарат: тиде выплатым тыгай еш-влаклан пуат, кӧн парышыже илен лекташ ситыше окса кугытын пелыже дечын шагалрак. Марий Элыште тиде выплатын кугытшо кажне тылзын - 5500 теҥге. Тидлан тений 123 миллиард теҥгем ойырымо.
Киров ден Строитель урем-влакым ушымо корным чоҥымо паша палемдыме жапыштыже кая. Тиде магистраль эҥер гоч эрта, садланак кӱварым, путепровод-влакым ышташ тӱҥалыт. Вес арняште лӱмын техникым кондат, пашазе-влак кок метрат пеле келгытыште канализаций пуч-влакым опташ тӱҥалыт. Тиде пашам теле жапыште, йӱштышто ыштыман, садланак кызытсе игече келшен толеш. Пашам специалист-влак кум арня гыч мучашлышаш улыт.
Оршанка-Клюкино корным тӧрленыт. Тудым вес ийын «Лӱдыкшыдымӧ да сай качестван автомашина корно» национальный проект дене тӧрлышаш улыт ыле, но резерв фондын шийвундыжо дене пашам тений мучашлыме. Корнын ӱмбал ужашым фреза дене налыныт, вара асфальтобетон шартышым пыштеныт, тыгак корно тӱрым пеҥгыдемденыт. 4 километр кужытышто корно тӱрыс уэмын.
