Марий Элыште тӱшкан пайдаланыме транспортым уэмдат. Модернизаций йодышым Александр Евстифеев ВЭБ.РФ кугыжаныш корпораций председательын алмаштышыже Олег Говорун дене каҥашен. Улшо йодышым комплексно рашемдаш гын, сай лектыш лиеш. Тидлан планым ыштыме, транспорт автопаркым уэмдышаш улыт. Цифровой платформым кучылтын ик операторын пашаже тиде отрасльым вияҥдаш полша. Александр Евстифеевын мутшо дене, Марий Элыште тӱшкан пайдаланыме транспортын реформо проектше уло. Тыгаяк проектым ты марте Тверской областьыште кугыжаныш корпорацийын полшымыжо дене илышышке пуртеныт да 900 автобусым налыныт. 

Полиций пашаеҥ-влак правам аралымаште тыршат, тыгак республикыште эпидемиологический   ситуацийым саемдымашкат шке вийыштым пыштат. Республике правительстве пӧртыштӧ Александр Евстифеев Марий Элыште элкӧргӧ паша министр Сергей Волчков дене вашлийын. Кундемыштына, пытартыш ийла дене таҥастарымаште, преступлений-влакын чотышт шагалемын.

Коллегына-влакын пашаштым черетан конкурсышто палемденыт. Суд пристав федерал  службын Марий Эл Республикысе виктемже журналист-влак кокласе конкурсын регионысо этапшым иктешлен.

Марий кундемысе ик книгагудым 4 тӱжем у книга дене пойдарыме. У Торъял районышто «Культура» национальный проект дене модельный бибилиотекым ыштеныт. Тиде нацпроект денак келшышын, 4 тӱжемат 900 экземпляр у книгам налыныт. Тӱҥ шотышто тидлан 2 миллион теҥге ойыралтын. Тыге книгагудын фондшо 14% уэмын. 

Калык-влакын икяон улмо кечышт да республикын кечыже лӱмеш «Мунло» лӱман интеллектуал модмаш эртаралтын. Тудым икмыняр ий марий тӱвыра рӱдер эртара. Тений тиде модмаш ойыртемалтше лийын. Молан манаш гын, тушко тӱрлӧ калык-влакын командышт ушненыт.

Звенигово район гыч туныктышо-дефектолог «Педагогический дебют» российысе конкурсышто сеҥен. Анна Архипова «Светлячок» йочасадыште пашам ышта. Россий конкурсышто тудо «Йочасадыште пашам ыштыше самырык педагог» номинацийыште сеныше-влак радамыште. Чылаже конкурсышто 123 самырык педагог да 13 наставник ушненыт.

Индеш тылзе жапыште республикыште 4969 еҥ шочын, тыгодым вес тӱняш 6669 еҥ каен. Нине данный дене Маристат палдара. Тений мужыраҥаш шонышо-влак ойырлышо дечын утларак лийыныт, 316 еш январь гыч сентябрь марте шочын. 

Марий Эл гыч сатум ыштыше-влак «Российын тамже» национальный конкурсышко ушненыт. Ялозанлык министерствын палдарымыже дене, регион 12 брендым аклаш колтен. Тидын коклаште «Марий Отар» марий мӱкшызӧ-влакын брендышт. Тиде палым 2016 ийыште ыштыме. Таче кечын республикыште 2 тӱжемат 500 наре еҥ мӱкшым куча. Мӱкшызӧ-влакын 36 тӱжем мӱкш ешышт уло.

Йошкар-Оласе корно-влакым эрыкташ ныл единице техникым налыт. Тидын нерген Йошкар-Оласе администраций увертара. «Город» муниципал предприятийын автопаркше комбинированный корно технике дене пойдаралалтеш, тидлан 30 миллион теҥгем ойырат. 

Йошкар-Олаште эше кок йочасадым чоҥен шуктышаш улыт. «Демографий» национальный проект дене рӱдолаште Молодежный микройонышто да Прохоров уремыште 320 верлан йочасад-влакым ыштен шуктат. Таче кечылан чоҥышо-влак шке пашаштым мучашленыт, йыр улшо кумдыкым тӱзатат, изирак архитектур формо-влакым вераҥдат, йоча тӧнежлашке инвентарь да оборудованийым налыт.